އެމެރިކާގެ ރައީސް ޑޮނަލްޑް ޓްރަމްޕްގެ ސަރުކާރުން ވާތުފިޔައިގެ ހަރަކާތްތަކަށް ފިޔަވަޅު އެޅުމަށް ފަށާފައިވާ މަސައްކަތުގެ ތެރެއިން "ފަލަސްތީން އެކްޝަން" ގްރޫޕަކީ ޓެރަރިސްޓް ޖަމާއަތެއްގެ ގޮތުގައި ކަނޑައަޅައިފި އެވެ.
މި ނިންމުން ނިންމާފައި މިވަނީ، ވޮޝިންގްޓަނުން ބައިނަލްއަލްއަގުވާމީ ފެންވަރުގައި ޓެރަރިޒަމާ ދެކޮޅަށް ކުރާ މަސައްކަތްތައް، ހަރުކަށި ވާތުފިޔައިގެ ފިކުރުގެ ޓެރަރިޒަމަށް އަމާޒުކުރާނެ ކަމަށް އެމެރިކާގެ ސެކްރެޓަރީ އޮފް ސްޓޭޓް މާކޯ ރޫބިއޯ ވިދާޅުވެފައި ވަނިކޮށެވެ.
އެކަމާ ގުޅިގެން އެމެރިކާގެ ޑިމޮކްރެޓިކް ޕާޓީގެ މެންބަރުން ވަނީ ކަންބޮޑުވުން ފާޅުކޮށްފަ އެވެ. އެ ބޭފުޅުން ތުހުމަތު ކުރައްވާ ގޮތުގައި ޓްރަމްޕްގެ ސަރުކާރުން ދަނީ ޓެރަރިޒަމާ ދެކޮޅަށް ކުރާ މަސައްކަތްތައް ސިޔާސީކޮށް، އެހެނިހެން ހަރުކަށި ފިކުރުތަކުގެ ނުރައްކަލުން ސަލާމަތްވުމަށް ހުރި ވަސީލަތްތައް އެހެން ދިމަދިމާލަށް ބަދަލުކުރަމުންނެވެ.
ރިޔާސީ އިންތިޚާބުގެ ކެމްޕޭން ތެރޭގައި ޓްރަމްޕް ވަނީ "އެންޓިފާ" ހަރަކާތަށް ވަރަށް ބޮޑަށް ފާޑުވިދާޅުވެފަ އެވެ. އަދި ޓްރަމްޕްގެ އަރިސް ބޭފުޅެއް ކަމަށްވާ ކޮންޒަވޭޓިވް އެކްޓިވިސްޓް ޗާލީ ކާކް މިދިޔަ އަހަރު ބަޑިޖަހައި މަރާލުމާ ގުޅިގެން، ހަމަނުޖެހުން އުފައްދާ ކަމަށް އޭނާ ތުހުމަތު ކުރައްވާ ވާތުފިޔައިގެ ޖަމާއަތްތަކާ ދެކޮޅަށް ފިޔަވަޅު އަޅުއްވާނެ ކަމަށް ޓްރަމްޕް ވަނީ ވައުދުވެވަޑައިގެންފަ އެވެ.
