ފަލަސްތީނަށް ތާއީދުކޮށް ވާހަކަދައްކާ އަދި އިސްރާއީލަށް ފާޑުކިޔާ ބޭރު ގައުމުތަކުގެ ކިޔަވާކުދިންގެ ވިސާ ކެންސަލްކޮށް، އެ ކުދިން ޑީޕޯޓްކޮށްލުމަށް ރައީސް ޑޮނަލްޑް ޓްރަމްޕްގެ ސަރުކާރުން ބޭނުންކުރި ގާނޫނުތަކަކީ ގާނޫނުއަސާސީއާ ހިލާފު ގާނޫނުތަކެއް ކަމަށް އެމެރިކާގެ ފަނޑިޔާރަކު ހުކުރު ދުވަހު ކަނޑައަޅުއްވައިފި އެވެ.
ކެލިފޯނިއާގެ ސެން ހޯޒޭގެ ޔޫއެސް ޑިސްޓްރިކްޓް ފަނޑިޔާރު ނޮއެލް ވައިޒް ނެރުއްވި ހުކުމެއްގައި، އެމެރިކާގެ ސްޓޭޓް ޑިޕާޓްމަންޓާއި ޑިޕާޓްމަންޓް އޮފް ހޯމްލޭންޑް ސެކިއުރިޓީން ފެޑަރަލް އިމިގްރޭޝަން ގާނޫނުގެ މާއްދާތައް ބޭނުންކޮށްގެން، ސަރުކާރުން ހުއްޓުވަން ބޭނުންވާ ފިކުރުތައް ފާޅުކުރާ ބޭރު ގައުމުތަކުގެ މީހުން ޑީޕޯޓްކޮށްލުމަށް އަމާޒުކޮށްފައިވާތީ އެކަން ވަރަށް ބޮޑަށް ކުށްވެރިކުރެއްވި އެވެ.
ފަނޑިޔާރު ވިދާޅުވީ، ސަރުކާރަށާއި ސަރުކާރުގެ ވެރިންނަށް ފާޑުކިޔުމުގެ މިނިވަންކަން ހިމެނޭ ގޮތަށް، ހިޔާލުފާޅުކުރުމުގެ މިނިވަންކަމަކީ އެމެރިކާގެ ޑިމޮކްރެޓިކް ނިޒާމުގެ ވަރުގަދަކަން ހާމަކޮށްދޭ ހެއްކެއް ކަމަށެވެ.
"އަޅުގަނޑުމެންގެ މުޖުތަމައުގެ މެންބަރުން، އެއީ ރައްޔިތުން ކަމުގައި ވިޔަސް ނުވަތަ ބޭރު ގައުމުތަކުގެ މީހުން ކަމުގައި ވިޔަސް، ސަރުކާރުގެ ބަދަލުހިފުމަކަށް ބިރުން އަމިއްލައަށް ހިޔާލުފާޅުކުރުން ހުއްޓާލައި، ސަރުކާރުން ބޭނުންވާ ގޮތަށް 'އުޅެން' މަޖުބޫރުވުމަކީ އެ ވަރުގަދަކަން ކުޑަވެގެންދާ ކަމެއް،" ފަނޑިޔާރު ވިދާޅުވި އެވެ.
ފަނޑިޔާރު ވައިޒްގެ ހުކުމް ބިނާކޮށްފައިވަނީ 2025 ވަނަ އަހަރުގެ މާޗް މަހުން ފެށިގެން ޓްރަމްޕްގެ ސަރުކާރުން، ޔުނިވާސިޓީތަކުގައި ފަލަސްތީނަށް ތާއީދުކޮށް އަޑުއުފުލާ ބޭރުގެ ދަރިވަރުންގެ ވިސާ ކެންސަލްކޮށް ބަންދުކުރަން ފެށި ގޮތުގެ މައްޗަށެވެ. މި ސިޔާސަތުގެ ދަށުން އެންމެ ފުރަތަމަ ހައްޔަރުކުރީ ކޮލަމްބިއާ ޔުނިވާސިޓީގެ ގްރެޖުއޭޓް ދަރިވަރު މަހްމޫދު ހަލީލް އެވެ. އޭނާ ވަނީ ޑީޕޯޓްކޮށްލުން ހުއްޓުވުމަށް ވަކިން ކޯޓަށް މައްސަލައެއް ހުށަހަޅައިފަ އެވެ.
މި ހައްޔަރުކުރުންތަކާ ގުޅިގެން 2025 ވަނަ އަހަރުގެ އޮގަސްޓް މަހު ސްޓެންފޯޑް ޔުނިވާސިޓީގެ ދަރިވަރުންގެ ނޫސް "ދަ ސްޓެންފޯޑް ޑެއިލީ" އިން ވަނީ ދައުވާ އުފުލާފަ އެވެ. އެ ނޫހުން ތުހުމަތުކުރި ގޮތުގައި، ސްޓޫޑަންޓް ވިސާގައި ތިބި އެ ނޫހުގެ ބައެއް ލިޔުންތެރިން، ސަރުކާރުގެ ސިޔާސަތުތަކުގެ ސަބަބުން ފަލަސްތީނަށް ތާއީދުކޮށް ދަރިވަރުން ކުރާ މުޒާހަރާތަކާއި މެދުއިރުމަތީގެ ހަމަނުޖެހުންތަކާ ގުޅޭ ހަބަރުތައް ކަވަރުކުރުމުން ވަނީ ދުރުހެލިވެފަ އެވެ.
ނޫހުގެ ވަކީލުން ބަހުސްކުރި ގޮތުގައި، ދަރިވަރުންގެ ވިސާ ކެންސަލްކޮށް ޑީޕޯޓްކުރުމުގެ މަރުހަލާ ފެށުމަށް ސަރުކާރުން ބޭނުންކުރި "އިމިގްރޭޝަން އެންޑް ނޭޝަނަލިޓީ އެކްޓް" ގެ ދެ މާއްދާއަކީ، ގާނޫނުއަސާސީން ހިމާޔަތްކޮށްދީފައިވާ ހިޔާލުފާޅުކުރުމުގެ މިނިވަންކަމާ ގުޅޭ ފުރަތަމަ އަދި ފަސްވަނަ އިސްލާހާ ހިލާފު މާއްދާތަކެކެވެ.
އެ ގާނޫނުތަކުގެ ދަށުން، މީހެއްގެ އަމަލަކީ ބޭރު ގައުމުތަކާ ގުޅޭ ސިޔާސަތަކަށް ނުރައްކާވާ ކަމެއް ކަމަށް ސެކްރެޓަރީ އޮފް ސްޓޭޓް މާކޯ ރޫބިއޯ އަމިއްލައަށް ނިންމަވައިފި ނަމަ، ބޭރު ގައުމެއްގެ މީހަކު ޑީޕޯޓްކޮށްލުމުގެ ބާރު ލިބިދެ އެވެ. އަދި އޭނާ ބޭނުންވެއްޖެ ހިނދެއްގައި މީހެއްގެ ވިސާ ބާތިލްކުރުމުގެ އިހުތިޔާރު ވެސް އެ ގާނޫނުން ލިބިދެ އެވެ.
ފަނޑިޔާރު ވައިޒް ނޫހުގެ ދައުވާއަށް ތާއީދުކުރައްވަމުން ވިދާޅުވީ، ބޭރު ގައުމެއްގެ މީހަކު ފާޅުކުރާ ހިޔާލެއްގެ ސަބަބުން ވިސާ ކެންސަލްކޮށް ޑީޕޯޓްކުރަން ނިންމުމަކީ، އެ މީހަކު ގެންގުޅޭ ފިކުރަކަށް ނުވަތަ ދައްކާ ވާހަކައަކަށް ބަލައި ސަރުކާރުން އެ މީހަކާ މެދު ތަފާތުކުރުން ގެންގުޅުން ކަމަށެވެ.
މި ހުކުމަކީ މިދިޔަ އަހަރު ބޮސްޓަންގެ ޔޫއެސް ޑިސްޓްރިކްޓް ފަނޑިޔާރު ވިލިއަމް ޔަންގް ނެރުއްވި ހުކުމާ އެއްގޮތް ހުކުމެކެވެ. ފަނޑިޔާރު ޔަންގް ވެސް ވަނީ ފަލަސްތީނަށް ތާއީދުކުރާ ބޭރުގެ ދަރިވަރުންނާއި ޕްރޮފެސަރުންގެ ވިސާ ކެންސަލްކޮށް، ހައްޔަރުކޮށް އަދި ޑީޕޯޓްކުރުމުގެ ސިޔާސަތަކީ ގާނޫނުއަސާސީއާ ހިލާފު އަމަލެއް ކަމަށް ނިންމަވާފަ އެވެ.
