އޮފްޝޯ ބުކިން ޕްލެޓްފޯމްތަކާއި ބޭރުގެ ޓުއާ އޮޕަރޭޓަރުންނާއި ޓްރެވަލް އެޖެންޓުން ފޯރުކޮށްދޭ މުދަލާއި ހިދުމަތުން 17 ޕަސަންޓު ޓެކްސް ނަގަން ފެށުމުގެ ގޮތުން މުދަލާއި ހިދުމަތުގެ އަގުން ޓެކްސް ނެގުމުގެ ގާނޫނު (ޖީއެސްޓީ ގާނޫނު) އަށް ގެނައި އިސްލާހަށް އަމަލުކުރުން ފަސްކުރުމަށް އެދި ރައްޔިތުންގެ މަޖިލީހަށް މިއަދު މައްސަލައެއް ހުށަހަޅައިފި އެވެ.
މަޖިލީހުގެ ރައީސް އަބްދުއްރަހީމް އަބްދުﷲ އަށް އެޑްރެސްކުރައްވައި ގަލޮޅު އުތުރު ދާއިރާގެ މެންބަރު މުހައްމަދު އިބްރާހިމް (ކުޑޫ) ހުށަހެޅުއްވި މައްސަލައިގައި އެދިފައިވަނީ ޑެސްޓިނޭޝަން ޕްރިންސިޕަލްގެ ދަށުން ޓެކްސް ނެގުމުގެ މި މައްސަލަ މަޖިލީހުގެ މާލިއްޔަތު ކޮމިޓީން ބަލައިދިނުމަށެވެ.
އޭނާ ވިދާޅުވީ އޮކްޓޯބަރު 1، ގައި އަމަލުކުރަން ފަށާ މި އިސްލާހަށް އަމަލުކުރުން ފަސްކޮށް، ކުރިން ސޮއިކޮށްފައިވާ އެއްބަސްވުންތަކަށް އިސްތިސްނާދީ، ނުވަތަ ބައިނަލްއަގުވާމީ މާކެޓްގެ އިތުބާރު ދެމެހެއްޓޭނެ ފަދަ އުސޫލުތަކެއް ކަނޑައެޅުމުގެ ފުރުސަތު ފަތުރުވެރިކަމުގެ ދާއިރާގައި ހަރަކާތްތެރިވާ ފަރާތްތަކަށް ހޯދައިދޭން ޖެހޭ ކަމަށެވެ.
މިގާނޫނަށް އިސްލާހު ގެނައިއިރު ސަރުކާރުން އިގްތިސާދީ ގޮތުން ކުރާނެ އަސަރުތަކުގެ ދިރާސާއެއް ނުވަތަ މާކެޓް ރިސްކް އެނަލިސިސްއެއްގެ އިތުރުން ކަމާބެހޭ ބޭުރުގެ ފަރާތްތަކާ ގުޅިގެން ހަދަންޖެހޭ ފީސިބިލިޓީ ސްޓަޑީއެއްވެސް ހަދާފައި ނުވާ ކަމަށް ކުޑޫ ވިދާޅުވި އެވެ.
ކުޑޫ ހުށަހެޅުއްވި މައްސަލައިގައި ޓޫރިޒަމް އެޑްވޮކަސީ ޖަމިއްޔާ، ޑެސްޓިނޭޝަން ފިއުޗާއިން ތައްޔާރުކޮށްފައިވާ ރިޕޯޓުގައި ހިމެނޭ ކަންކަންވެސް ފާހަގަކުރައްވާފައިވެ އެވެ.
ސަރުކާރުގެ ފަރާތުން ޖީއެސްޓީ ގާނޫނު އިސްލާހުކުރީ ޖީއެސްޓީ ނެގޭނީ ރާއްޖޭގައި ވިއްކާ މުދަލުން ކަމަށް ގާނޫނުގައި އޮތް މާއްދާތައް ބަދަލުކޮށް، ރާއްޖޭގައި ފޯރުކޮށްދޭ މުދަލާއި ހިދުމަތުން ޖީއެސްޓީ ނެގޭގޮތަށް އިބާރާތް ބަދަލުކޮށްގެންނެވެ.
ސަރުކާރުން އަވަސް އަރުވާލައިގެން މި ބަދަލުތައް ގެނައިއިރު، ސަރުކާރުން ލިބޭނެ ކަމަށް އަންދާޒާކުރާ އަދަދާއި މި ޓެކްސް ނެގުމުގެ އިދާރީ ކަންކަން ހަމަޖައްސަން ހަރަދު ވާނެ ކަމަށް ބުނި އަދަދާ މެދު ޑެސްޓިނޭޝަން ފިއުޗާއިން ސުވާލު އުފެއްދި އެވެ.
ޓެކްސް ގާނޫނު ބަދަލުކުރަން ރައްޔިތުންގެ މަޖިލީހަށް ހުށަހެޅި ބިލުގައި ސަރުކާރުން ލަފާކުރީ، މި ގޮތަށް ޓެކްސް ނަގައިގެން އަހަރަކު އިތުރަށް 1.6 ބިލިއަން ރުފިޔާ ލިބޭނެ ކަމަށެވެ. އަދި މި ބަދަލުތައް ގެންނާތީ ހަރަދު ކުރަން ޖެހޭނީ އަހަރަކު 5.1 މިލިއަން ރުފިޔާ ކަމަށެވެ. ޑެސްޓިނޭޝަަން ފިއުޗާއިން ބުނީ، ޓެކްސް ނެގޭ-ބޭސް އާއި، ކޮމްޕްލައިންސް އަދި ކަލެކްޝަން އަންދާޒާތައް ޝާއިއުކޮށް ސްޓްރެސް ޓެސްޓް ކުރަން ޖެހޭ ކަމަށެވެ.
ޑެސްޓިނޭޝަން ފިއުޗާގެ ރިޕޯޓުގައި ސަރުކާރުން ނިންމާފައިވާ ގޮތަށް އަންނަ މަހުން ފެށިގެން ޑޮލަރު މާރުކުރާ މިންވަރު 40 ޕަސެންޓަށް މަތިކުރުމާއި ޑެސްޓިނޭޝަން ޕްރިންސިޕަލްގެ ދަށުން ބޭރުގެ ޓުވާ އޮޕަރޭޓަރުންނާއި ޓްރެވަލް އެޖެންޓުންގެ ޓެކްސް ނެގުން އިހަށް މަޑުޖައްސާލަން ވަނީ ގޮވާލާފަ އެވެ.
ޑެސްޓިނޭޝަން ފިއުޗާއިން ސަރުކާރަށް ހުށަހެޅި ކަރުދާހެއްގައި މިހެން ގޮވާލީ، މި ބަދަލުތަކަކީ ޓޫރިޒަމް ސިނާއަތުގެ އަދުގެ ހާލަތާ ނުބައްދަލު ބަދަލުތަކެއް ކަމުގެ ކަންބޮޑުވުން ފާޅުކުރަމުންނެވެ. އެ ޖަމިއްޔާއިން ވަނީ މިއީ އިއާދަނުކުރެވޭ ވަރުގެ ގެއްލުމެއް ލިބިމުގެ ފުރުސަތު ބޮޑު ބަދަލުތަކެއް ކަމަށް ސިފަކޮށްފަ އެވެ.
މި ބަދަލުތަކުގެ ހުރި ގެއްލުމާ ގުޅުވާ ޑެސްޓިނޭޝަން ފިއުޗާއިން ބުނީ މި ކަމުގެ ސަބަބުން ލިބެން އޮތީ "ހިމޭން، އިއާދަަނުކުރެވޭ" ވަރުގެ ގެއްލުމެއް ކަމަށެވެ. ސަބަބެއް ކަމަށް ބުނީ، އާންމުކޮށް އިއުލާންކޮށްގެން ރާއްޖެ ދޫކޮށްފައި ނުދިޔަޔަސް، ރާއްޖެއަށް ޓޫރިސްޓުން ފޮނުވާ މީހުން އެ މީހުންގެ ވިޔަފާރި ވާދަވެރި މަންޒިލުތަކަށް ގެންދާނެ ކަމަށެވެ.
ޓޫރިޒަމް ވިޔަފާރިތަކަށް އިތުރު އުނދަގޫތަކެއް ކުރިމަތިވާނެ ކަމަށް އެ ވިޔަފާރިތަކުން ބުނާ މި ބަދަލުތަކާ ދެކޮޅަށް ރިސޯޓުތަކާއި ރާއްޖެއަށް ޓޫރިސްޓުން ފޮނުވާ ވިޔަފާރިތަކުން ވެސް އަންނަނީ ކަންބޮޑުވުން ފާޅުކުރަމުންނެވެ. މި ކަމުގެ މައުލޫމާތު ދޭން ބޭއްވި ބައްދަލުވުމެއްގައި ބައެއް ޓުވާ އޮޕަރޭޓަރުންނާއި ޓްރެވަލް އެޖެންޓުން ވަނީ ރާއްޖެ ވިއްކުން ހުއްޓާލާނެ ކަމަށް ބުނެފަ އެވެ.
