ރިސޯޓުތަކަށް ލިބޭ އާމްދަނީގެ 40 ޕަސަންޓު މާރުކުރަން ޖެހޭތީ ޔޫރަޕްގެ ބޮޑެތި ޓުވާ އޮޕަރޭޓަރުންނާއި ވިޔަފާރިވެރިން ގުޅައި ކަންބޮޑުވުންތައް ހިއްސާކުރަމުންދާ ކަމަށް އެމްޑީޕީގެ ޗެއާޕާސަން، ކުރީގެ ރައީސް މުހައްމަދު ނަޝީދު މިއަދު ވިދާޅުވެއްޖެ އެވެ.
ނަޝީދު އެކްސް ގައި ވިދާޅުވީ 40 ޕަސަންޓު މާރުކުރަން ޖެހެމުން ޔޫރަޕްގެ ޓުވާ އޮޕަރޭޓަރުން ކަންބޮޑުވުން ފާޅުކުރަނީ ހަރަދު ހިނގާފައި، ލޯނަށް ކަނޑާފައި ޑިވިޑެންޑަށް އެކަށީގެންވާ މިންވަރެއް ނުލިބޭތީ ކަމަށެވެ.
"ޔޫރަޕްގެ ބޮޑެތި ޓުއާ އޮޕަރޭޓަރުންނާއި ވިޔަފާރިވެރިން އަޅުގަނޑަށް އެބަ ގުޅާ. އެބޭފުޅުންގެ ކަންބޮޑުވުމަކީ 40 ޕަސަންޓު މާރުކުރަން ޖެހުމުން ހަރަދު ހިނގާފައި، ލޯނަށް ކަނޑާފައި ޑިވިޑެންޑް އެކަށީގެންވާ މިންވަރަށް ނެތުން،" ނަޝީދު ވިދާޅުވި އެވެ.
މިހާރު ވެސް ޔޫރަޕްގެ ޓުއާ އޮޕަރޭޓަރުންނާއި ވިޔަފާރިތަކުން ޖީއެސްޓީގެ ގޮތުގައި ޔޫރަޕަށް 20 ޕަސެންޓު ދައްކާކަން ފާހަގަކުރައްވާ ނަޝީދު ވިދާޅުވީ މީރާގެ އިތުރުން ރާއްޖެއަށް އިތުރު ޓެކްސް ދެއްކުމަކީ ނުކުޅަދާނެ ކަމެއް ކަމަށެވެ.
މީގެއިތުރުން ނަޝީދު ވިދާޅުވީ ޓުއާ އޮޕަރޭޓަރުންނާއި ވިޔަފާރިތަކުގެ މި ކަންބޮޑުވުންތަކަށް ހައްލު ނުލިބޭއިރު، އެކަން ހައްލުނުވުމަކީ ރާއްޖެ ބަނގުރޫޓުވުމުގެ ތުންފަތި ކަމަށެވެ.
ރިސޯޓުތަކަށް ލިބޭ އާމްދަނީގެ 40 ޕަސެންޓު ދިވެހި ރުފިޔާއަށް މާރުކުރަން މަޖުބޫރު ކުރުމުން ރިސޯޓުތައް ބަނގުރޫޓުވެ، މަސައްކަތްތެރިން މަގުމަތިވެދާނެ ކަމަށް ނަޝީދު ކުރިން ވިދާޅުވެފައިވެ އެވެ. އެގޮތުން އޭގެ ސަބަބުން އިންވެސްޓަރުންގެ އިތުބާރު ގެއްލޭ ކަމަށްވެސް އެމަނިކުފާނު ކުރިން ވިދާޅުވި އެވެ.
ބޭރު ފައިސާގެ ގާނޫނަށް އެންމެ ފަހުން ގެނައި ބަދަލާއެކު މި މަހުގެ ތެރޭގައި ރިސޯޓުތަކާއި އެ ގާނޫނުގެ ކެޓެގަރީ "އޭ" ގައި ހިމެނޭ އެހެން ވިޔަފާރިތަކަށް ލިބޭ ބޭރު ފައިސާގެ އާމްދަނީގެ 40 ޕަސެންޓު އަންނަ މަހުގެ ތެރޭގައި ރާއްޖޭގެ ބޭންކަކަށް މާރުކުރަން ޖެހޭނެ އެވެ.
މި ބަދަލުތަކާ ގުޅިގެން މޯލްޑިވްސް އެސޯސިއޭޝަން އޮފް ޓޫރިޒަމް އިންޑަސްޓްރީސް (މަޓީ) އިން ވަނީ ރިސޯޓުތަކުން 40 ޕަސަންޓު މާރުކުރަން ޖެހުމަކީ ކުރެވޭނެ ކަމެއް ނޫން ކަމަށް ކުރިން ބުނެފަ އެވެ. އެކަމަކު ރައީސް މުހައްމަދު މުއިއްޒު ވިދާޅުވަނީ އެއީ ރިސޯޓުތަކަށް ކުރެވޭނެ ކަމެއް ކަމަށާއި އެ ނިންމުންތައް ނިންމީ ދިރާސާތަކެއް ކުރުމަށްފަހު ކަމަށެވެ.
