ޓެރަރިޒަމަށް ވާގިވެރިވާ ކަމަށް އެމެރިކާއިން ބުނާ ދައުލަތްތަކުގެ ލިސްޓުން ސީރިއާ އުނިކުރުމުން ދިވެހިރާއްޖެއިން އެކަމަށް މަރުހަބާ ކިޔައިފި އެވެ.
ދިވެހި ހާރިޖީ އޮފީހުން މިއަދު ނެރުނު ބަޔާނެއްގައި ބުނެފައި ވަނީ އެމެރިކާގެ އެ ނިންމުމަށް މަރުހަބާ ކިޔާ ކަމަށާއި އޭގެ ސަބަބުން ސީރިއާ އާރާސްތުކުރަން މަގުފަހިވާނެ ކަމަށް އުއްމީދު ކުރާ ކަމަށެވެ.
ޓެރަރިޒަމަށް ވާގިވެރިވާ ގައުމުތަކުގެ ލިސްޓުގައި އެމެރިކާއިން ސީރިއާ ހިމެނީ 1970 ގެ ފަހުކޮޅެވެ. އެއިރު ސީރިއާގައި ވެރިކަން ކުރެއްވީ ހާފިޒް އަލް-އައްސަދު އެވެ. އެ ލިސްޓުގައި ސީރިއާ ހިމެނީ ފަލަސްތީނުގައި ޖިހާދު ކުރާ މުސްލިމުންނަށް ވާގިވެރިވާކަމުގެ ތުހުމަތުގަ އެވެ.
ޓެރަރިޒަމަށް ވާގިވެރިވާ ގައުމުތަކުގެ ލިސްޓުން ސީރިއާ އުނިކުރުމުން އެ ގައުމުގެ ރައީސް އަހުމަދު އަލް-ޝަރާ ވަނީ އެ ގައުމުގެ ރައްޔިތުންނަށް މަރުހަބާ ވިދާޅުވެ، ގައުމު އާރާސްކުރުމުގެ މަސައްކަތް މީގެ ފަހުން ބާރަށް ކުރިއަށްގެންދަވާނެ ކަމަށް ވިދާޅުވެފަ އެވެ.
އަލް-ޝަރާގެ ނުސްރާ ޖަމާއަތުން ސީރިއާގެ ޑިކްޓޭޓަރު ބަޝަރު އަލް-އައްސަދުގެ ވެރިކަން ވައްޓާލައި އާ ސަރުކާރެއް އެކުލަވައިލީ ޑިސެމްބަރު، 2024، ގަ އެވެ. އެއާއެކު ސީރިއާގައި ކުރިއަށްދިޔަ ދާހިލީ ހަނގުރާމަ 14 އަހަރަށްފަހު ވަނީ ނިމުމަކަށް އައިސްފަ އެވެ.
ސީރިއާއަކީ ހަނގުރާމަވެރި ސަރަހައްދެއްގެ ގޮތުގައި ރާއްޖެއިން ކަނޑައަޅާފައިވާ ގައުމެކެވެ. އަދި ރައީސް އަލް-ޝަރާގެ ނުސްރާއަކީ ޓެރަރިސްޓު ޖަމާއެއްތެ ގޮތުގައި ވެސް ސަރުކާރުން ވަނީ ކަނޑައަޅައިފަ އެވެ.
ހަނގުރާމަވެރި ސަރަހައްދުތަކާއި ޖަމާއަތްތައް ކަނޑައަޅާ ލިސްޓުން ރާއްޖެއިން އެންމެ ފަހުން އަދާހަމަކޮށްފައި ވަނީ މީގެ ދެ އަހަރު ކުރިން ޑިސެމްބަރު، 2024، ގަ އެވެ. އެއިރު ސީރިއާގެ ދާހިލީ ހަނގުރާމަ ހަމަ ނިމުނީ އެވެ.
