ދައުލަތަށް ހިދުމަތް ކުރުމުގެ އެންމެ މަތީ ޝަރަފު ނިޝާން އިއްޒުއްދީނުގެ އިއްޒަތުގެ ވެރިޔާ މުހައްމަދު ރަޝީދު އިބްރާހިމް އާއި ނިޝާން އިއްޒުއްދީނުގެ އިއްޒަތުގެ ވިރިޔާ އައްބާސް އިބްރާހިމްއަށް މިރޭ އަރުވައިފި އެވެ.
ޖުމްހޫރީ ދުވަހުގެ ރަސްމީ ޖަލްސާގައި މުހައްމަދު ރަޝީދަށް ހިދުމަތުގެ އެންމެ މަތީ ޝަރަފު އެރުވީ އިސްލާމްދީނަށް ހޭލުންތެރިކަން އިތުރުކުރުވުމާއި، ދީނީ ރޮނގުން ކަމަށްވާއިރު، އައްބާސް އިބްރާހިމަށް އެންމެ މަތީ ޝަރަފު އެރުވީ ދިވެހިބަހާއި އަދަބިއްޔާތަށް ހިދުމަތްކުރުމުގެ ރޮނގުންނެވެ.
މުހައްމަދު ރަޝީދު އިބްރާހީމް ވަނީ، 40 އަހަރަށްވުރެ ދިގު މުއްދަތެއްގައި ދިވެހި ދައުލަތަށް ހިދުމަތް ކުރައްވާފަ އެވެ. އެންމެ ފަހުން އަދާކުރެއްވީ، އިސްލާމީ ފަތުވާދޭ އެންމެ މަތީ މަޖިލީހުގެ ރައީސްކަމުގެ މަގާމެވެ. އޭނާ ވަނީ ޕީއެޗްޑީ ވެސް ހާސިލުކުރައްވާފަ އެވެ.
މިސްރުން މަތީ ތައުލީމް ހާސިލުކުރައްވައިގެން މުހައްމަދު ރަޝީދު އެނބުރި ރާއްޖެ ވަޑައިގެން ސަރުކާރަށް ހިދުމަތް ކުރައްވަން ފެއްޓެވީ 1981 ގައި ރައީސުލްޖުމްހޫރިއްޔާގެ އެޑްވައިޒަރެއްގެ މަގާމުންނެވެ. އެއަށްފަހު އެ އޮފީހުގެ ހާއްސަ ވަކީލުގެ މަގާމުވެސް އޭނާ ފުރުއްވި އެވެ.
އަލްމަދުރަސަތުލް އަރަބިއްޔަތުލް އިސްލާމިއްޔާ އުފެދުމާ ގުޅިގެން އެ މަދުރަސާގެ މުދީރުކަން ވެސް ކުރައްވާފައިވާ މުހައްމަދު ރަޝީދު ވަނީ އިސްލާމީ ކަންތައްތަކާ ބެހޭ އެންމެ މަތީ މަޖިލީހުގެ ރައީސްކަމާއި އިސްލާމީ ފަތުވާދޭ އެންމެ މަތީ މަޖިލީހުގެ މެންބަރުކަމާއި ރައީސްކަމުގެ އިތުރުން އިސްލާމިކް މިނިސްޓަރުގެ އެޑްވައިޒަރުގެ މަގާމު ފުރުއްވި އެވެ.
ދިވެހި ބަހާއި އަދަބިއްޔާތުގެ ދާއިރާއިން ފާހަގަކޮށްލެވޭ ގިނަ ހިދުމަތްތަކެއް ކޮށްދެއްވާފައިވާ އައްބާސް އިބްރާހިމަކީ ނޫސްވެރިކަމުގެ ދާއިރާއަށް އެތައް ހިދުމަތްތަކެއް ކޮށްދެއްވާފައިވާ ބޭފުޅެކެވެ. އޭނާ ވަނީ ދިވެހިބަހާއި ތާރީހަށް ހިދުމަތްކުރާ ގައުމީ މަޖިލީހުގެ ރައީސްކަން 12 އަހަރު ކުރެެއްވި އެވެ.
އައްބާސްގެ ހިދުމަތުގެ ތެރޭގައި ދިވެހި ބަސްފޮތް ޑިޖިޓަލްކޮށް ކޮމްޕިއުޓަރުން ބޭނުންކުރެވޭ ގޮތަށް ބަދަލުކުރެއްވުން ހިމެނޭއިރު، އޭނާ ވަނީ ދިވެހި ބަހުގެ އެކަޑަމީގައި އޮންނަ ބަސް ކޮމިޓީގެ މެންބަރެއްގެ ގޮތުގައި މަސައްކަތްކުރައްވާފަ އެވެ. އޭގެ އިތުރުން އެ ކޮމިޓީގެ ބަހުގެ ގަވާއިދު ކޮމިޓީގެ ރައީސަކީ އަދިވެސް އޭނާ އެވެ.
އެކިއެކި މައުލޫތަކަށް މަޒުމޫނު ލިޔުއްވާ އައްބާސް ވަނީ އެކިއެކި ވާހަކަތައް ލިޔުއްވައި، ބޭރުގެ އެކި ވާހަކަތައް ދިވެހި ބަހަށް އޭނާ ވަނީ ތަރުޖަމާކޮށް ނެރުވައްވާފަ އެވެ. އޭނާގެ ހިދުމަތްތަކުގެ އަގުވަޒަންކުރަން ދައުލަތުން ވަނީ އެކި ޝަރަފު މީގެ ކުރިން އަރުވާފަ އެވެ.
އައްބާސް އިބްރާހީމް މިހާރު ހުންނެވީ، ހެރިޓޭޖް މިނިސްޓްރީގެ މުޝީރުގެ މަގާމުގަ އެވެ. ދިވެހިބަހާއި އަދަބިއްޔާތުގެ ދާއިރާގައި އޭނާ ހިދުމަތް ކުރައްވަމުން ގެންދަވާތާ މިހާރު 67 އަހަރަށްވުރެ ދިގު މުއްދަތެއް ވެއްޖެ އެވެ.








