ކ. ތިލަފުށިން ފުރައިގެން ދަތުރުކުރި ލޭންޑިން ކްރާފްޓެއް ކ. ގާފަރު ކައިރިއަށް އަޑިއަށް ގޮސް ދެ މީހުން ގެއްލިއްޖެ އެވެ.
ފުލުހުން ބުނީ ލޭންޑިން ކްރާފްޓުން ޖުމްލަ 10 މީހުން ދަތުރުކުރިއިރު، އޭގެ ތެރެއިން 8 މީހުން ފެނިފައިވާ ކަމަށެވެ. އެ މުއައްސަސާއިން ބުނީ ގެއްލުނު ދެ މީހުން ހޯދުމުގެ މަސައްކަތް ކުރަމުންދާ ކަމަށެވެ.
ނަމަވެސް ގެއްލިގެން ހޯދަމުންދާ މީހުންގެ އެއްވެސް ތަފްސީލެއް ފުލުހުން މިހާތަނަށް ހާމަކޮށްފައެއް ނުވެ އެވެ.
މިއަދު ހެނދުނު ކ. މާފުށީ ބޭރުގައި އަޅާފައި އޮތް ސަފާރީއެއް، މިއަދު ހެނދުނު އައި ކޮޅިގަނޑެއްގައި ނަގިލި ކަހާލައިގެން ގޮސް، އެ ރަށުގެ ބޭރު ތޮށްޓަށް އުރި ބޭނުން ނުކުރެވޭ ވަރަށް ވަނީ ހަލާކުވެފަ އެވެ.
މީގެއިތުރުން މޫސުން ގޯސްވުމުގެ ސަބަބުން ގިނަ އަދަދެއްގެ ޑޮމެސްޓިކް ފްލައިޓްތައް އަދި އަތޮޅުތެރޭގެ ލޯންޗު ދަތުރުތައް ވެސް ވަނީ ކެންސަލްވެފަ އެވެ.
ރާއްޖެއަށް މިހާރު ކުރަމުންދާ ވިއްސާރައިގައި ކަނޑު ދަތުރުކުރާ އެންމެންވެސް މޫސުމަށް ސަމާލުވުމަށް މެޓް އޮފީހުގެ އިތުރުން ސަލާމަތީ ހިދުމަތްތަކުން ވަނީ އިލްތިމާސްކޮށްފަ އެވެ.
މޫސުން ގޯސްވުމުގެ ސަބަބުން ހއ. އަތޮޅުން ފެށިގެން ފ. އަތޮޅަށް 15:30 އާ ހަމައަށް ޔެލޯ އެލާޓް ވަނީ ނެރެފަ އެވެ. އެލާޓް ނެރެފައިވަނީ ގަޑިއަކު 25 މޭލާއި 30 މޭލާ ދެމެދުގެ ބާރުމިނުގައި ވައި ޖެހި، ވިލާގަނޑުގައި ގަޑިއަކު 50 މޭލަށް ވައިގަދަވެ ކަނޑުތައް ވަރަށް ގަދަވާނެ ކަމަށް ލަފާކޮށެވެ.
ވޭތުވި 24 ގަޑިއިރުގެ ތެރޭގައި އެންމެ ބޯކޮށް ވާރޭވެހިފައިވަނީ 84 މިލިމީޓަރުގެ ވާރޭ ވެހުނު ހުޅުމާލެ އާއި ބ. ދަރަވަންދޫއަށެވެ. އެންމެ ވައި ގަދަވެފައި ވަނީ ގަޑިއަކު 17 މޭލުގެ ބާރުމިނަށް ކުޅުދުއްފުށި ސިޓީ އާއި އެއާޕޯޓުތައް އޮންނަ މާފަރާއި ހުޅުލެއަށެވެ. އަދި، ވިލާގަނޑުގައި އެންމެ ވައި ގަދަވީ ގަޑިއަކު 46 މޭލު ބާރުމިނަށް، ލ. ކައްދުއަށެވެ.
