ޖަލު ހުކުމް ތަންފީޒުކުރަމުންދާ ފަރާތްތަކުން ކޯޓުތަކަށް ހުށަހަޅާ އިސްތިއުނާފު މައްސަލަތައް ނިންމުމަށް ގާނޫނުގައި ވަކި މުއްދަތެއް ކަނޑައެޅިފައި ނެތުމުގެ ސަބަބުން އަދަބު ލިބޭ މީހުންގެ އަސާސީ ހައްގުތަކެއް ގެއްލެމުންދާތީ، އެ ކަމަށް ގާނޫނީ ހައްލެއް ހޯދުމަށް ޖުޑީޝަލް ސާވިސް ކޮމިޝަން (ޖޭއެސްސީ) ކޮމިޓީއަށް ހާޒިރުކުރުމަށް ރައްޔިތުންގެ މަޖިލީހުގެ ޖުޑިޝަރީ ކޮމިޓީން އިއްޔެ ފާސްކޮށްފި އެވެ.
މި ގޮތަށް ނިންމީ ގަލޮޅު އުތުރު ދާއިރާގެ މެންބަރު މުހައްމަދު އިބްރާހީމް (ކުޑޫ) ހުށަހެޅުއްވި މައްސަލައަކާ ގުޅިގެން ބޭއްވި ކޮމިޓީ ބައްދަލުވުމުގަ އެވެ.
ކޮމިޓީގެ ބަހުސްގައި ވާހަކަދައްކަވަމުން ކެންދޫ ދާއިރާގެ މެންބަރު މައުރޫފް ޒާކިރު (މަޓޭ) ވިދާޅުވީ، މިއީ ކޮމިޓީގެ މެންޑޭޓުގެ ތެރެއިން ކޮންމެހެން ވެސް ހައްލު ހޯދަންޖެހޭ މުހިންމު މައްސަލައެއް ކަމަށެވެ. ހުކުމެއް ކުރެވި، އަދި ހުކުމުގެ އިސްތިއުނާފު މަރުހަލާ ނިމޭއިރު، ޖަލު ހުކުމް އެއްކޮށް ތަންފީޒުވެ ނިމޭ ހިސާބުން އިސްތިއުނާފު މަރުހަލާ ނިމޭ ކަމުގައި ވާ ނަމަ އަދި ނިމިގެން އޭނާގެ މައްޗަށް ކުށް ސާބިތުނުވާ ހާލަތްތަކުގައި އެއީ ވަރަށް ބޮޑު ހައްގަކަށް އަރައިގަތުން ކަމަށް މައުރޫފް ވިދާޅުވި އެވެ.
އެ ގޮތުން ނުގަވައިދުން ހުކުމެއް ކުރެވި، މީހަކު ޖަލުގައި އެއް އަހަރު ދުވަސް ހޭދަކުރާ ފަހުން މަތީ މަރުހަލާގެ ކޯޓަކުން އޭނާއަކީ މައުސޫމް މީހެއް ކަމަށް ނިންމާ ހާލަތުގައި އެއީ ބަދަލު ދީގެން ވެސް އިޔާދަކުރެވޭނެ ވަރުގެ ކަމެއް ނޫން ކަމަށް އޭނާ ފާހަގަކުރެއްވި އެވެ.
މި މައްސަލައިގައި ގާނޫނީ އޮނިގަނޑު އޮތް ގޮތުގެ ތަފްސީލު ދެއްވަމުން ހުޅުދޫ ދާއިރާގެ މެންބަރު މުހައްމަދު ޝާހިދު ވިދާޅުވީ، ދިވެހިރާއްޖޭގެ ޖުމްހޫރިއްޔާގެ ގާނޫނުއަސާސީގެ 50 ވަނަ މާއްދާގެ ދަށުން އިސްތިއުނާފުކުރުމުގެ ހައްގު ކޮންމެ މީހަކަށް ވެސް ލިބިގެންވާ ކަމަށެވެ. އަދި ގާނޫނުއަސާސީގެ 42 ވަނަ މާއްދާގެ (ހ) އަދި 51 ވަނަ މާއްދާގެ (ށ) ގައި އެކަށީގެންވާ މުއްދަތެއްގެ ތެރޭގައި ޝަރީއަތްކޮށް ނިންމުމުގެ ހައްގު ކަށަވަރުކޮށްދޭކަން އޭނާ ފާހަގަކުރެއްވި އެވެ.
ޖިނާއީ އިޖުރާއަތުގެ ގާނޫނުގައި އިސްތިއުނާފުކުރަންޖެހޭ މުއްދަތުތައް ބަޔާންކުރި ނަމަވެސް، ހުކުމެއް ތަންފީޒުކުރަމުންދާ މީހެއްގެ އިސްތިއުނާފު މައްސަލަ ނިންމަންޖެހޭ ވަކި މުއްދަތެއް އެއްވެސް ގާނޫނެއްގައި ބަޔާންކޮށްފައި ނެތުމަކީ އިންސާފުގެ ނިޒާމުގައި އޮތް ބޮޑު މައްސަލައެއް ކަމަށް ޝާހިދު ވިދާޅުވި އެވެ.
ޖުޑީޝަރީ ކޮމިޓީން ވަނީ، ޖޭއެސްސީއާ މަޝްވަރާކުރުމަށް ފަހު ގާނޫނަށް ބަދަލު ގެންނަންޖެހޭ ނަމަ އެޓާނީ ޖެނެރަލްގެ އޮފީހަށް ފޮނުވުމަށް ވަނީ ނިންމައިފަ އެވެ.
މި މައްސަލަ އާންމުންނާއި މެންބަރުންގެ ސަމާލުކަމަށް އައީ، ހަށިގަނޑުގައި ފޮރުވައިގެން ރާއްޖެއަށް ދެ ކިލޯގެ ރަން އެތެރެކުރި ކަމަށް ބުނެ އެއް އަހަރުގެ ޖަލު ހުކުމެއް ތަންފީޒުކުރަމުންދިޔަ ސްރީ ލަންކާގެ ރައްޔިތެއް ކަމަށްވާ މުހައްމަދު ސުލައިމްހާންގެ މައްޗަށް ކުށް ސާބިތުނުވާ ކަމަށް ހައި ކޯޓުން ކަނޑައެޅި މައްސަލައާ ގުޅިގެންނެވެ. ކްރިމިނަލް ކޯޓުން އިއްވި ހުކުމް ބާތިލްކޮށް ހައި ކޯޓުން އޭނާ މިނިވަންކުރީ، އެއް އަހަރުގެ ޖަލު ހުކުމް އެއްކޮށް ތަންފީޒުކޮށް ނިމުނު ދުވަހުގަ އެވެ.








