ރާއްޖޭގައި މަސައްކަތްކުރާ ބިދޭސީ މުވައްޒަފުންގެ މުސާރަ ރާއްޖޭގައި އެ މުވައްޒަފުންގެ ނަމުގައި ހުޅުވާފައި ހުންނަ ބޭންކް އެކައުންޓަށް ޖަމާކުރަން މަޖުބޫރުވާ ގޮތަށް ހޯމް މިނިސްޓްރީން ރާއްޖޭގައި ބިދޭސީން ވަޒީފާ އަދާކުރުމާބެހޭ ގަވާއިދު މިއަދު ބަދަލުކޮށްފި އެވެ.
އެ ގަވާއިދު ހޯމް މިނިސްޓްރީން މިހާރު ބަދަލުކޮށްފައިވާ ގޮތުން ރާއްޖޭގައި މަސައްކަތްކުރާ ހުރިހާ ބިދޭސީ މުވައްޒަފުން ވަޒީފާގެ އެއްބަސްވުމުގެ ދަށުން ދޭންޖެހޭ މުސާރަ ޖަމާކުރަންޖެހޭނީ، މޯލްޑިވްސް މަނިޓަރީ އޮތޯރިޓީ (އެމްއެމްއޭ) ގައި ރަޖިސްޓްރީކޮށްފައިވާ ނުވަތަ އެ އޮތޯރިޓީން ހުއްދަ ދީފައިވާ ބޭންކެއްގައި އެ މުވައްޒަފުގެ ނަމުގައި ހުޅުވާފައިވާ އެކައުންޓަކަށެވެ.
ގަވާއިދާ އެއްގޮތަށް ބިދޭސީ މުވައްޒަފުންގެ އެކައުންޓަށް ފައިސާ ޖަމާނުކުރާނަމަ ކޯޓާ ކެންސަލްކުރުމާއި، ކޯޓާގެ އަދަދު މަދުކުރުމާއި، ޖޫރިމަނާކުރުމާއި، އެކްޕެޓް ސިސްޓަމުގައި ބްލެކް ލިސްޓު ކުރުން އަދި މައްސަލަ ތަހުގީގީ އިދާރާތަކަށް ފޮނުވުން ހިމެނެ އެވެ.
ގިނަ އަދަދެއްގެ ކުންފުނިން އެ ކުންފުނިތަކުގައި މަސައްކަތްކުރާ މުވައްޒަފުންގެ މުސާރަ ނަގުދު ފައިސާއިން ދެ އެވެ. ނަމަވެސް އައު ގަވައިދުގެ ދަށުން ނަގުދު ފައިސާއިން ދެން މުސާރަ ނުދެވޭނެ އެވެ.
ވަޒީފާއާބެހޭ ގާނޫނަށް 2016 ގައި ގެނައި އިސްލާހުގައިވާ ގޮތުން ބިދޭސީންގެ މުސާރަ އާއި އިނާޔަތްތައް އެ މީހުންނަށް ދޭންޖެހޭނީ އެ މީހުންގެ ނަމުގައި ރާއްޖޭގެ ބޭންކެއްގައި ހުޅުވާފައިވާ އެކައުންޓަކަށް ޖަމާކޮށްގެންނެވެ.
އެ އިސްލާހުގެ ދަށުން ރާއްޖޭގައި މަސައްކަތްކުރާ ބިދޭސީ މުވައްޒަފުން، ރާއްޖޭގައި ހުޅުވާފައިވާ ބޭންކު އެކައުންޓެއްގައި ހުރި ފައިސާ، ރާއްޖެއިން ބޭރުން ނަގުދު ފައިސާގެ ގޮތުގައި ނަގާއިރު، ފައިސާގެ ތިން ޕަސަންޓު ދައުލަތަށް ދައްކާ ގޮތަށް ރެމިޓަންސް ޓެކްސްވެސް އޭރު ނަގަން ފެށި އެވެ.
ނަމަވެސް ނިމިދިޔަ އެމްޑީޕީގެ ސަރުކާރުން ވަނީ ރެމިޓަންސް ޓެކްސްއަކީ ދައުލަތަށް ފައިދާވާ ޓެކްސްއެއް ނޫން ކަމަށް ބުނެ އެ ޓެކްސް ނެގުން ހުއްޓާލާފަ އެވެ.
