ފާއިތުވި 24 ގަޑިއިރުތެރޭގައި އެންމެ ގިނައިން ވާރޭވެހުނީ އއ. ހިމަންދޫއަށް ކަމަށް މޫސުމާ ބެހޭ ގައުމީ އިދާރާގެ ތަފާސްހިސާބުތަކުން ދައްކައިފި އެވެ.
މޫސުމާ ބެހޭ ގައުމީ އިދާރާގެ ތަފާސްހިސާބުތަކުން ދައްކާގޮތުގައި އިއްޔެގެ ހެނދުނު 8:00 އިން މިއަދު ހެނދުނު 8:00 އާ ދެމެދު ހިމަންދޫއަށް 63.9 މިލިލީޓަރުގެ ވާރޭ ވެހިފައިވެ އެވެ.
ފާއިތުވި 24 ގަޑިއިރުތެރޭގައި ދެން އެންމެ ގިނައިން ވާރޭވެހިފައި ވަނީ ފުވައްމުލަކު ސިޓީއަށެވެ. އެ ސިޓީއަށް 57.5 މިލިލީޓަރުގެ ވާރޭ ވެހިފައިވެ އެވެ.
ރާއްޖޭގައި އެންމެ ގިނަ މީހުން ދިރިއުޅޭ މާލެއަށް ފާއިތުވި 24 ގަޑިއިރު ތެރޭގައި ވެހުނީ 51.6 މިލިލީޓަރުގެ ވާރޭ އެވެ. ހުޅުލެއަށް 53.6 މިލިލީޓަރުގެ ވާރޭ ވެހުނުއިރު، ހުޅުމާލެއަށް ފާއިތުވި 24 ގަޑިއިރު ތެރޭގައި ވެހިފައި ވަނީ42.7 މިލިލީޓަރުގެ ވާރޭ އެވެ.
ރާއްޖޭގެ އެކި ސަރަހައްދުތަކަށް ހުޅަނގު މޫސުމުގެ ވިއްސާރަ ކުރަމުންދާއިރު، ކުރިއަށް އޮތް 24 ގަޑިއިރު ވެސް ރާއްޖޭގެ އެކި ސަރަހައްދުތަކަށް ވިއްސާރަކޮށް ބައެއް ރަށްރަށަށް ގުގުރުމާއެކު ބޯކޮށް ވާރޭ ވެހޭނެ ކަމަށް މޫސުމާ ބެހޭ ގައުމީ އިދާރާއިން ވަނީ ލަފާކޮށްފަ އެވެ.
އަދި، އާންމުގޮތެއްގައި ހުޅަނގާއި ހުޅަނގުއުތުރުން ގަޑިއަކު 10 މޭލާއި 20 މޭލާ ދެމެދުގެ ބާރުމިނުގައި ވައިޖެހޭނެ ކަމަށް އެ އިދާރާއިން ލަފާކޮށްފައިވާއިރު، ވިލާގަނޑުގައި 40 މޭލު ބާރުމިނުގައި ވައިޖެހޭނެ ކަމަށް މޫސުމާ ބެހޭ ގައުމީ އިދާރާއިން ލަފާކުރެ އެވެ.
