ޗެލްސީ ކުރިއަށް، ފެނާންޑޭސްގެ ހެޓްރިކުން ޔުނައިޓެޑަށް މޮޅެއް

Aug 30, 2026, 11:44 PM
އިޕްސްވިޗް ކޮޅަށް ލަނޑު ޖެހުމަށް ފަހު ފެނާންޑޭސް އުފާފާޅުކުރަނީ.

އިޕްސްވިޗް ކޮޅަށް ލަނޑު ޖެހުމަށް ފަހު ފެނާންޑޭސް އުފާފާޅުކުރަނީ.

ލަންޑަން (އޮގަސްޓް 30) - އިނގިރޭސި ޕްރިމިއާ ލީގުގަައި މިރޭ ޗެލްސީން 4-3 އިން ބްރައިޓަން ހޯލްވް އެންޑް އަލްބިއަން ކައިރިން ކުރިހޯދައި މި ފަހަރު ލީގުގައި ދެ ވަނަ މޮޅު ހޯދިއިރު، ބްރޫނޯ ފެނާންޑޭސްގެ ހެޓްރިކާ އެކު 5-2 އިން އިޕްސްވިޗް ޓައުންގެ މައްޗަށް ކުރިހޯދައި މެންޗެސްޓާ ޔުނައިޓެޑުން ލީގުގައި މި ފަހަރު ފުރަތަމަ ފަހަރަށް މޮޅުވެއްޖެ އެވެ. 

ޗެލްސީން ފުރަތަމަ މެޗުގައި ފުލަމް އަތުން ރަށުންބޭރުގައި މޮޅުވިއިރު، މިރޭ ކުޅުނު މެޗުގައި އަމިއްލަ ދަނޑުގައި ވަނީ ވަރަށް ކުރިން ލަނޑު ޖަހައި ލީޑުނަގައިފަ އެވެ. މެޗުގެ ހަތަރު ވަަނަ މިނިޓްގައި ކޯނަރަކުން ތަނަވަސްވި ފުރުސަތެއްގައި ޗެލްސީ އަށް ލީޑުނަގައިދިނީ ރޮމެއޯ ލަވިއާ އެވެ. މިއީ، ޗެލްސީ އަށް އޭނާ ޖަހައިދިން ފުރަތަމަ ގޯލެވެ. އޭގެ 10 މިނިޓް ފަހުން، މޯގަން ރޮޖާސް ނަގައިިދިން ހުރަހަކަށް އަރައި ޕެޑްރޯ ނެޓޯ ވަނީ ޗެލްސީގެ ލީޑުފުޅާކޮށްދީފަ އެވެ. 

މެޗުގައި ޗެލްސީ އަށް ތިން ވަނަ ލަނޑެއް ޖަހައިދިނީ، ޖޮރެލް ހަޓޯ، ކައުންޓަ އެޓޭކުގައި އަރައި ދިން ބޯޅައަކުން ޖޮއާއޯ ޕެޑްރޯ އެވެ. މެޗުގެ 32 ވަނަ މިނިޓްގައި ޖޮއާއޯ ޕެޑްރޯ މި ލަނޑު ޖެހުމުގެ ކުރިން އޭނާ އަތުން ލަނޑު ޖަހަން ލިބުނު ހުސް ފުރުސަތެއް ވަނީ ގެއްލިފަ އެވެ. 

Advertisement

ތިން ގޯލުގެ ލީޑެއް ނަގައި ޗެލްސީ އަށް ހަމަޖެހި ނުލެވެނިސް ބްރައިޓަން އިން ލަނޑެއް ޖަހައި އުންމީދެއް ހޯދި އެވެ. މިއީ، ޗެލްސީ އަށް ބަދަލުވުމަށްފަހު ފުރަތަމަ މެޗުގައި ކުޅުނު އާޖެންޓީނާގެ ކީޕަރު، އެމިލިއާނޯ މާޓިނޭޒް އަތުގައި ޖެހިފައި ނުކުތް ރީބައުންސަކުން ބްރައިޓަންގެ މަލިކް ޔަލްކޫޔޭ ޖެހި ގޯލެކެވެ. 

ދެ ވަަނަ ހާފުގައި ކުޅުން ރަނގަޅުކުރި ބްރައިޓަން އިން 63 ވަނަ މިނިޓްގައި ދެ ވަނަ ލަނޑެއް ޖަހައި، އެއް ގޯލަށް ފަރަގު ކުޑަކުރި އެވެ. މިއީ، ބްރައިޓަންގެ ޕަސްކާލް ގްރޮސް ނެގި ހުރަހެއް ހުއްޓުވަން އުޅުމުގެ ތެެރޭގައި ޖޮއާއޯ ޕެޑްރޯ އަތުން ބައިކޮޅަށް ވަން ގޯލެކެވެ. މެޗުގެ 74 ވަނަ މިނިޓްގައި ޖޮއާއޯ ޕެޑްރޯ ދިން ބޯޅައަކުން އޭރިއާބޭރުން ގޯލުގެ ތިރީ ކަނަށް އަމާޒުކޮށްލައިގެން ކޯލް ޕާމާ ވަނީ ޗެލްސީ އަށް އަލުން ދެ ގޯލުގެ ލީޑެއް ނަގައިދީފަ އެވެ. 

ބްރައިޓަން ކޮޅަށް ލަނޑު ޖެހުމަށް ފަހު ޖޮއާއޯ ޕެޑްރޯ އުފާފާޅުކުރަނީ: މި މެޗުގައި އޭނާ އަތުން ބައިކޮޅަށް ވެސް ގޯލެއް ވަދެފައިވޭ.
ބްރައިޓަން ކޮޅަށް ލަނޑު ޖެހުމަށް ފަހު ޖޮއާއޯ ޕެޑްރޯ އުފާފާޅުކުރަނީ: މި މެޗުގައި އޭނާ އަތުން ބައިކޮޅަށް ވެސް ގޯލެއް ވަދެފައިވޭ.

އިތުރު ވަގުތުގެ ހަ ވަނަ މިނިޓްގައި ޗެލްސީ އޭރިއާތެރެއިން ހުސްކޮށް ހުރެ ބޮލުން ޖަހައި، ގްރޮސް ވަނީ ބްރައިޓަން އަށް ތިން ވަނަ ލަނޑެއް ޖަހައިދީފަަ އެވެ. 

ކުރިން ބަޔާ ލެވަކޫސަނާއި ރެއާލް މެޑްރިޑަށް ކޯޗުކޮށްދިން ޒަބީ އަލޮންސޯ ހަވާލުވި ފަހުން ޗެލްސީން މި ވަނީ ލީގުގެ ދެ މެޗާއި ލީގު ކަޕް މެޗުން ވެސް މޮޅުވެފަ އެވެ. އަލޮންސޯ އަކީ 2021 ވަނަ އަހަރު ޗެލްސީ އަށް ކޯޗުކޮށްދިން މިހާރު އިންގްލެންޑްގެ ކޯޗު ތޯމަސް ޓުޗެލް އަށް ފަހު ފުރަތަމަ ދެ ލީގު މެޗުން މޮޅުވި ފުރަތަަމަ ކޯޗެވެ. 

އަލަށް ޕްރޮމޯޓްވި ހަލް ސިޓީ އަތުން މިދިޔަ ހަފްތާގައި ބަލިވި ޔުނައިޓެޑް ކޮޅަށް މި ފަހަރު ޕްރޮމޯޓްވި އިޕްސްވިޗް ވެސް ވަނީ ލަނޑު ޖަހައި ލީޑުނަގައިފަ އެވެ. މިއީ، މެޗުގެ 29 ވަނަ މިނިޓްގައި އިޕްސްވިޗްގެ އަބްދުލް ފަތާވޫ ނަގައިިދިން ހުރަހަކުން ލެއިފް ޑޭވިސް ޖެހި ގޯލެކެވެ. މި ލަނޑު ޖެހުމުގެ ކުރިން އިޕްސްވިޗްގެ ހޫލިއޯ އެންސީސޯ ޖެހި ޝޮޓެއް ޔުނައިޓެޑްގެ ކީޕަރު ސެން ލަމެންސް ވަނީ މަތަކޮށްފަ އެވެ. 

ފުރަތަމަ ހާފު ނިމުމުގެ ކުރިން ޔުނައިޓެޑަށް 40 ވަނަ މިނިޓްގައި އެއްވަރުކޮށްދިނީ މަޓެއުސް ކޫންޏާ ދިން ބޯޅައަކުން ފެނާންޑޭސް އެވެ. ޔުނައިޓެޑުން ލީޑުނެގީ މެޗުގެ 56 ވަނަ މިނިޓްގައި އިޕްސްވިޗްގެ ޖެކަބް ގްރީވްސް އަތުން ބައިކޮޅަށް ވަން ގޯލުންނެވެ. މި ލަނޑު ޖެހުމަށް ޔުނައިޓެޑްގެ ހެރީ މެގުއާ ބޯޅަ ކޮންޓްރޯލް ކުރިއިރު، އަތުގައި ބޯޅަ ޖެހުނު ނަމަވެސް ވީޑިއޯ އެސިސްޓަންޓް ރެފްރީ (ވީއޭއާރް) އިން ބެލިއިރު، މެގުއާ ޖެހި ބޯޅަ ދިޔައީ ބޭރަށް ކަމަށްވާއިރު، އެ ބޯޅަ ގޯލަށް ވަނީ ގްރީވްސް ފަައިގައި ޖެހިފައި ކަމަށް ބަލައި، ގޯލު ބަލައިގަންނަން ވީއޭއާރް އިން ނިންމީ އެވެ. 

ޔުނައިޓެޑުން ލީޑުފުޅާކުރީ 61 ވަނަ މިނިޓްގައި ފެނާންޑޭސް ޖެހި ޕެނަލްޓީންނެވެ. މިއީ، ކޫންޏާ އަށް ގްރީވްސް ކުރި ފައުލަކަށް ދިން ޕެނަލްޓީ އެކެވެ. އޭގެ ހަތް މިނިޓް ފަހުން، ފެނާންޑޭސް ވަނީ އިތުރު ލަނޑެއް ޖަހައި، އޭނާގެ ހެޓްރިކް ފުރިހަމަަކޮށްފަ އެވެ. ޕްރޮފެޝަނަލް ފުޓްބޯލާސް އެސޯސިއޭޝަން (ޕީއެފްއޭ) އިން ހޮވި މިދިޔަ ސީޒަނުގެ އެންމެ މޮޅު ކުޅުންތެރިޔާގެ ޓްރޮފީ މި ހަފްތާގައި ލިބުނު ފެނާންޑޭސް ވަނީ މީގެ ފަސް އަހަރު ކުރިން ވެސް އާ ސީޒަނުގައި ލީގުގައި ޔުނައިޓެޑުން އަމިއްލަ ދަނޑުގައި ކުޅުނު ފުރަތަމަ މެޗުގައި ލީޑްސް ޔުނައިޓެޑް ކޮޅަށް ހެޓްރިކް ހަދައިފަ އެވެ. 

މެޗުގެ 82 ވަނަ މިނިޓްގައި ފެނާންޑޭސް ދިން ބޯޅައަކުން ޔުނައިޓެޑްގެ ފަސް ވަނަ ލަނޑު ޖެހީ ބްރަޔަން އެމްބެއުމޯ އެވެ. އަދި، އިތުރު ވަގުތުގެ ފުރަތަމަ މިނިޓްގައި، އިޕްސްވިޗުން ވަނީ މެޗުގައި އެ ޓީމުގެ ދެ ވަނަ ލަނޑެއް ޖަހައިފަ އެވެ. މިއީ، އެންސީސޯ ދިން ބޯޅައަކުން ޗޫބާ އަކްޕޮމް ޖެހި ލަނޑެވެ. 

ލީގުގައި މިރޭ ފުލަމް އަތުން ސަންޑަލެންޑް 1-0 އިން މޮޅުވީ، 75 ވަނަ މިނިޓްގައި ވިލްސަން އިސިޑޯ ޖެހި ގޯލުންނެވެ. ކެވިން ޝާޑާގެ ލަނޑުން ބްރެންޓްފޯޑުން ލީޑުނެގި މެޗުގައި ޑޮމިނިކް ކަލްވެޓް ލެވިން ވަނީ ލަނޑު ޖަހައި، ލީޑްސް އަށް 1-1 އިން އެއްވަރުކޮށްދީފަ އެވެ. 

ކޮމެންޓް

ފަހުގެ ޚަބަރު

ބްރޭކްތައް އަންނަ ގޮތުން "ލީގުގެ ފީލްއެއް ނީނދޭ": އާތީ

ދިވެހި ޕްރިމިއާ ލީގު މެދުކަނޑާލަން ޖެހުމުން ކުޅުންތެރިންގެ ފިޓްނަސް އާއި ޕާފޯމަންސަށް އަސަރުކޮށް، ލީގުގެ އަސްލު ފޯރި ނުލިބޭ ކަމަށް ޓީސީގެ ކޯޗު އާތީ ބުނެފި. އާތީ ފާހަގަކުރި ގޮތުގައި ގިނަ ދުވަސްތަކެއްގެ ބްރޭކްތަކުގެ ސަބަބުން ޓީމުތަކުގެ ކޮންޓިނިއުޓީ ގެއްލި، މެޗުތަކަށް ތައްޔާރުވުމުގައި ބޮޑެތި ގޮންޖެހުންތަކެއް ކުރިމަތިވޭ

ފީފާގެ އިންތިހާބުގައި އަރަބިންގެ ތާއީދު އިންފަންޓީނޯ އަށް

އަންނަ އަހަރު ބާއްވާ ފީފާގެ އިންތިހާބުގައި މިހާރުގެ ރައީސް ޖިއާނީ އިންފަންޓީނޯއަށް ތާއީދުކުރުމަށް 22 ގައުމު ހިމެނޭ އަރަބް ފުޓްބޯޅަ ޔޫނިއަން (ޔޫއޭއެފްއޭ) އިން ނިންމައިފިއެވެ. އިންފަންޓީނޯއާ އެކު ޖުމްލަ ތިން ކެންޑިޑޭޓުން ވާދަކުރާ މި އިންތިހާބުގައި، އޭޝިއާ އާއި އެފްރިކާގެ ގައުމުތަކުގެ ބޮޑު ތާއީދަކާއެކު އޭނާއަށް މަގާމު ދިފާއުކުރުމުގެ ފުރުސަތު ބޮޑުކަމަށް ބެލެވެއެވެ. ފީފާގެ އާ ރައީސަކު ހޮވުމަށް ވޯޓުލުން އޮންނާނީ އަންނަ އަހަރުގެ މާޗް މަހު މޮރޮކޯގައި ބާއްވާ ފީފާ ކޮންގްރެސްގައެވެ.

އިންޑިއާގެ ލެޖެންޑުން ފުޓްބޯޅަ ރައީސްގެ ޝަކުވާ ސަރުކާރަށް

އިންޑިއާގެ ފުޓްބޯޅަ ފެޑެރޭޝަންގެ ރައީސް ކަލްޔާން ޗޯބޭގެ އިތުބާރު ނެތްކަމުގެ މައްސަލަ، ބައިޗުން ބުޓިއާ ހިމެނޭހެން އެ ގައުމުގެ 14 ލެޖެންޑުން ސްޕޯޓްސް މިނިސްޓަރަށް ހުށަހަޅައިފި. މި ސިޓީގައި ފާހަގަކޮށްފައިވަނީ ފެޑެރޭޝަންގެ މާލީ ހާލަތު ގޯސްވެ ބަނގުރޫޓުވަމުންދާ ކަމަށް

ސުޒޭނާއި މޯހަންގެ ދުލުން: ބަދުނަސީބާއި ހައްލެއްގެ ވާހަކަ!

ސަރަހައްދުގެ އެހެން ގައުމުތަކުން ބޭރުގައި އުޅޭ އެ ގައުމުތަކުގެ ދަރިފަސްކޮޅުގެ ކުޅުންތެރިންނަށް ރަށްވެހިކަން ދީގެން ގައުމީ ޓީމުތައް ވަރުގަދަކުރަމުންދާއިރު، ރާއްޖެއަށް އެ ފުރުސަތު ކުޑަކަމަށް ކުރީގެ ކޯޗުން ފާހަގަކުރެއެވެ. މިކަމުގެ ސަބަބުން ރާއްޖޭގެ ފުޓްބޯޅައަށް ކުރިމަތިވެފައިވާ ގޮންޖެހުންތަކަށް ހައްލެއް ހޯދުމަށް އެކަށީގެންވާ ނިޒާމެއް ނެތްކަމުގެ ކަންބޮޑުވުން ވަނީ ފާޅުކޮށްފައެވެ.

ވޭގާގެ ނަމެއް ނެތް، ފީފާ އިންތިހާބުގައި ތިން ކެންޑިޑޭޓުން!

އަންނަ އަހަރު ބާއްވާ ފީފާގެ އިންތިހާބުގައި ވާދަކުރާ ތިން ކެންޑިޑޭޓުންގެ ނަން އިއުލާނުކުރިއިރު، ކުރީގެ ކުޅުންތެރިޔާ ރަމޮން ވޭގާގެ ނަން ޝަރުތު ހަމަނުވުމުގެ ސަބަބުން ވަނީ ބާކީވެފައި. މި އިންތިހާބުގައި ވާދަކުރައްވަނީ މިހާރުގެ ރައީސް އިންފަންޓީނޯގެ އިތުރުން ފްރާންސްގެ ފިލިޕޭ ޑިއާލޯ އަދި ޖަޕާނުގެ ކޯޒޯ ޓަޝީމާ

އަނިޔާއިން ރަނގަޅުވެ އިލާން އެނބުރި އަންނަން ތައްޔާރު

ކަކުލަށް ލިބުނު އަނިޔާއަކާ ގުޅިގެން ދެ މަހެއްހާ ދުވަހު ކުޅުމާ ދުރުގައި ހުރުމަށްފަހު، މާޒިޔާގެ ފޯވާޑް މުހައްމަދު އިލާން އިމްރާން އަލުން ކުޅުމަށް އެނބުރި އަންނަން ތައްޔާރުވެއްޖެ. މި އަނިޔާގެ ސަބަބުން އިލާނަށް ސާފް ޗެމްޕިއަންޝިޕާއި ލީގުގެ މުހިންމު މެޗުތަކެއް ގެއްލުނު ނަމަވެސް، އޭނާ މިހާރު ވަނީ ފަރިތަކުރުންތަކުގައި ބައިވެރިވާން ފަށާފައި

ފީފާ އިން ނޭޕާލްގެ ސަސްޕެންޝަން އުވާލަނީ؟

ފީފާގެ އެންގުންތަކަށް ބޯނުލެނބުމުގެ ސަބަބުން ނޭޕާލް ފުޓްބޯޅަ ފެޑެރޭޝަނަށް ދީފައިވާ ސަސްޕެންޝަން، ކުރިއަށް އޮތް މަހެއްހާ ދުވަސް ތެރޭގައި އުވާލާނެ ކަމަށް ނޭޕާލުން ވަނީ ބުނެފައި. މި ސަސްޕެންޝަން އުވާލުމަށް ނޭޕާލް ސަރުކާރުގެ މަންދޫބުން ފީފާ އާއި އޭއެފްސީއާ އެކު މަޝްވަރާކޮށްފައި

Newsletter

Get the latest news delivered straight to your inbox