ދިވެހި ރައްޔިތުންގެ ބޯހިޔާވަހިކަމަށް ޚާއްސަކޮށްގެން އާބާދުކުރުމަށް ނިންމައި، ހިއްކަން ފަށާފައިވާ ރަސްމާލޭގެ އެއްބައި ޔޫއޭއީގެ އެންމެ ބޮޑު ރިއަލް އެސްޓޭޓް ކުންފުނި އެމާރަށް ވިއްކާލުމާ ގުޅޭގޮތުން އިކޮނޮމިކް ކައުންސިލްގައި މަޝްވަރާކޮށްފި އެވެ.
އަދަދު ނޫހަށް އިތުބާރު ކުރެވޭ މަސްދަރުތަކުން ހޯދި މައުލޫމާތުން އެނގުނު ގޮތުގައި ރަސްމާލޭގެ ޓޫރިޒަމް ޒޯންގެ ގޮތުގައި ކަނޑައަޅާފައިވާ ސަރަހައްދެއްގެ ދެނީ ޓައުންޝިޕް އުސޫލުން ތަރައްގީކުރާށެވެ. މިއީ ނ. ދިގުފަރު ފަޅާއި ދެކެނަންފަރާއި ކުަރަމާދޫ ހިމެނޭ ގޮތަށް ތަރައްގީކުރަމުން އަންނަ "އައިލާ" އުސޫލުން ހާއްސަ ޓެކްސް ޒޯނެއްގެ ގޮތުގައި ކަނޑައެޅިގެން ދާނެ ސަރަހައްދެކެވެ.
ސަރުކާރާއީ އިމާރުން މަޝްވަރާތައް ކުރަމުން ދިޔަ ނަމަވެސް، މިހާތަނަށް ރަސްމީ އެއްވެސް އެއްބަސްވުމެއްގައި ސޮއިކޮށްފައި ނެތް ކަމަށެވެ.
މި މަޝްވަރާތަކުގައި ވާހަކަ ދެކެވެމުން ދަނީ ރަސްމާލޭގެ ބައެއް އެެމާރަށް ދީގެން، އޭގެ ބަދަލެއްގެ ގޮތުގައި ސޯޝަލް ހައުސިން ޔުނިޓުތައް އެޅުން ފަދަ ކަންކަން ހިމަނައިގެންނެވެ. މި ނޫހަށް މައުލޫމާތު ދިން މަސްދަރަކުން ސަރުކާރުން ބޭނުންވަނީ ރަސްމާލޭގައި ސަރުކާރުން ރާވާފައިވާ ކަންކަން ކުރެވޭނެ ގޮތަކަށް އެއްބަސްވުމަކަށް އަންނަން ކަމަށެވެ.
"މި މަޝްރޫއުތަކުގެ މަޝްވަރާތަކަށް ސަރުކާރުގެ ޓީމެއް ދުބާއީއަށް އެބަދޭ،" ސަރުކާރުގެ އޮފިޝަލަކު ވިދާޅުވި އެވެ.
ފުށިދިއްގަރު ފަޅު ހިއްކައިގެން ރަސްމާލެ ތަރައްގީކުރަން ފެށީ ޑިސެމްބަރު 18، 2023 ގައި އެވެ. ސަރުކާރުން އެންމެ ފުރަތަމަ ބުނީ 1153 ހެކްޓަރުގެ ސަރަހައްދެއް، އަށް މަސް ދުވަހުގެ ތެރޭގައި ހިއްކާ ނިންމާ، ދެން ހުރި މަސައްކަތްތައް ފަަށާނެ ކަމަށެވެ.
ކުޑަ ދުވަސްކޮޅެއްގެ ތެރޭގައި ހިއްކާ ނިންމާނެ ކަމަށް ބުނި ނަމަވެސް، ބިން ހިއްކަން ފެށިތާ މި އަހަރުގެ ޑިސެންބަރަށް ތިން އަހަރު ވާއިރު، ރަސްމާލެއަށް ބޭނުންވާ ބިން ހިއްކާ ނުނިމެ އެވެ. އެކަމަކު މިދިޔަ އަހަރުގެ ފަހުކޮޅުން ފެށިގެން ބިން ހިއްކާ މިންވަރު އިތުރުކޮށް، މިދިޔަ މަހުގެ ނިޔަލަށް 70 ޕަސެންޓު ވަނީ ހިއްކާ ނިންމާފަ އެވެ.
ރައީސް މުހައްމަދު މުއިއްޒު މިހާރު ވިދާޅުވަނީ، ސަރުކާރުގެ އަމާޒަކީ މި އަހަރުގެ ނިޔަލަށް ރަސްމާލެއަށް ބޭނުންވާ ބިން ހިއްކާ ނިންމާލަން ކަމަށެވެ.
ރަސްމާލެއަށް ހިއްކަން އޮތް ސަރަހައްދުތަކުގެ ތެރޭގައި، ރަސްމާލޭގެ އެންމެ ބޮޑު ސައިޓު ކަމުގައިވާ "ސައިޓު ޑީ" ހިމެނޭހެން އަދިވެސް ފަސް ސައިޓެއް އެބަ އޮތެވެ. މި ސައިޓުތަކުގެ ތެރެއިން ރަސްމާލޭގެ ޓޫރިޒަމް ޒޯނުގެ ގޮތުގައި ކަނޑައަޅާފައިވާ "ސައިޓު އީ" ހިމެނެ އެވެ. ލަފާކުރެވޭ ގޮތުގައި އެމާރަށް ދޫކޮށްލަނީ މި ސަރަހައްދެވެ.
މި ސަރުކާރުގެ އެންމެ ބޮޑު ޕްރޮޖެކްޓުގެ ގޮތުގައި ހިންގަމުން އަންނަ ރަސްމާލެ މަޝްރޫއަކީ، ސަރުކާރުން ބުނާ ގޮތުގައި، ވެހިންނަށް ދިމާވެފައިވާ ބޯހިޔާވަހިކަން ނެތުމުގެ މައްސަލައަށް އޮތް ވަށައިޖެހޭ ފުރިހަމަ ހައްލު ނުވަތަ "ޓޯޓަލް ސޮލިއުޝަން" އެވެ. އަދި މި ތަން ވާނީ މިއީ ތިމާވެއްޓާ ރައްޓެހި، މޫސުމީ ބަދަލުތަކަށް ވިލުންވެރި، ޒަމާނީ "އެކޯ-ސިޓީ" އަކަށް ކަމަށް ވަނީ ބުނެފަ އވެެ.
