ޑާކް މެޓާ އާއި، ބްލެކް ހޯލްތަކުގެ އިތުރުން ކާއިނާތުގެ އެހެނިހެން ސިއްރުތައް ހޯދުމުގެ މިޝަނެއްގައި، ނާސާގެ ވަރުގަދަ އާ ޓެލެސްކޯޕް ފްލޮރިޑާގައި ހުންނަ ލޯންޗްޕެޑުން ޖައްވަށް ފޮނުވައިފި އެވެ.
ނާސާއިން ބުނާ ގޮތުގައި "ނޭންސީ ގްރޭސް ރޯމަން" ޓެލެސްކޯޕުން ފަޒާގެ ފުޅާ މަންޒަރުތައް ފެންނާނެ އެވެ. މި ޓެލެސްކޯޕްގެ "ފީލްޑް އޮފް ވިޝަން"، ހަބްލް އަދި ޖޭމްސް ވެބް ސްޕޭސް ޓެލެސްކޯޕަށް ވުރެ 100 ގުނަ ބޮޑެވެ.
މި މިޝަން ފެށެނީ ދުނިޔެއާ ގާތްގަނޑަކަށް އެއް މިލިއަން މޭލު ދުރުގައިވާ ހިސާބަކަށް ދިއުމަށް ކުރާ 100 ދުވަހުގެ ދަތުރަކުންނެވެ. އެ ހިސާބަށް ދިއުމަށްފަހު، އިރުގެ ނިޒާމުން ބޭރުގައިވާ ޕްލެނެޓްތައް ނުވަތަ "އެކްސޯޕްލެނެޓްސް" ތަކުގެ މައުލޫމާތު އެއްކުރަން މި ޓެލެސްކޯޕުން ފަށާނެ އެވެ.
ނާސާގެ އެޑްމިނިސްޓްރޭޓަރެއް ކަމަށްވާ ނިކީ ފޮކްސް ވިދާޅުވީ، ރޯމަން ޓެލެސްކޯޕުގެ ސަބަބުން ކާއިނާތާ މެދު އަޅުގަނޑުމެން ދެކޭ ގޮތް ބަދަލުވެގެންދާނެ ކަމަށެވެ.
އުދުއްސާލިތާ ގާތްގަނޑަކަށް 30 މިނެޓް ފަހުން، ރޯމަން ޓެލެސްކޯޕް ވަނީ އޭގެ ސްޕޭސް އެކްސް ރޮކެޓާ ވަކިވެފައެވެ. މިހާރު އެ ޓެލެސްކޯޕް ދަތުރުކުރަމުންދަނީ ދުނިޔެއާ އެއް މިލިއަން މޭލު ދުރުގައިވާ އޭގެ އޯބިޓިން ޕޮއިންޓަށެވެ.
އެމެރިކާގެ ރައީސް ޑޮނަލްޑް ޓްރަމްޕް ވަނީ މި ޕްރޮޖެކްޓްގައި މަސައްކަތްކުރާ ސައިންސްވެރިންނަށް މަރުހަބާ ދެންނެވުމަށް ނާސާގެ ނޫސްވެރިންގެ ބައްދަލުވުމަށް ފޯނުން ގުޅުއްވާފަ އެވެ.
ދެހާސް އެކާވީސް ވަނަ އަހަރުން ފެށިގެން ނާސާގެ ޖޭމްސް ވެބް ސްޕޭސް ޓެލެސްކޯޕް ވެސް ދުނިޔެއާ އެއް މިލިއަން މޭލު ދުރުގައި އިރު ވަށައިގެން ބުރުޖަހަމުންދާއިރު، އޭގެ ފެންނަ ދާއިރާ ރޯމަން ޓެލެސްކޯޕާ އަޅާބަލާއިރު ކުޑަ އެވެ. އަދި 1990 ވަނަ އަހަރު ފޮނުވި ހަބްލް ސްޕޭސް ޓެލެސްކޯޕް ދަތުރުކުރަނީ ދުނިޔޭގެ ބިމުން ފެށިގެން ގާތްގަނޑަކަށް 300 މޭލު މަތީގަ އެވެ.
ރޯމަން ޓެލެސްކޯޕުން ކާއިނާތުގެ ދުރު ހިސާބުތައް ބަލަމުންދާއިރު، އަޅުގަނޑުމެންގެ އަމިއްލަ ގެލެކްސީގެ ތެރެއިން ވެސް އެތައް ހާސް އައު ދުނިޔެތަކެއް ފެންނާނެ ކަމަށް ސައިންސްވެރިން އުންމީދުކުރެ އެވެ.
މި ޓެލެސްކޯޕަށް ނަން ދީފައިވަނީ 1960 ގެ އަހަރުތަކުގައި ނާސާގެ ފުރަތަމަ ޗީފް އެސްޓްރޮނޮމާ އަދި އެ އިދާރާގެ ފުރަތަމަ އަންހެން އެގްޒެކެޓިވް، ފިޒިސިސްޓް ނޭންސީ ގްރޭސް ރޯމަންގެ ނަމުންނެވެ.
