ރިސޯޓުތައް ތަރައްގީކުރަން އުފައްދާފައިވާ މޯލްޑިވްސް ޓޫރިޒަމް ޑިވެލޮޕްމަންޓް ކޯޕަރޭޝަން (އެމްޓީޑީސީ) ގެ ދަށުގައި ހުރި އެއްވެސް ރަށެއް ވިއްކާލަން ނުޅާ ކަމަށް އެ ކުންފުނިން މިއަދު ބުނެފި އެވެ.
އެމްޓީޑީސީން ނެރުނު ބަޔާނެއްގައި މިހެން ބުނީ އެ ކުންފުނީގެ ދަށުގައި އޮންނަ ގދ. މަގުއްދުވާގެ ހެޑްލީސް ވިއްކާލަން އުޅޭ ކަމަށް މި ނޫސް ހިމެނޭހެން މީޑިއާތަކުން ރިޕޯޓުކޮށްފައިވާ ހަބަރުތައް ދޮގުކުރަމުންނެވެ.
އެމްޓީޑީސީން ބުނާ ގޮތުގައި މަގުއްދުވާގެ އިތުރުން އެ ކުންފުންޏަށް ކުއްޔަށް ދޫކޮށްފައިވާ ހދ. ނާގޮށި އަދި ބ. ކިހަވައްހުރަވަޅި ހިމެނޭހެން، ތިން ރަށުގެ ހެޑްލީސް ނުަވަތަ ހެޑްލީސްއާ ވިއްކާލަން އެ ކުންފުނިން ނުނިންމަ އެވެ. އަދި އެފަދަ ކަމަކާ ގުޅޭ އެއްވެސް މަޝްވަރާއެއް ވެސް ނުހިނގާ ކަމުގެ ޔަގީންކަން އެ ކުންފުނިން ދިނެވެ.
މި މައްސަލައިގައި އެމްޓީޑީސީން ވަނީ ގާނޫނުތަކާއި ގަވާއިދުތަކާއި ލިސްޓިން ރޫލްސްގައި ބަޔާންކުރާ ފަދައިން ހާމަ ކުރަން ޖެހޭ، އެންމެހާ މައުލޫމާތު ހާމަކުރަމުންދާނެ ކަމަށް ބުނެފަ އެވެ. އަދި އެ ކުންފުނިން ހިންގާ ޕްރޮޖެކްޓުތަކާއި، މުއާމަލާތްތަކާ ގުޅޭ ގޮތުން އެ ކުންފުނިން ރަސްމީކޮށް ހާމަކުރާ ކަންކަމަށް ބަރޯސާވާން ވެސް ބަޔާނުގައި ބުންޏެވެ.
މަގުއްދުވާއަކީ 2006 އިން ފެށިގެން 25 އަހަރުގެ މުއްދަތަކަށް އެމްޑީޓީސީއަށް ކުއްޔަށްދޫކޮށްފައިވާ ރަށެކެވެ. އެ ކުންފުނިން އޮންނަނީ މި ރަށް ތުރުކީގެ އަހުމެޓް އައިޑެނިޒް ކުންފުންޏަށް ސަބްލީސްކޮށްފަ އެވެ.
އައިޑެނިޒް ކުންފުނިން މި ރަށް ފަސް ތަރީގެ ފެންވަރުގައި ތަރައްގީކޮށް "އަޔާޑާ މޯލްޑިވްސް" ގެ ނަމުގައި އޮޕަރޭޓުކުރަން ފެށީ 2011 ގައި އެވެ.
އެމްޑީޓީސީ އާއި އައިޑެނިޒް ކުންފުންޏާ ދެމެދު ސޮއިކޮށްފައިވާ ސަބްލީސް އެއްބަސްވުމުގެ ދަށުން ރިސޯޓުގެ ސަބްލީސް ކުއްޔަކީ ސޮއިކުރާއިރުން ފެށިގެން ބޮޑުވަމުން ގޮސް، ކޮންމެ ކުއާޓަރެއްގައި 1.2 މިލިއަން ޑޮލަރެވެ.
މި ސަބްލީސް އެއްބަސްވުމުގެ މުއްދަތު ހަމަވާ ގޮތަށް އޮތީ ހެޑްލިސް އެއްބަސްވުން ހަމަވާ 2031 ގައި އެވެ. ނަމަވެސް މި ރިސޯޓު ހިންގާ ތުރުކީ ކުންފުނިން ބޭނުންވީ އެ ތާރީހުގެ ކުރިން ހެޑްލީސް އެ ކުންފުނީގެ ނަންމައްޗަށް ބަދަލުކުރާށެވެ.
މަގުއްދުވާގެ ހެޑްލީސް ވިއްކާލަން އުޅޭ ކަމަށް އަދަދު ނޫހުން ޖެހި ހަބަރުގައި ވެސް ރިޕޯޓުކުރީ، އެމްޓީޑީސީގެ މެނޭޖުމަންޓުން މިކަމާ ދެކޮޅު ހަދާ، ރަށުގެ ހެޑްލީސް ވިއްކާނުލާނެ ބުނެފައިވާ ކަމަށެވެ.
