ޓޯކިޔޯގެ ޒުލެއްގައި އުޅޭ އަންހެން ތިން ސިންގާއެއް އާދަޔާ ހިލާފަށް ހޫނުގަދަވުމުގެ ސަބަބުން ދިމާވި ސިއްހީ މައްސަލަތަކެއްގައި މަރުވެއްޖެ އެވެ.
ހުޅަނގު ޓޯކިޔޯގައި ހުންނަ "ޓަމާ ޒޫލޮޖިކަލް ޕާކް" ގައި އުޅޭ މި ތިން ސިންގާ މަރުވީ އެއް ހަފުތާ ތެރޭގަ އެވެ. އެ ޒުލުން ބުނި ގޮތުގައި، އުމުރުން ތިން އަހަރާއި 15 އަހަރާ ދެމެދުގެ މި ސިންގާތަކުގެ ޕޯސްޓްމޯޓަމް ރިޕޯޓުން ދައްކާ ގޮތުގައި، މަރުވީ ހަށިގަނޑުން ފެން މަދުވުމާއި ގުނަވަންތައް ފެއިލްވުމުގެ ސަބަބުންނެވެ. މިއީ ހޫނުގަދަވުމުގެ ސަބަބުން ދިމާވި ކަމެއް ކަމަށް ބެލެވޭ ކަމަށް ވެސް ރިޕޯޓުގައިވެ އެވެ.
ޖަޕާނުގެ ހޫނުމިން އަހަރަކަށް ވުރެ އަހަރަކަށް އިތުރުވެ، ނުރައްކާތެރި މިންވަރަކަށް ވަނީ އުފުލިފަ އެވެ. ބައެއް ސިޓީތަކުގެ ހޫނުމިން 40 ޑިގްރީ ސެލްސިއަސްއަށް ވުރެ މައްޗަށް ގޮސްފައިވާއިރު، މިއީ "އާދަޔާ ހިލާފަށް ހޫނު" ދުވަސްތަކެއްގެ ގޮތުގައި ވަނީ ކަނޑައަޅާފަ އެވެ.
ޒުލުން ހޯމަ ދުވަހު ނެރުނު ބަޔާނެއްގައި ބުނީ، އިތުރު ތިން ސިންގާއެއް (ދެ ފިރިހެން ސިންގާ އަދި އެއް އަންހެން ސިންގާ) އަދިވެސް ބަލިކޮށް އުޅޭ ކަމަށާއި، އެ ތަކެއްޗަށް ނުތެދުވެވޭ ކަމަށެވެ. އެ ސިންގާތަކަށް މިހާރު ދަނީ ދިޔާ ތަކެއްޗާއި، ބޭހާއި ވިޓަމިން ދީގެން ފަރުވާ ދެމުންނެވެ.
މީގެ އިތުރުން، ހަތަރު ސިންގާއެއްގެ ހާލަތު ރަނގަޅުވަމުން އަންނަ ކަމަށާއި، ހަ ސިންގާއެއްގެ ސިއްހަތު ފެށުނީއްސުރެ ރަނގަޅު ކަމަށް ބުންޏެވެ. މި ސިންގާތައް މިހާރު ވަނީ އޭސީ އާއި ފަންކާ ހަރުކޮށްފައިވާ ހާއްސަ ގޮޅިތަކަކަށް ބަދަލުކޮށްފަ އެވެ.
ޓަމާ ޒޫގައި ގާތްގަނޑަކަށް 260 ބާވަތުގެ ޖަނަވާރު ގެންގުޅެ އެވެ. އެތަނުގައި 1964 ވަނަ އަހަރުން ފެށިގެން ސިންގާ ގެންގުޅެމުން އަންނައިރު، މިއީ ޒިޔާރަތްކުރާ މީހުންގެ މެދުގައި ވަރަށް މަގުބޫލު ބައެކެވެ. އެ ޒުލުގައި ސަފާރީ ބަހެއްގައި ގޮސް ސިންގާތައް ބަލާލުމުގެ ފުރުސަތު އާންމުންނަށް އޮވެ އެވެ.
ނަމަވެސް، ކުއްލިއަކަށް ކުރިމަތިވި ހޫނު ރާޅުގެ ސަބަބުން ސިންގާތައް ބަލިވަމުންދާތީ، ސިންގާ ދައްކާލުމާއި ސަފާރީ ބަހުގެ ހިދުމަތް މެދުކަނޑާލާފައިވާ ކަމަށް މިދިޔަ މަހު ވަނީ އިއުލާންކޮށްފަ އެވެ.
މި ހޫނު މޫސުމުގައި އެކަނިވެސް، ހޫނުގެ ސަބަބުން ދިމާވާ ސިއްހީ މައްސަލަތަކުގައި ޖަޕާނުގެ އެކި ކަންކޮޅުތަކުން 43،000 އަށް ވުރެ ގިނަ މީހުން ހޮސްޕިޓަލުގައި އެޑްމިޓްކޮށްފައިވެ އެވެ.
