ލަންޑަން (ސެޕްޓެމްބަރު 6) - އިނގިރޭސި ޕްރިމިއާ ލީގުގައި މިރޭ އެވަޓަން އިން ފަހު ސިކުންތުގައި ލަނޑު ޖަހައި 2-2 އިން މެންޗެސްޓާ ޔުނައިޓެޑާ އެއްވަރުކޮށް އެ ޓީމު މޮޅުވިޔަނުދީ ހިފެހެއްޓިއިރު، އާސެނަލުން ފަހަތުން އަރައި 2-1 އިން ޗެލްސީ ބަލިކޮށްފި އެވެ.
އެވަޓަންގެ ހިލް ޑިކިންސަން ސްޓޭޑިއަމްގައި ފުރަތަމަ ހާފުގައި ޔުނައިޓެޑަށް ލީޑުނަގައިދޭން ބްރޫނޯ ފެނާންޑޭސް ފޮނުވާލި ޝޮޓެއް ހުރަސްދަނޑި އަށް އަމާޒުވިއިރު، އެވަޓަންގެ ތިއާނޯ ބެރީ ހުސްކޮށް އަރައި ބޮލުން ޖެހި ބޯޅައެއް ގޯލާ ސީދާނުވި އެވެ.
ދެ ވަނަ ހާފުގެ ކުޅުން ފަށައިގެން މިނިޓެއް ނުހިނގަނީސް ޔުނައިޓެޑުން ލީޑުނެގި އެވެ. މިއީ، ޔުނައިޓެޑްގެ މިޑްފީލްޑަރު، ކޯބީ މައިނޫ ދިން ބޯޅައަކުން ބްރަޔަން އެމްބެއުމޯ ޖެހި ލަނޑެކެވެ. އެވަޓަން އިން ނަތީޖާ ހަމަހަމަ ކުރެވޭތޯ މަސައްކަތް ކުރަމުންދިޔައިރު، އެކަން ކާމިޔާބުވީ މެޗުގެ 83 ވަނަ މިނިޓްގަ އެވެ. ޗެލްސީގެ ޔޫތު ޓީމަށް ކުޅެ، ފުލަމް އިން ވެސް ފެނުނު ޓައިރިކް ޖޯޖް ވަނީ ގޯލުގެ މަތީ ދާގަނޑަށް ބޯޅަ އަމާޒުކޮށްލައިގެން އެވަޓަން އަށް އެއްވަރުކޮށްދީފަ އެެވެ.
މެޗުގެ 88 ވަނަ މިނިޓްގައި ޔުނައިޓެޑުން މެޗުގައި ދެ ވަނަ ފަހަރަށް ލީޑުނެގި އެވެ. މިއީ، ޔުނައިޓެޑްގެ ވާތުބެކް، ލޫކް ޝޯ ނެގި ހުރަހަކުން އެ ޓީމުގެ ސްލޮވީނިއާ ފޯވާޑް، ބެންޖަމިން ސެސްކޯ ބޮލުން ޖެހި ގޯލެކެވެ. ބެންޗުން ދެ ވަނަ ހާފުގައި ކުޅެން ނުކުތް ސެސްކޯ ބޮލުން ފޮނުވާލި ބޯޅަ ގޯލަށް ވަނީ އެވަޓަންގެ ކީޕަރު، ޖޯޑަން ޕިކްފޯޑް އަތުގައި ޖެހިފަ އެވެ.
ޔުނައިޓެޑް މޮޅުވާން ދަނިކޮށް އިތުރު ވަގުތުގައި ދެއްކި ފަސް މިނިޓް ހަމަވެ ބާކީ ވަގުތުގެ ތެރޭގައި އެވަޓަން އަށް އެއްވަރުކޮށްދިނީ އާސެނަލްގެ ކުރީގެ ކުޅުންތެރިޔާ، އައިންސްލީ މަައިޓްލަންޑް-ނައިލްސް އެވެ. ފްރެންޗް ލީގުގައި ކުޅުމަށް ފަހު، އެނބުރި ޕްރިމިއާ ލީގަށް އައިސް ކުޅުނު ފުރަތަމަ މެޗުގައި ބަދަލަކަށް އަރައި މައިޓްލަންޑް-ނައިލްސް ޖެހި ބޯޅަ އަމާޒުވީ ގޯލުގެ މަތީ ކަނަށެވެ.
މި މެޗުން އެއްވަރުވެ، ޔުނައިޓެޑަށް ލީގުގެ ފުރަތަމަ ތިން މެޗުން ލިބިފައިވަނީ ހަތަރު ޕޮއިންޓެވެ. އެވަޓަން ވެސް މި ސީޒަނުގައި މެޗަކުން އަދި ބަލިވެފައިނުވެ އެވެ. ލީގުގައި ދެ މެޗުން އެއްވަރުވެ، އެއް މެޗުން މޮޅުވި އެވެ.
އެންމެ ފަހުގެ ޗެމްޕިއަން، އާސެނަލުން މިރޭގެ މެޗު ފަށަން ޖެހުނީ އުނދަގޫ ކޮށެވެ. އެމިރޭޓްސް ސްޓޭޑިއަމްގައި މިރޭ ކުޅުނު މެޗު ފަށައިގެން، ދެ މިނިޓް ތެރޭ ޗެލްސީން ލީޑުނެގި އެވެ. އެ ޓީމުގެ ލަނޑު ޖެހީ، ޖޮރެލް ހަޓޯ ދިން ބޯޅައަކުން މޯގަން ރޮޖާސް އެވެ.
އާސެނަލަށް އެއްވަރުކޮށްދޭން ރިކާޑޯ ކަލަފިއޯރީ ޖެހި ގޯލެއް ވީޑިއޯ އެސިސްޓަންޓް ރެފްރީ (ވީއޭއާރް) އިން ބަލާފައި ނިންމީ އޮފްސައިޑް ކަމަށެވެ. އެކަމަކު، މެޗުގެ 25 ވަނަ މިނިޓްގައި ކައި ހަވާޓްޒް ވަނީ ހަނި އޭންގަލުން ގޯލުގެ ތެރެއަށް ބޯޅަ ފޮނުވާލައިފަ އެވެ.
ޗެލްސީ އަށް ދެ ވަނަ ފަހަރަށް ލީޑުނަގައިދޭން ޕެޑްރޯ ނެޓޯ ފޮނުވާލި ބޯޅައެއް ވަނީ ގޯލުގެ ދަނޑިއަށް އަމާޒުވެފަ އެވެ.
އާސެނަލުން މެޗުގެ ނަތީޖާ އަނބުރާލީ ދެ ވަނަ ހާފުގެ ކުޅުން ފަށައިގެން ފަސް މިނިޓް ތެރޭ އެވެ. އެ ގޮތުން، އާސެނަލްގެ ކްރިސްޓޯސް ޒޯލިސް ދިން ބޯޅައެއް ކޮންޓްރޯލް ކުރުުމަށް ފަހު، އެ ޓީމު މި މެޗުން މޮޅުކޮށްދިން ލަނޑު ޖެހީ ކެޕްޓަން މާޓިން އޮޑެގާޑް އެވެ. މެޗުގައި އާސެނަލަށް ތިން ވަނަ ލަނޑެއް ޖަހައިދޭން ބުކާޔޯ ސަކާ ޖެހި ޝޮޓެއް ޗެލްސީގެ ގޯލުގައި ހުރި އެމިލިއާނޯ މާޓީނޭޒް ވަނީ މަތަކޮށްފަ އެވެ.
އިނގިރޭސި ޕްރިމިއާ ލީގުގައި އާސެނަލުން އެންމެ ފަހުން ޗެލްސީއާ ދެކޮޅަށް ކުޅުނު 10 މެޗުން ވެސް ބަލިވެފައިނުވެ އެވެ. އާސެނަލް ދަނޑުގައި ޗެލްސީން އެންމެ ފަހުން ކުޅުނު ފަސް މެޗުން ވެސް ވަނީ ބަލިވެފަ އެެވެ.
އާސެނަލުން މި ފަހަރުގެ ލީގުގައި ކުޅުނު ތިން މެޗުން ވެސް މޮޅުވެފައިވާއިރު، މިއީ މި ސީޒަނުގައި ޗެލްސީން ގެނައި ކޯޗު ޒަބީ އަލޮންސޯގެ އިރުޝާދުގެ ދަށުން ކުޅުނު މެޗަކުން އެ ޓީމު ބަލިވި ފުރަތަމަ ފަހަރެވެ.
