ރާއްޖޭގެ ބައެއް ސަރަހައްދުތަކަށް ސެމްޓެމްބަރު މަހުން ފެށިގެން ނޮވެމްބަރު މަހަށް ވާރޭވެހޭ މިންވަރު އިތުރުވެ، ހޫނުމިން އާންމުކޮށް ހުންނަ މިންވަރަށްވުރެ އިތުރުވާނެ ކަމަށް މޯލްޑިވްސް މީޓިއޮރޮލޮޖިކަލް ސާވިސް (މެޓް އޮފީސް) އިން ލަފާކޮށްފި އެވެ.
މެޓް އޮފީހުން ބުނީ ސެޕްޓެމްބަރު މަހުން ފެށިގެން ނޮވެމްބަރު މަހުގެ ނިޔަލަށް ރާއްޖޭގެ އުތުރާއި މެދުރާއްޖެތެރޭގެ ބައެއް އަތޮޅުތަކަށް އާންމުކޮށް ވާރޭ ވެހޭ މިންވަރަށްވުރެ ގިނައިން ވާރޭ ވެހޭނެ ކަމަށް ލަފާކުރެވޭއިރު، ދެކުނުގެ އަތޮޅުތަކަށް ވާރޭވެހޭނެ ކަމަށް ލަފާކުރެވެނީ އާންމުކޮށް ވާރޭވެހޭ މިންވަރަށްވުރެ މަދުން ކަމަށެވެ.
މީގެއިތުރުން މުޅި ރާއްޖެއަށްވެސް ސެޕްޓެމްބަރު މަހުން ފެށިގެން ނޮވެމްބަރު މަހަށް ހޫނުމިން ހުންނަ މިންވަރު އާންމުކޮށް ހުންނަ މިންވަރަށްވުރެ މަތީވާނެ ކަމަށް ލަފާކުރެވޭ ކަމަށް މެޓުން ބުންޏެވެ.
ރާއްޖޭގެ މޫސުމަށް މި ބަދަލުތައް އަންނަމުންދަނީ ގުދުރަތީ މޫސުމީ ބަދަލެއް ކަމަށްވާ "އެލް ނީނޯ" ގެ އާ މަރުހަލާއެއް ފެށުމުންނެވެ. އޭގެ ސަބަބުން ދުނިޔޭގެ އެކި ކަންކޮޅުތަކުގައި މޫސުމީ ނުރައްކާތެރި ހާދިސާތައް ހިނގުން އިތުރުވެގެންދާނެ އެވެ.
މެޓުން ބުނީ ޕެސިފިކް ކަނޑުގައި އެލް ނީނޯގެ ބާރު މިހާރު ދަނީ ގަދަވަމުން ކަމަށެވެ. އެގޮތުން އެންމެ ފަހުގެ މައުލޫމާތުތަކުން ދައްކާ ގޮތުން އިރުމަތީ އިކުއެޓޯރިއަލް ޕެސިފިކް ސަރަހައްދުގެ ކަނޑުމަތީ ފަށަލައިގެ ހޫނުމިން ވަނީ އާންމު މިންވަރަށްވުރެ 2.0 ޑިގްރީ ސެލްސިއަސްއަށް މައްޗަށް ގޮސްފައި ކަމަށް މެޓުން ފާހަގަކުރެ އެވެ.
"ނީނޯ 3.4 ގެ އިންޑެކްސްއަށް ބަލާއިރު، އޮގަސްޓް މަހުގެ ތެރޭގައި މި މިންގަނޑު ވަނީ 1.8 ސެލްސިއަސްއަށް އުފުލިފައި. އަދި ނީނޯގެ އެހެން ސަރަހައްދުތަކުން ވެސް ފެންނަނީ ހޫނުމިން ވަރަށް ބޮޑަށް މަތިވަމުންދާ ތަން. ކަނޑާއި ޖައްވުގެ ހާލަތުންވެސް މިހާރު އަންގައިދެނީ އެލް ނީނޯގެ އަސަރުތައް،" މެޓުން ބުންޏެވެ.
އެލް ނީނޯގެ ހާލަތު މެޓުން މޮނިޓާކުރަމުންދާއިރު، އޭގެ ސަބަބުން ރާއްޖެއަށް ކުރާ މައިގަނޑު އަސަރުތަކުގެ ތެރޭގައި ކަނޑުގެ ލޮނުގަނޑު އާދަޔާ ހިލާފަށް ހޫނުވުމުގެ ސަބަބުން ފަރުތަކުގެ ދިރުމަށް ދިމާވާ ނުރައްކާތައް ހިމެނޭ ކަމަށް އެ އޮފީހުން ބުންޏެވެ.
