މިއަދު މުޅި ރާއްޖެއަށް ވިއްސާރަ ކުރާނެ ކަމަށާއި ބުދަ ދުވަހާ ހަމައަށް މޫސުން ގޯސްވާނެ ކަމަށް މޯލްޑިވްސް މީޓިއޮރޮލޮޖިކަލް ސާވިސް (މެޓް އޮފީސް) އިން ލަފާކޮށްފި އެވެ.
އަދަދު އާ ވާހަކަ ދައްކަވަމުން މެޓް އޮފީހުގެ އޮފިޝަލަކު ބުނީ މިއަދު ރާއްޖޭގެ ހުރިހާ ހިސާބަކަށް ވެސް ވާރޭ ވެހޭނެ ކަމަށް ލަފާކުރެވޭ ކަމަށާއި ބައެއް ރަށްތަކަށް ގުގުރުމާއެކު ބޯކޮށް ވާރޭވެހޭނެ ކަމަށް ލަފާ ކުރެވޭ ކަމަށެވެ.
"މިއަދު ރާއްޖޭގެ ހުރިހާ ހިސާބަކަށް ވެސް ވާރޭ ވެހޭނެ ކަމަށް ލަފާކުރެވެނީ. ބައެއް ރަށްތަކަށް ގުގުރުމާއެކު ވެސް ވާރޭ ވެހޭނެ ކަމަށް ލަފާކުރެވެނީ. ވައިވެސް މާދަމާއިން ފެށިގެން ގަދަވަމުންދާނެ،" މެޓުން ބުންޏެވެ.
ދެކުނަށް ފަސް މޭލާއި 15 މޭލާ ދެމެދުގެ ބާރުމިނުގައި މިއަދު ވައި ޖެހެމުންދާއިރު، މެދު ރާއްޖެތެރެ އާއި އުތުރުގެ ރަށްތަކަށް އަށް މޭލާއި 18 މޭލާ ދެމެދުގެ ވައި ޖެހޭނެ ކަމަށް މެޓުން ލަފާކުރެ އެވެ. އޭގެއިތުރުން މެޓުން ލަފާކުރާ ގޮތުގައި ކޮޅިގަނޑުގައި ގާތްގަނޑަކަށް 40 މޭލަށް ވައި ގަދަވެގެންދާނެ އެވެ.
މެޓުން ލަފާކުރާ ގޮތުގައި އުތުރާއި މެދުރާއްޖެ ތެރޭގައި ކަނޑުތައް އާދައިގެ ވަރަކަށް ގަދަކޮށް ހުރިއިރު، ދެކުނުގެ ރަށްތަކުގެ ކަނޑުތައް މިވަގުތު މަޑެވެ. ނަމަވެސް ވިލާގަނޑުގައި ކަނޑުތައް ގަދަވެގެންދާނެ ކަމަށް މެޓުން ބުންޏެވެ.
ބޯކޮށް ވާރޭވެހި ގުގުރައި، ވިލާގަނޑުގައި ގަޑިއަކު 35 މޭލަށް ވައި ގަދަވާނެ ކަމަށް ލަފާކޮށް މެޓުން ވަނީ ނ. އަތޮޅުން ފެށިގެން ލ. އަތޮޅަށް ވައިޓް އެލާޓް ނެރެފަ އެވެ. ވައިޓް އެލާޓް ނެރުނީ މެންދުރު 14:00 ޖެހުމާ ހަމައަށެވެ.
ރާއްޖެއަށް މިވަގުތު ކުރަމުންދާ ވިއްސާރައަކީ ހުޅަނގު މޫސުމުގެ ވިއްސާރަ ކަމަށް މެޓުން ބުންޏެވެ. އެ އޮފީހުން ބުނީ މިވަގުތު ރާއްޖެ ސަރަހައްދުގައި އާދަޔާހިލާފު ކޮޅިގަނޑެއް އުފެދިފައި ނުވާ ކަމަށެވެ.
