އެމެރިކާގެ ރައީސް ޑޮނަލްޑް ޓްރަމްޕްގެ ސިފަޔަށް ހަދާފައިވާ، ފުރާނައަށް ނުރައްކާވެދާނެ ފަދަ "އެކްސްޓަސީ" ގުޅަތަކެއް ދައުރުވަމުންދާތީ، ނެދަލޭންޑްސްގައި ރަތް އެލާޓެއް ނެރެފި އެވެ.
ޔޫޓްރެކްޓްގައި ހުންނަ ޓްރިމްބޯސް އިންސްޓިޓިއުޓުން ބުނި ގޮތުގައި، މިދިޔަ އޯގަސްޓް މަހުގެ ތެރޭގައި އެކި ޓެސްޓިން ސެންޓަރުތަކަށް މިފަދަ ބައެއް ގުޅަތައް ލިބިފައިވެ އެވެ. އެ ތަކެތި ތަހުލީލު ކުރިއިރު، އޭގައި "ޕީއެމްއެމްއޭ" ކިޔާ ކެމިކަލެއް ވަރަށް މަތީ މިންވަރަކަށް ހުރިކަން ވަނީ ފާހަގަކުރެވިފަ އެވެ.
އެ އިންސްޓިޓިއުޓުން ނެރުނު އިންޒާރުގައި، އެއްވެސް ހާލެއްގައި މި ގުޅަ ބޭނުން ނުކުރުމަށް ވަނީ އިލްތިމާސްކޮށްފަ އެވެ. އަދި މި ބޭހުގެ ސަބަބުން ހަށިގަނޑު މާބޮޑަށް ހޫނުވެ، ފުރާނައަށް ނުރައްކާވާ ފަދަ ހާލަތެއް މެދުވެރިވެދާނެ ކަމަށް ވެސް އެ މަރުކަޒުން އިންޒާރު ދީފައިވެ އެވެ.
އެ މަރުކަޒުން ވަނީ އެ ގުޅަތަކުގެ ފޮޓޯތައް ވެސް އާންމުކޮށްފަ އެވެ. އެ ގުޅަތަކުގެ އެއްފަރާތުގައި ޑޮނަލްޑް ޓްރަމްޕްގެ މޫނު ކުރަހާފައިވާއިރު، އަނެއް ފަރާތުގައި ޖަހާފައިވަނީ "Trump" އަދި "NL" މި ދެ ލަފުޒެވެ.
ޕީއެމްއެމްއޭ ނުވަތަ "ޕެރާ-މެތޮކްސީމެތަމްފެޓަމިން" އަކީ އާންމުކޮށް އެކްސްޓަސީ ގުޅަތަކުގައި ހުންނަ މާއްދާއެއް ކަމަށްވާ "އެމްޑީއެމްއޭ" އާ އެއްގޮތް ސިފަތަކެއް ހުންނަ މާއްދާއެކެވެ.
ނަމަވެސް، މި މާއްދާގެ ސަބަބުން ހަށިގަނޑަށް ކުރާ އަސަރު ފެންނަން ގިނަ ވަގުތު ނަގާ ކަމަށާއި، އަދި ހަށިގަނޑު ހީވާގިކޮށްދޭ އަސަރު ގިނަ ފަހަރަށް ނުފެންނަ ކަމަށް އެ ސިއްހީ މަރުކަޒުން ބުންޏެވެ. މީގެ ސަބަބުން، ބޭނުންކުރާ މީހާއަށް އަސަރު ނުކުރާ ކަމަށް ހީވެ، އިތުރަށް ބޭނުންކުރެވި "އޯވަޑޯޒް" ވުމުގެ ފުރުސަތު ބޮޑުވާ ކަމަށް ވެސް ބުނެފައިވެ އެވެ.
މި ގުޅަ ބޭނުންކުރާ މީހުންނަށް، ބޭނުންކުރާ ފަހުން އެތައް ގަޑިއިރެއް ފަހުން މޭނުބައިކުރުމާއި، ހިތުގެ ވިންދު އަވަސްވުމާއި، އަދި ފިޓުޖެހުން ފަދަ އަލާމާތްތައް ފެނިދާނެ ކަމަށް އިންޒާރު ދީފައިވެ އެވެ.
ޓްރިމްބޯސް އިންސްޓިޓިއުޓްގެ ތަރުޖަމާނު އެނީކް ގްރޫތުހުއިސް އެސޯސިއޭޓެޑް ޕްރެސް (އޭޕީ) އަށް މައުލޫމާތު ދެއްވަމުން ވިދާޅުވީ، މިހާތަނަށް މި ގުޅަ ބޭނުންކޮށްގެން އެއްވެސް މީހަކު މަރުވި ކަމުގެ ނުވަތަ ސީރިއަސް ހާލަތެއް ކުރިމަތިވި ކަމުގެ ރިޕޯޓެއް ލިބިފައިނުވާ ކަމަށެވެ.
ނެދަލެންޑްސްގައި އެކްސްޓަސީ އުފެއްދުމާއި، ވިއްކުމާއި އަދި ބޭނުންކުރުމަކީ ގާނޫނީ ގޮތުން މަނާ ކަމެއް ނަމަވެސް، އެ ގައުމުގެ ސަރުކާރުން 2024 ވަނަ އަހަރު ނެރުނު ރިޕޯޓެއްގައި ބުނެފައިވަނީ، މިއީ އަދިވެސް ޕާޓީތަކުގައި ވަރަށް މަގުބޫލު މަސްތުވާއެއްޗެއް ކަމަށެވެ.
އެ ރިޕޯޓުގައި އިތުރަށް ބުނެފައިވާ ގޮތުގައި، 2022 ވަނަ އަހަރު ރެކޯޑް އަދަދަކަށް، 550،000 މީހުން މަދުވެގެން އެއްފަހަރު އެކްސްޓަސީ ބޭނުންކޮށްފައިވެ އެވެ.
ޑޮނަލްޑް ޓްރަމްޕްގެ ސިފަޔަށް އެކްސްޓަސީ ގުޅަ ތައްޔާރުކުރި މިއީ ފުރަތަމަ ފަހަރެއް ނޫނެވެ.
އެގޮތުން 2017 ވަނަ އަހަރު ޖަރުމަނުގެ ފުލުހުން ވަނީ އެމެރިކާގެ ރައީސް ސިފަވާ ގޮތަށް ހަދާފައިވާ، އޮރެންޖު ކުލައިގެ ގާތްގަނޑަކަށް 5،000 އެކްސްޓަސީ ގުޅަ އަތުލައިގެންފަ އެވެ. ފުލުހުން ގަބޫލުކުރާ ގޮތުގައި އެ ތަކެތި އިންޓަނެޓުގައި އިޝްތިހާރުކޮށްފައިވަނީ "ޓްރަމްޕް މޭކްސް ޕާޓީއިންގް ގްރޭޓް އެގެއިން" މި ޝިއާރުގެ ދަށުންނެވެ.
