މޯލްޑިވްސް ޓުއަރިޒަމް ޑިވެލޮޕްމަންޓް ކޯޕަރޭޝަންހެ ހިއްސާއަކަށް ބައި ރުފިޔާ ބަހަން އެ ކޯޕަރޭޝަނުގެ އަހަރީ އާންމު ޖަލްސާގައި މިރޭ ފާސްކޮށްފި އެވެ.
އެމްޓީޑީސީގެ 34،087،354 ހިއްސާ އާންމުންނާއި ސަރުކާރުގެ އަތުގައި އޮވެ އެވެ. އެއީ އާންމުންގެ 18،428،278 (53 ޕަސެންޓް) އާއި ދިވެހި ސަރުކާރުގެ 15،659،076 (47 ޕަސެންޓް) ހިއްސާ އެވެ.
އެހެންކަމުން ހިއްސާއަށް ދޫކުރާ ޑިވިޑެންޑު ފައިސާގެ ގޮތުގައި މިފަހަރު 17،043،677 ރުފިޔާ އެމްޓީޑީސީ އިން ދޫކުރާނެ އެވެ. މިދިޔަ އަހަރު ވެސް ހިއްސާއަކަށް ދޫކުރީ ބައި ރުފިޔާ އެވެ. އޭގެ ކުރިން 60 ލާރި ވެސް ދޫކޮށްފައިވެ އެވެ.
ރޭ ބޭއްވި އަހަރީ އާންމު ޖަލްސާގައި، އާންމު ހިއްސާދާރުން ތަމްސީލު ކުރާނެ ފަސް މެންބަރަކު ވަނީ ހޮވައިފަ އެވެ. އެއީ ކުރީގެ ޕްރޮސެކިއުޓާ ޖެނެރަލް އަހުމަދު މުއިއްޒު އާއި އައިޝަތު ލީޒާ އާއި އައިމިނަތު އަޒްލިފާ އާއި މިންނާ ރަޝީދު އަދި އިބްރާހިލް ލަތީފް އެވެ.
ސްޓޮކް އެކްސްޗޭންޖުގައި އެމްޓީޑީސީގެ ހިއްސާއެއް މިވަގުތު ވިކެނީ 13.70 ރުފިޔާ އާއި 14.76 ރުފިޔާއާ ދެމެދުގެ އަގެއްގަ އެވެ. އެމްޓީޑީސީގެ ހިއްސާގެ ސްޓްރަކްޗާއަށް ބަދަލުތަކެއް ގެންނަން އުޅޭކަމުގެ އަޑު މިފަހުން ފެތުރުމުން ހިއްސާއެއްގެ އަގު ދެ ރުފިޔާވަރު އުފުލުނެވެ. އެކަމަކު، އަނެއްކާ ވެސް އަގު ދަނީ މަޑުމަޑުން ތިރިވަމުންނެވެ.
އެމްޓީޑީސީ އިން އުޅެނީ މަގުއްދުވާގެ ހެޑްލީސް، އެ ރަށުގައި ރިސޯޓު ހިންގާ ތުރުކީގެ އަޔާޑާ ކުންފުންޏަށް އެންމެ 1.5 މިލިއަން ޑޮލަރަށް ވިއްކާލާށެވެ. އެ ރަށުގެ ލީސް 2031 އަށް ހަމަވާނެ އެވެ. ލީސް ވިއްކާލައިފި ނަމަ، 20 މިލިއަން ޑޮލަރުގެ ގެއްލުމެއް ކުންފުންޏަށް ލިބޭނެ އެވެ.
އެ މުއާމަލާތަށް މަގުފަހި ކުރުމަށްޓަކައި އެމްޓީޑީސީގެ ޑިރެކްޓަރުންގެ ބޯޑުން ވަނީ ރައިޓްސް އިޝޫއަކަށް ގޮސް، ކުންފުނީގެ މިހާރުގެ ހިއްސާދާރުންނަށް އިތުރު ހިއްސާ އަގުހެޔޮކޮށް ގަތުމުގެ ފުރުސަތު ހުޅުވާލާށެވެ. ރައިޓްސް އިޝޫއަކަށް ގޮސް އިތުރު ހިއްސާ ވިއްކުމުން ސަރުކާރަށް މެޖޯރިޓީ ހިއްސާ ގަތުމުގެ ފުރުސަތެއް އޮވެދާނެ އެވެ. އިތުރު ކުރާ ހިއްސާ މިހާރުގެ ހިއްސާދާރުން ނުގަނެފި ނަމަ އެ ފުރުސަތު ދެން ލިބޭނީ ސަރުކާރަށެވެ.
