ބިދޭސީ މަސައްކަތްތެރިން ކެޓަގަރައިޒް ކޮށްފައިވާ ގޮތަށް ބޮޑެތި ބަދަލުތަކެއް ގެނައުމުން، ސިއްހީ ދާއިރާގައި މަސައްކަތް ކުރާ ވަރަށް ގިނަ ބިދޭސީންގެ "ޕްރޮފެޝަނަލް" ސްޓޭޓަސް ގެއްލިއްޖެ އެވެ.
ރާއްޖޭގައި މަސައްކަތް ކުރަން އަންނަ ބިދޭސީން ދެ ކެޓަގަރީއަކަށް ހޯމް މިނިސްޓްރީ އިން ބަހަ އެވެ. އެއީ ޕްރޮފެޝަނަލް އަދި ނޮން-ޕްރޮފެޝަނަލް ކެޓަގަރީ އެވެ. ޕްރޮފެޝަނަލް ކެޓަގަރީގައި މަސައްކަތް ކުރަން އަންނަ ބިދޭސީންނަށް، ޑިޕެންޑެންޓް ވިސާ ލިބުމުގެ އިތުރުން ރެމިޓެންސް ފޮނުވޭ މިންވަރު ވެސް އިތުރެވެ.
"އެކްސްޕަޓް ސިސްޓަމް އޮކިއުޕޭޝަން ކެޓަގަރައިޒޭޝަން" އަށް ގެނައި ބަދަލުގެ ސަބަބުން މެޑިކަލް ދާއިރާގައި މަސައްކަތް ކުރާ ޓެކްނީޝަނުން ވަނީ ޕްރޮފެޝަނަލް ކެޓަގަރީއިން ބޭރުވެފަ އެވެ. އެ ބަދަލުގެ ސަބަބުން ބިދޭސީ ސިއްހީ މަސައްކަތްތެރިންނަށް ނުހަނު ބޮޑު ގެއްލުމަކާ ކުރިމަތިލާންޖެހިފައިވާ ކަމަށް މޯލްޑިވްސް ހެލްތު ޕްރޮފެޝަނަލްސް ޔޫނިއަން އިން ބުނެ އެވެ،
"ވަރަށް ގިނަ މަސައްކަތްތެރިންނަކީ އެމީހުންގެ ހަޔާތް ރާއްޖޭގައި ބިނާކޮށްފައިވާ މީހުން. އެމީހުންގެ އަނބިން އުޅެނީ ރާއްޖޭގައި އަދި ދަރިން ކިޔަވަން ދަނީ ރާއްޖޭގެ ސްކޫލްތަކަށް. ޑިޕެންޑެންޓް ވިސާ ނުލިބުމުގެ ސަބަބުން އާއިލާތައް ވަކިވެ، ދަރިން ގައުމުން ފޮނުވާލަންޖެހިއްޖެ،" އެ ޔޫނިއަނުން ބުންޏެވެ.
އޭގެ ސަބަބުން، ބިދޭސީ މަސައްކަތްތެރިންނަށް ވަރަށް ބޮޑަށް ބަރޯސާވެފައިވާ ރާއްޖެއަށް ވެސް ގެއްލުންތަކެއް ލިބޭނެ ކަމަށް ހެލްތު ޕްރޮފެޝަނަލް ޔޫނިއަނުން ބުންޏެވެ.
"މި ބަދަލުގެ ސަބަބުން މަސައްކަތްތެރިން ރާއްޖޭގައި ހިފެހެއްޓުމާއި ހުއްޓުމެއް ނެތި ހިދުމަތްތައް ދިނުމަށް ހުރަސްތަކެއް ކުރިމަތިވެދާނެ،" އެ ޔޫނިއަނުން ބުނެ އެވެ.
