ޓޫރިޒަމް ޕްރޮޑަކްޓުތަކުން ޓެކްސް ނަގާ ގޮތް ޑެސްޓިނޭޝަން ޕްރިންސިޕަލަށް ބަދަލުކުރާތީ ކަންބޮޑުވުން ފާޅުކޮށް، ރާއްޖޭގެ ރިސޯޓުތަކާއި، ހޮޓާތަކާއި، ގެސްޓުހައުސްތައް ވިއްކާ ބޭރުގެ ޓުއާ އޮޕަރޭޓަރުންނާއި ޓްރެވަލް އެޖެންޓުންގެ ފައިދާއިން ޓެކްސް ދައްކަން ޖެހޭ ގޮތަށް ބަދަލުކޮށްފި ނަމަ ރާއްޖެ ބޮއިކޮޓްކޮށް، އެހެން މަންޒިލުތައް ވިއްކަން ފަށާނެ ކަމުގެ އިންޒާރު ދީފި އެވެ.
ބޭރުގެ އޮޕަރޭޓަރުންނާއި އެޖެންޓުންގެ މި ކަންބޮޑުވުންތައް ބަންޑުންކޮށްލީ، ޖީއެސްޓީ ގާނޫނަށް ގެނައި ބަދަލާ ގުޅޭ ގޮތުން ސަރުކާރުގެ ކަމާ ބެހޭ ވުޒާރާތަކާއި ޓެކްސް އިދާރާ، މޯލްޑިވްސް އިންލެންޑް ރެވެނިއު އޮތޯރިޓީ (މީރާ) ގުޅިގެން ބޭއްވި އޮންލައިން ވެބިނާއެއްގައި އެވެ. ދުނިޔޭގެ އެކި ކަންކޮޅުތަކުން 600 އަށް ވުރެ ގިނަ މީހުން ބައިވެރިވި މި ބައްދަލުވުމުގެ ގިނަ ބައިވެރިން ވަނީ މި ބަދަލާ މެދު ނުރުހުން ފާޅުކޮށްފަ އެވެ.
މި ބައްދަލުވުމުގައި ބައިވެރިވީ މީހުން އަދަދު ނޫހަށް ބުނި ގޮތުގައި، މި ބައްދަލުވުމުގައި ޑެސްޓިނޭޝަން ޕްރިންސިޕަލް (މުދާ ނުވަތަ ހިދުމަތް ފޯރުކޮށްދޭ ތަނާއި ވަގުތު) ގެ ގަވާއިދުތަކާއި، އަންނަ މަހުގެ އެއް ވަނަ ދުވަހުގެ ކުރިން ހަދާފައިވާ ބުކިންތަކުގައި އަމަލުކުރާނެ ގޮތް ހާމަ ކުރި އެވެ. ނަމަވެސް މި މައުލޫމާތުތައް ދޭން ފެށުމުން، ވެބިނާގެ ބައިވެރިން ވަނީ މި ބަދަލުތަކާ ވަރަށް ބޮޑަށް ދެކޮޅު ހަދާ ވާހަކަ ދައްކާފަ އެވެ.
އެންމެ ގިނަ ބައިވެރިންގެ ކަންބޮޑުވުމަކަށްވީ، ޑަބަލް ޓެކްސޭޝަނުގެ މައްސަލަ އެވެ. ޑަބަލް ޓެކްސޭޝަނަކީ އެކައްޗަކުން ދެ ފަހަރަށް ޓެކްސް ނެގުމެވެ. މި މައްސަލައިގައި ރާއްޖޭގެ ޓޫރިޒަމް ވިއްކުމުގައި މެދުވެރިންގެ ރޯލު އަދާކުރާ މީހުން ބުނީ، ރާއްޖެއަށް ޓޫރިސްޓުން ފޮނުވަނީ ޓީޖީއެސްޓީ އާއި ގްރީން ޓެކްސް އެ މީހުން ވިއްކާ އަގުގައި ހިމަނައިގެން ކަމަށެވެ.
މި އަގުގެ ތެރޭގައި އެ މީހުންގެ ފައިދާ ހިމެނޭއިރު، ސަރުކާރުން ބޭނުންވަނީ މި ފައިދާ ނުވަތަ މާކްއަޕްގެ ގޮތުގައި ހިމަނާ އަދަދު ޓެކްސް ކުރާށެވެ. ބައެއް ބައިވެރިން ބުނި ގޮތުގައި، މި ފައިދާއިން އެ މީހުންގެ ގައުމުތަކުގައި ޓެކްސް ދައްކަމުން އަންނައިރު، ހަމަ އެ އަދަދުން ރާއްޖެއަށް 17 ޕަސެންޓު ދެއްކުމަކީ ދެ ފަހަރު ޓެކްސް ދެއްކުމެވެ.
"ވަރަށް ހިތާމަޔާއެކީ ބުނަން ޖެހޭނީ މާފުކުރާށޭ، އަހަންނަކަށް މި ކަމަކަށް ތާއިދުކުރެވޭކަށް ނެތް. ކަލޭމެން ތި އުޅެނީ ރާއްޖެއިން ބޭރުގައި އަހަރަމެން ފޯރުކޯށްދިން ހިދުމަތަކުން "ޓެކްސް" ނަގަން. މި މާޖިންއަކީ އަހަރަމެންގެ ގައުމުގައި ޓެކްސް ދައްކަން ޖެހޭ އަދަދެއް. ޓުއާ އޮޕަރޭޓަރެއްގެ ގޮތުގައި ރާއްޖެ ވިއްކުން ނިމުނީ." ކަތަރީނާ ކިޔާ ޓުވާ އޮޕަރޭޓަރަކު ބުންޏެވެ.
އެހެން ޓްރެވަލް އެޖެންޓަކު ބުނީ އެ މީހުންގެ ފައިދާއިން ޓެކްސް ނެގުމަކީ އެއްވެސް ގައުމަކުން ކަން ކުރާ ގޮތެއް ނޫން ކަމަށެވެ. މި ކަމަށް ތާއިދުކޮށް ވާހަކަ ދެއްކި އެހެން ބައިވެރިއަކު ބުނީ، ޝީޝެލްސް އާއި ސައުދީ އަރަބިއާ އާއި ފީޖީ ފަދަ ގައުމުތަކުން މި ގޮތަށް ޓެކްސް ނުނަގާ ކަމަށެވެ. އަދި، ރާއްޖެއިން މި ޓެކްސް ނަގަން ފަށައިފި ނަމަ، އެ މީހުން ވިއްކާނީ އެ ތަންތަން ކަމަށް ބުންޏެވެ.
"އަލަން ނަގަން ފަށާ ޓެކުހާއެކީ ކަނޑުގެ ލޮނުގަނޑު އުފުލުމުގެ ކުރިން ކަލޭމެން ރާއްޖެ ފައްތާލާނެ. އަހަރަމެންގެ ޓުއާ އޮޕަރޭޓަރު 30 އަހަރު ވަންދެން ވިއްކަމުން އައި މަންޒިލުތަކުގެ ލިސްޓުން ރާއްޖެ އުނިކޮށްފަ، ކްލަޔަންޓުން ގެންދާނީ މިއަށް ވުރެ ފަސޭހެ، އަދި އަގުހެޔޮ މަންޒިލުތަކަށް،" މޭރީ ކިޔާ މީހަކު ބުންޏެވެ.
ވެބިނާގައި ބައިވެރިންގެ ތެރެއިން، ޓެކްސް ދައްކަން ދެކޮޅު ނުހަދާ ބައިވެރިން ވަނީ މިހާ ކުރު މުއްދަތެއް ދީފައި މިކަން ކުރާތީ ހިތްހަމަނުޖެހުން ފާޅުކޮށްފަ އެވެ. މިކަމަށް ތާއިދުކޮށް ވާހަކަ ދެއްކި ޔޫރަޕުގެ ބައެއް ޓުވާ އޮޕަރޭޓަރުން ބުނީ، ޔޫރަޕުގެ ގާނޫނުތައް ހުންނަ ގޮތުުން ވިއްކާފައި ހުރި ބުކިންތަކަށް އިތުރަށް ފައިސާ ނެގުން މަނާ ކަމަށެވެ. މިހެން ކަމުން މި ފައިސާ ދައްކަން ޖެހޭނީ އެ މީހުންގެ ޖީބުން ކަމަށް އެ މީހުން ބުންޏެވެ.
ޑެސްޓިނޭޝަން ޕްރިންސިޕަލްއަށް ބަދަލުކުރާ މައްސަލައިގައި މީގެ ކުރިން ރާއްޖޭގެ ރިސޯޓު ވިޔަފާރިތައް ތަމްސީލުކުރާ މޯލްޑިވްސް އެސޯސިއޭޝަން އޮފް ޓޫރިޒަމް އިންޑަސްޓްރީސް (މަޓީ) އާއި ބޭރުގެ ޓުއާ އޮޕަރޭޓަރުންނާއި ޓްރެވަލް އެޖެންޓުންގެ ޖަމިއްޔާތަކުން ވަނީ ކަންބޮޑުވުން ފާޅުކޮށްފަ އެވެ. ބައެއް ވިޔަފާރިތަކުން ބުނަނީ ޓޫރިޒަމަށް ޕްރެޝަރު ބޮޑު ދަނޑިވަޅެއްގައި، އިތުރު ގޮންޖެހުންތަކާ ކުރިމަތިލާން ޖެހި، ވިޔަފާރިއަށް އަސަރު ކުރާށެވެ.
