މިދިޔަ އަހަރާ އަޅާބަލާއިރު މިއަހަރުގެ މިހާތަނަށް ދައުލަތުގެ ހަރަދުތައް ވަރަށް ބޮޑަށް އިތުރުވެފައިވާ ކަމަށް ތަފާސްހިސާބުތަކުން ދައްކައިފި އެވެ.
މޯލްޑިވްސް މަނިޓަރީ އޮތޯރިޓީ އިން އާންމު ކުރާ ވީކްލީ ފިސްކަން ރިޕޯޓަށް ބަލާއިރު، އޯގަސްޓް 13، 2026، އާ ހަމައަށް ދައުލަތުން ވަނީ 28.1 ބިލިއަން ރުފިޔާ ހަރަދުކޮށްފަ އެވެ. އެއީ މިދިޔަ އަހަރުގެ އެހާތަނާ އަޅާބަލާއިރު 19 ޕަސެންޓުގެ އިތުރުވުމެކެވެ.
ހިސާބުތަކަށް ބަލާއިރު، މި އަހަރު ރިކަރަންޓު އެކްސްޕެންޑިޗާ ވެސް ވަނީ 20.3 ބިލިއަން ރުފިޔާއިން 24.5 ބިލިއަން ރުފިޔާއަށް އިތުރުވެފަ އެވެ. އެއީ 20 ޕަސެންޓުގެ އިތުރުވުމެކެވެ.
މިދިޔަ އަހަރާ އަޅާބަލާއިރު މުސާރަ އާއި އިނާޔަތް ދިނުމަށް ސަރުކާރުން ކުރި ހަރަދު ވެސް ވަނީ އިތުރުވެފަ އެވެ. މިދިޔަ އަހަރުގެ އޯގަސްޓް 13، އާ ހަމައަށް މުސާރައަށް ދައުލަތުން ހަރަދު ކުރީ 8.4 ބިލިއަން ރުފިޔާ އެވެ. ނަމަވެސް މި އަހަރު މުސާރަ އާއި އިނާތަތްތަކަށް 9.4 ބިލިއަން ރުފިޔާ ވަނީ ހަރަދުކޮށްފަ އެވެ.
ދައުލަތުގެ ހަރަދުތައް އެހާ ބޮޑުވި ނަމަވެސް، މަޝްރޫއުތަކަށް ކުރި ހަރަދު އެކަށީގެންވާ މިންވަރަކަށް ބޮޑެއް ނުވެ އެވެ. މަޝްރޫއުތަކަށް 3.3 ބިލިއަން ރުފިޔާ އެވެ. މިދިޔަ އަހަރު ހަރަދު ކުރީ 3.1 ބިލިއަން ރުފިޔާ އެވެ. އެހެންކަމުން އެއީ އެންމެ ނުވަ ޕަސެންޓުގެ ކުރިއެރުމެކެވެ.
މިއީ ދިވެހިރާއްޖޭގެ މާލިއްޔަތާއި އިގްތިސާދު ވަރަށް ބޮޑަށް ވެއްޓިފައިވާ ދަނޑިވަޅެކެވެ. ސަރުކާރުގެ ހަރަދު އިތުރުވުމާއި އާ އިންވެސްޓްމަންޓާއި ލޯނު ނުލިބުމުން އަދި ފައިސާ ޗާޕު ކުރުމުގެ ސަބަބުން ދިވެހި ރުފިޔާގެ އަގު ވަނީ ވަރަށް ބޮޑަށް ވެއްޓި ޑޮލަރުގެ އަގު އިންތިހާއަށް އަރައިފަ އެވެ. މިއަދު ޑޮލަރެއް ގަންނަން ލިބެނީ 22.85 ލާރިއަށެވެ.
