އަޔާޑާ ރިސޯޓު ހިންގާ ގދ. މަގުއްދުވާގެ ހެޑްލީސް ނުއަގުގައި ވިއްކާލުމުގެ ޑީލަށް މަގުފަހި ކުރުމަށްޓަކައި މޯލްޑިވްސް ޓުއަރިޒަމް ޑިވެލޮޕްމަންޓް ކޯޕަރޭޝަންގެ އިތުރު ހިއްސާ ވިއްކަން އެ ކުންފުނިން އިއްޔެ ނިންމައިފި އެވެ.
ކުންފުނީގެ ޑިރެކްޓަރުންގެ ބޯޑުން ނިންމީ ރައިޓްސް އިޝޫއަކަށް ގޮސް، ކުންފުނީގެ މިހާރުގެ ހިއްސާ ދާރުންނަށް އިތުރު ހިއްސާ އަގުހެޔޮކޮށް ގަތުމުގެ ފުރުސަތު ހުޅުވާލާށެވެ. ކުންފުނީގެ ހިއްސާގެ އޮނިގަނޑަށް އެފަދަ ބޮޑު ބަދަލެއް ގެންނަން ފާސްވީ ބޯޑުގައި ތިއްބަވާ ނުވަ މެންބަރުންގެ ތެރެއިން އަށް މެންބަރުންގެ ވޯޓުންނެވެ.
ސަރުކާރުގެ އަތުގައި އޮންނަނީ އެމްޓީޑީސީގެ 47 ޕަސެންޓު ހިއްސާ އެވެ. ބާކީ 53 ޕަސެންޓު ހިއްސާއަކީ އާންމުންނަށް ވިއްކާފައިވާ ހިއްސާ އެވެ. ރައިޓްސް އިޝޫއަކަށް ގޮސް އިތުރު ހިއްސާ ވިއްކުމުން ސަރުކާރަށް މެޖޯރިޓީ ހިއްސާ ގަތުމުގެ ފުރުސަތެއް އޮވެދާނެ އެވެ. އިތުރު ކުރާ ހިއްސާ މިހާރުގެ ހިއްސާދާރުން ނުގަނެފި ނަމަ އެ ފުރުސަތު ދެން ލިބޭނީ ސަރުކާރަށެވެ.
މަގުއްދުވާގެ ހެޑް ލީސް ހޯލްޑަރަކީ އެމްޓީޑީސީ އެވެ. ލީސްގެ މުއްދަތު ހަމަވާނީ 2031 އަށެވެ. އެމްޓީޑީސީ އިން އުޅެނީ ރަށުގެ ހެޑް ލީސް އަޔާޑާ ހިންގާ އަހްމެޓް އައިޑެނިޒް ކުންފުންޏަށް އެންމެ 1.5 މިލިއަން ޑޮލަރަށް ވިއްކާލާށެވެ.
އެކަމަކު، އަޔާޑާ އާއި އެމްޓީޑީސީއާ ހަދާފައިވާ އެއްބަސްވުމުގައިވާ ގޮތުން، ބާކީ އޮތް މުއްދަތުގައި ކޮންމެ އަހަރަކު ހަތަރު މިލިއަނެއްހާ ޑޮލަރު ކުލީގެ ގޮތުގައި ދައްކަންޖެހެ އެވެ. އެހެންކަމުން ލީސް ވިއްކާލަން މި އުޅެނީ ކުންފުންޏަށް 20 މިލިއަން ޑޮލަރުގެ ގެއްލުމެއް ލިބޭ ގޮތަށެވެ.
އެމްޓީޑީސީ 2006 ގައި އުފެއްދުމަށް ފަހު އެ ކުންފުނީގެ ހިއްސާއެއް ވިއްކީ 100ރ. މަގުންނެވެ. މިހާރު އެ ހިއްސާތަކުގެ މޫނުމަތީ އަގު އުޅެނީ 12ރ. އާއި 15ރ. އާ ދެމެދުގެ އަގެއްގަ އެވެ. މި ކުންފުންޏަކީ ގިނަ އަހަރުތަކެއް ވަންދެން ގެއްލުމުގައި ހިންގުމަށް ފަހު މި ފަހަކަށް އައިސް ފައިދާ ވާން ފެށި ކުންފުންޏެކެވެ.
އެމްޓީޑީސީއަށް މި ވަގުތު އާމްދަނީ ލިބޭ ޕްރޮޕަޓީތަކުގެ ތެރޭގައި ހިމެނެނީ މަގުއްދުވާގެ އިތުރުން އަނަންތާރާ ކިހަވައް ވިލާސް ހިނގާ ބ. ކިހަވައް ހުރަވަޅި އެވެ. އެ ކުންފުނިން މި ވަގުތު ހިންގަމުން އަންނަ ޕްރޮޖެކްޓުތަކުގެ ތެރޭގައި ބީއެމްއެލްއިން ލޯނެއް ނަގައިގެން ހދ. ނާގޮއްޓާއި، ހުޅުމާލޭގައި ތަރަައްގީކުރަމުން އަންނަ އޮފީސް އިމާރާތް ހިމެނެ އެވެ.
