ޔޫރަޕިއަން ޔޫނިއަން (އީޔޫ) އާ ގުޅުމަށް ކުރަމުންދިޔަ މަޝްވަރާތައް މެދުކަނޑާލިތާ 13 އަހަރު ފަހުން، އެ މަޝްވަރާތައް އަލުން ފެށުމާ ދެކޮޅަށް އައިސްލޭންޑުގެ ރައްޔިތުން ވޯޓު ދީފި އެވެ.
އައިސްލޭންޑުގެ ދައުލަތުގެ މީޑިއާ، އާރުޔޫވީ އިން ރިޕޯޓުކޮށްފައިވާ ގޮތުގައި، ވޯޓުލީ 225,031 މީހުންގެ ތެރެއިން 52.8 އިންސައްތަ މީހުން ވަނީ ސަރުކާރުގެ އެ ހުށަހެޅުމާ ދެކޮޅަށް ވޯޓު ދީފަ އެވެ. އީޔޫއާ ގުޅުމަށް ތާއީދުކޮށް ވޯޓު ދީފައިވަނީ 47.2 އިންސައްތަ މީހުންނެވެ. މި ދެ ފަރާތުގެ މެދުގައި ހުރި ފަރަގަކީ ގާތްގަނޑަކަށް 12,600 ވޯޓެވެ.
ބޮޑުވަޒީރު ކްރިސްޓްރޫން ފްރޮސްޓަޑޯޓިރްގެ ސަރުކާރުން ކުރިން ނިންމާފައި އޮތީ 2027 ވަނަ އަހަރުގެ ކުރިން މިކަމާ ގުޅޭ ފެންނަ ނުފެންނަ ވޯޓެއް ނެގުމަށެވެ. ނަމަވެސް، އެމެރިކާގެ ރައީސް ޑޮނަލްޑް ޓްރަމްޕް ގްރީންލޭންޑާ މެދު ދެއްވަމުން ގެންދަވާ އިންޒާރުތަކާ ގުޅިގެން އުފެދިފައިވާ ބައިނަލްއަގުވާމީ ނުތަނަވަސްކަމުގެ ސަބަބުން، ސަރުކާރުން ވަނީ މި ވޯޓުލުން އަވަސްކޮށްފަ އެވެ.
އެހެންނަމަވެސް، ގާތްގަނޑަކަށް 400,000 މީހުންގެ އާބާދީއެއް އޮންނަ މި ގައުމުގައި މިކަމާ ގުޅޭގޮތުން ކުރެވުނު ބަހުސްތައް ބޮޑަށް އަމާޒުވެފައި އޮތީ ސަލާމަތީ ކަންކަމަށްވުރެ ބޮޑަށް އެ ގައުމުގެ މަސްވެރިކަމުގެ ސިނާއަތަށެވެ.
ވޯޓުލުމުގެ ހައްގު ލިބިގެންވާ 270,000 މީހުން ތިބިއިރު، މި ފަހަރުގެ ވޯޓުގައި 82.5 އިންސައްތަ މީހުން ބައިވެރިވެފައިވާ ކަމަށް އާރުޔޫވީން ރިޕޯޓުކުރެ އެވެ. މިއީ 2009 ވަނަ އަހަރަށްފަހު އައިސްލޭންޑުގައި ބޭއްވި އިންތިހާބެއްގައި އެންމެ ގިނަ އަދަދަކަށް މީހުން ވޯޓުލާން ނުކުތް ފަހަރެވެ.
އައިސްލޭންޑަކީ މިހާރުވެސް އީޔޫގެ ސިންގަލް މާކެޓާއި ޝެންގެން ޒޯންގެ ބައެކެވެ. ނަމަވެސް، އީޔޫގެ ފުރިހަމަ މެންބަރަކަށް ވެއްޖެނަމަ އެ ގައުމު ކަސްޓަމްސް ޔޫނިއަންގެ ތެރެއަށް ވަދެ، ޔޫރޯ ފައިސާ ބޭނުންކުރަން ޖެހޭނެ އެވެ.
އައިސްލޭންޑުން އީޔޫއާ ގުޅުމަށް އެންމެ ފުރަތަމަ ހުށަހެޅީ 2008 ވަނަ އަހަރު ކުރިމަތިވި މާލީ ކާރިސާއާ ގުޅިގެން އެ ގައުމުގެ ބޭންކިން ނިޒާމު އިނދަޖެހުމުން، 2009 ވަނަ އަހަރުގަ އެވެ.
އީޔޫއާ ގުޅުމުގެ މަޝްވަރާތައް ބާރުމިނުގައި ކުރިއަށް ދަނިކޮށް، 2013 ވަނަ އަހަރު އީޔޫއާ ގުޅުމާ ދެކޮޅު ސަރުކާރެއް ވެރިކަމަށް އައިސް އެ މަޝްވަރާތައް މެދުކަނޑާލި އެވެ. އެ ފަހަރުވެސް އަދި މިހާރުވެސް މިކަމުގައި އޮތް އެންމެ ބޮޑު ހުރަހަކީ މަސްވެރިކަމުގެ ހައްގުތަކުގެ މައްސަލަ އެވެ.
އައިސްލޭންޑުން ބޭރުކުރާ މުދަލުގެ ގާތްގަނޑަކަށް 40 އިންސައްތަ ހިއްސާކުރަނީ މަސްވެރިކަމާއި ކަނޑުގެ ވަސީލަތްތަކުގެ ސިނާއަތުންނެވެ. އީޔޫއާ ގުޅުމާ ދެކޮޅަށް ވޯޓު ދިން ގިނަ ބަޔަކު ބިރުގަންނަނީ، އީޔޫގެ މަސްވެރިކަމާ ބެހޭ އާންމު ސިޔާސަތުގެ ދަށުން، އައިސްލޭންޑުގެ މުއްސަނދި މަސްކަނޑުތަކުގެ ކޮންޓްރޯލް އެ ގައުމަށް ގެއްލިދާނެތީ އެވެ.
