ވެނެޒުއޭލާގެ ތެލުގެ ރިޒާވުން 65 ބިލިއަން ފީފާ ތެޔޮ ކޮންޓްރޯލް ކުރުމަށް އެމެރިކާއިން އެ ގައުމާއެކު އެއްބަސްވުމަކަށް އައިސްފައިވާކަން ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ.
ހުކުރު ދުވަހުގެ ރޭ ސޯޝަލް މީޑިއާގައި ކުރެއްވި ޕޯސްޓެއްގައި ޓްރަމްޕް ވިދާޅުވީ މި ތާރީހީ އެއްބަސްވުމުގެ ސަބަބުން އެމެރިކާގެ ތެލުގެ ރިޒާވް ދެގުނައަށް ވުރެ އިތުރުވެ، ތެލުގެ ސަޕްލައި އިތުރުވެގެންދާނެ ކަމަށެވެ. އަދި މީގެ ސަބަބުން އެމެރިކާގައި ތެލުގެ އަގު ވަރަށް ބޮޑަށް ހެޔޮވެގެންދާނެ ކަމަށްވެސް ޓްރަމްޕް ވިދާޅުވި އެވެ.
މިއީ އެމެރިކާގެ ސެކްރެޓަރީ އޮފް ސްޓޭޓް މާކޯ ރޫބިއޯ އާއި ސެކްރެޓަރީ އޮފް ވޯ ޕީޓް ހެގްސެތު، ވެނެޒުއޭލާގެ ވަގުތީ ރައީސާ ޑެލްސީ ރޮޑްރިގޭޒްއާ ގުޅިގެން ކުރެއްވި މަސައްކަތުގެ ނަތީޖާއެއް ކަމަށް ޓްރަމްޕް ފާހަގަކުރެއްވި އެވެ. އަމިއްލަ ވިޔަފާރިތަކާ ގުޅިގެން ކުރިއަށްގެންދާ މި އެއްބަސްވުމުގެ ދަށުން، ވެނެޒުއޭލާގައި ހުރި 65 ބިލިއަނަށް ވުރެ ގިނަ ފީފާ ތެލުގެ ކޮންޓްރޯލް އެމެރިކާއަށް ލިބިގެންދާނެ އެވެ. ޓްރަމްޕް ވިދާޅުވި ގޮތުގައި މިއީ އެމެރިކާގެ ޓެކްސް ދައްކާ ރައްޔިތުންގެ އަތުން އެއްވެސް ހަރަދެއް ނުގޮސް ހޯދި ކާމިޔާބީއެކެވެ.
ވައިޓް ހައުސްގެ އޮފިޝަލަކު މައުލޫމާތު ދެއްވި ގޮތުގައި، މި އެއްބަސްވުމުގެ ދަށުން އަލަށް އުފައްދާ އަމިއްލަ ޖޮއިންޓް ވެންޗާ ކުންފުނީގެ 55 ޕަސެންޓު ކޮންޓްރޯލް ކުރާނީ އެމެރިކާއިންނެވެ. މި ކުންފުންޏަކީ އެމެރިކާ ސަރުކާރާއި ވެނެޒުއޭލާގެ އަމިއްލަ އޮޕަރޭޓަރެއް ގުޅިގެން ހިންގާ މަޝްރޫއެކެވެ. މި ކުންފުންޏަށް 100 އަހަރު ދުވަހަށް ތެޔޮ ނެގުމުގެ ހުއްދަ ދީފައިވެ އެވެ.
މި ކުންފުނިން ތެޔޮ އުފައްދަން ފެށުމުން، އެމެރިކާގެ އަސްކަރިއްޔާއަށް ބޭނުންވާ ތެޔޮ ފޯރުކޮށްދިނުމަށާއި އެމެރިކާގެ ސްޓްރެޓީޖިކް ޕެޓްރޯލިއަމް ރިޒާވް ފުރުމަށް މި ތެޔޮ ބޭނުންކުރެވޭނެ އެވެ.
އިރާން ހަނގުރާމައިގެ ސަބަބުން ދުނިޔޭގެ ތެލުގެ ސަޕްލައި އަށް ވަނީ ބުރޫއަރާފަ އެވެ. މީގެ ސަބަބުން އެމެރިކާގެ ކުއްލި ހާލަތްތަކުގައި ބޭނުންކުރާ ތެލުގެ ރިޒާވް ވަނީ 1980 ގެ އަހަރުތަކަށް ފަހު އެންމެ ބޮޑަށް ދަށަށް ގޮސްފަ އެވެ. ސެކްރެޓަރީ އޮފް ސްޓޭޓް މާކޯ ރޫބިއޯ ވިދާޅުވި ގޮތުގައި މި އެއްބަސްވުމަކީ އެމެރިކާ އާއި ވެނެޒުއޭލާގެ ރައްޔިތުންނަށް ލިބުނު ވަރަށް ބޮޑު ކާމިޔާބީއެކެވެ. މި މަޝްރޫއުގެ ސަބަބުން ވެނެޒުއޭލާއަށް 100 ބިލިއަން ޑޮލަރުގެ އިންވެސްޓްމަންޓް ލިބި، އެތައް ހާސް ވަޒީފާއެއް އުފެދި، އެ ގައުމުގެ އިގްތިސާދު އާރާސްތުކުރުމަށް މަގުފަހިވާނެ އެވެ.
ޓްރަމްޕްގެ މި ވާހަކައާ ގުޅިގެން ވެނެޒުއޭލާއިން އަދި ބަހެއް ނުބުނެ އެވެ.
