މެންޗެސްޓާ (ސެޕްޓެމްބަރު 13) - އިނގިރޭސި ޕްރިމިއާ ލީގުގައި މިރޭ މެޗުގެ ބޮޑުބައި އެއް ކުޅުންތެރިއަކު މަދުކޮށް ކުޅުނު މެންޗެސްޓާ ސިޓީން 1-0 އިން މެންޗެސްޓާ ޔުނައިޓެޑް ބަލިކޮށްފި އެވެ.
މި ނަތީޖާއާ އެކު، ސިޓީން މި ވަނީ އެ ޓީމުން ލީގުގައި ކުޅުނު ހަތަރު މެޗުން ވެސް މޮޅުވެ، ސައްތަ އިން ސައްތަަ ރެކޯޑް ދަމަހައްޓައިފަ އެވެ. ސިޓީ އާއި އާސެނަލަކީ މި ފަހަރު ލީގުގައި ކުޅުނު ހަތަރު މެޗުން ވެސް މޮޅުވެ، ފުރިހަމަ ރެކޯޑަކާ އެކު އޮތް ދެ ޓީމެވެ.
ސިޓީން އެންޒޯ މަރެސްކާގެ ކޯޗުކަމުގައި ކުޅުނު ފުރަތަމަ މެންޗެސްޓާ ޑާބީން މި ވަނީ މޮޅުވެފަ އެވެ. އަނެއްކޮޅުން، ޔުނައިޓެޑަށް މި ވަނީ، މި ސީޒަނުގައި ދެ ވަނަ ބައްޔާ ކުރިމަތިލާން ޖެހިފަ އެވެ. ޔުނައިޓެޑް ވަނީ، ލީގުގެ ފުރަތަމަ މެޗުގައި ހަލް ސިޓީ އަތުން ވެސް ބަލިވެފަ އެވެ.
ޔުނައިޓެޑްގެ އޯލްޑް ޓްރެފޯޑް ސްޓޭޑިއަމްގައި ކުޅުނު މި މެޗު ފަށައިގެން ދެ ޓީމުގެ ފަރާތުން ވެސް އަވަސް ކުޅުމަކަށް ފަހު، އެޓޭކަށް ބޯޅަ ހިފައިގެންދިޔައިރު، މާ ނުރައްކާތެރި ހަމަލާތަކެއް މެޗުގެ ކުރީކޮޅުގައި ފެނިފައިނުވެ އެެވެ.
ޔުނައިޓެޑުން ކުރިއަށްދާ ބޯޅަތަކުގައި މާކަސް ރެޝްފޯޑަށް ދިނުމަށް ފަހު، އެޓޭކަށް ބަދަލުކުރެވޭތޯ މަަސައްކަތްކުރި އެވެ. އެކަމަކު، ސިޓީ ކުޅުންތެރިން ދިޔައީ ރަނގަޅަށް ޑިފެންސްކުރަމުންނެވެ.
މެޗުގެ ޕްރެޝަރު ބޮޑުވެގެންދިޔައީ، 23 ވަނަ މިނިޓްގައި ސިޓީގެ ފިލް ފޯޑެން އަށް ރަތް ކާޑެއް ދެއްކުމުންނެވެ. މިއީ، ބޯޅަ ނެތިސް ޔުނައިޓެޑްގެ ކެޕްޓަން، ބްރޫނޯ ފެނާންޑޭސް އަށް ހަމަލާދިން ކަމަށް ބަލައިފަ އެވެ. މިއީ، އިނގިރޭސި ޕްރިމިއާ ލީގައި، މެންޗެސްޓާ ޑާބީއެއްގައި ސިޓީ ކުޅުންތެރިއަކަށް ރަތް ކާޑު ދެއްކި ދެ ވަނަ ފަހަރެވެ. މީގެ ކުރިން ރަތެއް ދެއްކި ސިޓީގެ ކުޅުންތެރިއަކީ. ބެނާޑޯ ކޮރާޑީ އެވެ.
ސިޓީގެ ކުޅުންތެރިއަކު މަދުވުމުގެ ފައިދާނަގައި، ޔުނައިޓެޑުން ކުޅުން އަވަސްކުރެވޭތޯ މަސައްކަތްކުރި އެވެ. އެ ގޮތުން، ފުރަތަމަ ހާފުގައި އެ ޓީމުން ވަނީ ލީޑުނެގުމާ ގާތަށް ޖެހިލަައިފަ އެވެ. އެ ގޮތުން، އެރިއާބޭރުން ލިބުނު ހިލޭ ޖެހުމަކުން ރެޝްފޯޑް ފޮނުވާލި ބޯޅަ އަމާޒުވީ ގޯލުގެ އަރިމަތީ ދަނޑިއަށެވެ.
ދެ ވަނަ ހާފުގެ ކުޅުން ފަށައިގެން، ފަސް މިނިޓް ތެރޭ ޔުނައިޓެޑުގެ ދެ ވަނަ ހަމަލާއެއް ގޯލުގެ ދަނޑިއަށް އަމާޒުވި އެވެ. އެ ގޮތުން، މެޗުގެ 50 ވަނަ މިނިޓްގައި ސިޓީގެ އޭރިއާބޭރުން، ޔުނައިޓެޑްގެ ކޯބީ މައިނޫ ފޮނުވާލި ބޯޅައެއް އަމާޒުވީ ގޯލުގެ ދަނޑިއަށެެވެ.
ސިޓީން ކުޅުންތެރިއަކު މަދުކޮށް ކުޅެމުންދިޔައިރު، 60 ވަނަ މިނިޓްގައި ލީޑުނެގި އެވެ. މި ލަނޑު ޖެހީ އާލިން ބްރައުޓް ހާލަންޑް އެވެ. މިއީ، ޖޮސްކޯ ގްވާޑިއޯލް ނެގި ހުރަހަކުން ހާލަންޑް ޖެހި ލަނޑެކެވެ. އެންމެ ފުރަތަމަ އޮފްސަައިޑް ކަމަށް ނިންމި މި ގޯލު ބަލައިގަންނަން ނިންމީ، ވީޑިއޯ އެސިސްޓަންޓް ރެފްރީ (ވީއޭއާރް) އިން ބަލައިފަ އެވެ. ވީއޭއާރް އިން މި ގޮތަށް ނިންމީ، ޔުނައިޓެޑްގެ ޕެޓްރިކް ޑޯގޫ ހުރި ހިސާބުން ބަލާއިރު، ހާލަންޑް އޮފްސައިޑް ކަމަށް ވީއޭއާރަށް ނުފެންނާތީ އެވެ.
ކައުންޓަ އެޓޭކުގައި ސިޓީން ނުރައްކާ ކުރަމުންދިޔައިރު، 68 ވަނަ މިނިޓްގައި ލީޑުފުޅާކުރުމާ ގާތަށް ޖެހިލި އެވެ. އެ ގޮތުން، ޔުނައިޓެޑްގެ އޭރިއާބޭރުން ސިޓީގެ އެންޒޯ ފެނާންޑޭޒް ޖެހި ޝޮޓެއް ގޯލުގެ ދަނޑިއަށް އަމާޒުވީ، ޔުނައިޓެޑްގެ ކީޕަރު، ސެން ލަމެންސް އަތުގައި ޖެހިފަ އެވެ.
ޔުނައިޓެޑްގެ ފެނާންޑޭސް ޖެހި ޝޮޓެއް ސިޓީގެ ކީޕަރު، ޖިއަންލުއީޖީ ޑޮނަރުންމާ ވަނީ މަތަކޮށްފަ އެވެ. އަދި، ޔުނައިޓެޑްގެ ބްރަޔަން އެމްބެއުމޯ ބޮލުން ޖެހި ބޯޅައެއް ދިޔައީ ދަނޑިކައިރިން ބޭރުންނެވެ. އަދި، އިތުރު ވަގުތުގެ ފަހު މިނިޓްގައި، އެމްބެއުމޯ މުޅިން ހުސްކޮށް ހުރެފައި ޖެހި ޝޮޓް ޑޮނަރުންމާ ވަނީ މަތަކޮށްފަ އެވެ.
