ލަންޑަން (ސެޕްޓެމްބަރު 19) - އިނގިރޭސި ޕްރިމިއާ ލީގުގައި ރޭ ކުޅުނު މެޗުން ބްރެންޓްފޯޑުން 3-0 އިން ޗެލްސީ ބަލިކޮށްފި އެވެ.
މިއީ، 1938 ވަނަ އަހަރުގެ ފަހުން މިވީ 88 އަހަރު ތެރޭ އިނގިރޭސި ލީގުގައި ބްރެންޓްފޯޑުން ޗެލްސީގެ މައްޗަށް އަމިއްލަ ދަނޑުގައި ހޯދި ފުރަަތަމަ މޮޅެވެ. މިދިޔަ ހަ ސީޒަނުގެ ތެރޭގައި ލީގުގައި ބްރެންޓްފޯޑު ދަނޑުގައި ޗެލްސީ އަށް ވެސް އެއް ފަހަރު މޮޅުވެވުނުއިރު، ގިނަ މެޗުތައް ނިމުނީ އެއްވަރުވެގެންނެވެ.
ލަންޑަންގެ ޖީޓެކް ސްޓޭޑިއަމްގައި ރޭ ކުޅުނު މެޗުގެ ފުރަތަމަ ހާފުގައި ޗެލްސީ އާއި ބްރެންޓްފޯޑަށް ވެސް ލަނޑެއް ޖެހޭ ގޮތެއްނުވި އެވެ. މި މެޗުގައި ޗެލްސީން ކުޅެން ޖެހުނީ އެ ޓީމުގެ އެއް ނަމްބަރު ފޯވާޑް، ބްރެޒިލްގެ ޖޮއާއޯ ޕެޑްރޯ އަށް އަނިޔާވުމުން އޭނާގެ ބަދަލުގައި، ތަޖުރިބާކާރު ފޯވާޑް، ޑެނީ ވެލްބެކް، ފުރަތަމަ އެގާރަ އަށް ލައިގެންނެވެ. ޗެލްސީން ފުރަތަމަ ހާފުގައި ލީޑުނަގަން، ޕެޑްރޯ ނެޓޯ ފޮނުވާލި ޝޮޓެއް ބްރެންޓްފޯޑްގެ ކީޕަރު، ކޮއިމްހިން ކެލަހާ ވަނީ މަތަކޮށްފަ އެވެ.
ބްރެންޓްފޯޑުގެ އެޓޭކްތައް ދެ ވަނަ ހާފުގައި ވަރުގަދަކޮށް ފެނިގެންދިޔައިރު، އެ ޓީމުން ވަނީ މެޗުގައި ގަނޑިއިރެއް ކުޅެވުނުތަނާ ލީޑުނަގައިފަ އެވެ. މެޗުގެ، 61 ވަނަ މިނިޓްގައި ކޯނަރަކުން ތަނަވަސްވި ފުރުސަތެއްގައި ބްރެންޓްފޯޑުން ލީޑުނެގީ ޖެއިޑަން އެންތަނީ ބޮލުން ޖެހި ގޯލުންނެވެ.
ޗެލްސީން ނަތީޖާ ހަމަހަމަކުރެވޭތޯ މަސައްކަތް ކުރަމުން ދަނިކޮށް، ބްރެންޓްފޯޑުން ވަނީ ކައުންޓަ އެޓޭކުގައި ކުރިއަށް ޖެހި، 83 ވަނަ މިނިޓްގައި ދެ ވަނަ ލަނޑު ޖަހައިފަ އެވެ. މިއީ، ބްރެންޓްފޯޑްގެ ޖަރުމަނު ފޯވާޑް، ކެވިން ޝާޑާ، ޖެހި ބޯޅައެއް ޗެލްސީގެ ކީޕަރު އެމިލިއާނޯ މާޓިނޭޒް އަތުގައި ޖެހިފައި ރީބައުންސަށް ނުކުތް ވަގުތު ބްރެންޓްފޯޑްގެ ބްރެޒިލް ފޯވާޑް، އީގޯ ތިއާގޯ ޖެހި ގޯލެކެވެ. މިއީ، މިދިޔަ ސީޒަނުގައި 22 ލީގު ގޯލު ޖެހި، ތިއާގޯ މި ސީޒަނުގައި ޖެހި ފުރަތަމަ ގޯލެވެ.
އިތުރު ވަގުުތުގެ ތެރޭގައި ޗެލްސީ ކޮޅަށް ބްރެންޓްފޯޑްގެ ތިން ވަަނަ ލަނޑު ޖެހީ، ދެ ވަނަ ހާފުގައި ބަދަލަކަށް ކުޅެން އެރި ފަބިއޯ ކަވާލިއޯ އެވެ. މިއީ، ޗެލްސީ އޭރިއާތެރެއިން ރަނގަޅު ތަނަށް ހުސްކޮށް އަރައި، ކަވާލިއޯ ޖެހި ގޯލެކެވެ. ކަވާލިއޯ މި ވަނީ ޖެހިޖެހިގެން ދެ ވަނަ ސީޒަނުގައި ބެންޗުން އަރައި ޗެލްސީ ކޮޅަށް ލަނޑު ޖަހައިފަ އެވެ.
ރޭގެ މޮޅާ އެކު، ބްރެންޓްފޯޑުން ލީގުގައި ބަލިނުވެ، ފުރަތަމަ ފަސް މެޗު ނިންމާލިއިރު، މި ވަގުތު އެ ޓީމު އޮތީ ފަސް މެޗުން ނުވަ ޕޮއިިންޓާ އެކު، ތިން ވަނައިގަ އެވެ. ޒަބީ އަލޮންސޯގެ ކޯޗުކަމުގައި ކުޅެމުން އަންނަ ޗެލްސީން ލީގުގެ ފުރަތަމަ ދެ މެޗުން މޮޅުވި ނަމަވެސް، ދެން ކުުޅުނު ތިން މެޗުން ވެސް މޮޅެއް ނުލިބެ އެވެ. ދެ މެޗުން ބަލިވިއިރު، އެއް މެޗުން ވަނީ އެއްވަރުވެފަ އެވެ. ޗެލްސީ މި ވަގުތު، ފަސް މެޗުން ހަތް ޕޮއިންޓާ އެކު، ހަތް ވަނައިގައި އޮތްއިރު، މި ހަފްތާ ނިމޭއިރު، އެ ޓީމަށް ގަދަ 10 އަކުން ޖާގަ ގެއްލުމުގެ ބިރު އެބައޮތެވެ.
