މޫސޫން ގޯސްވާނެ ކަމަށް ލަފާކޮށް ރ. އަތޮޅުން ފެށިގެން ވ. އަތޮޅަށް ރީނދޫ އެލާޓް މޯލްޑިވްސް މީޓިއޮރޮލޮޖިކަލް ސާވިސް (މެޓް އޮފީސް) އިން ނެރެފި އެވެ.
މެޓް އޮފީހުން ނެރުނު އެލާޓުގައި ބުނީ ރ. އަތޮޅުން ފެށިގެން ވ. އަތޮޅަށް ބޯކޮށް ވާރޭވެހި ގުގުރައި، ވިލާގަނޑުގައި 40 މޭލަށް ވައި ގަދަވުމުގެ އިތުރުން ކަނޑުތައް ގަދަވާނެ ކަމަށް ލަފާކުރެވޭ ކަމަށެވެ.
އެ އޮފީހުން ޔެލޯ އެލާޓް ނެރުނީ މިއަދު މެންދުރު 12:30 އިން ފެށިގެން ހަވީރު 16:00 ޖަހަންދެންނެވެ.
މިއީ މޫސުން ގޯސްވެގެން ރާއްޖޭގެ ސަރަހައްދަކަށް މި މަހު ނެރުނު ފުރަތަމަ ޔެލޯ އެލާޓްކަން ފާހަގަކުރެވެ އެވެ. އެންމެ ފަހުން ޔެލޯ އެލާޓް ނެރެފައިވަނީ މިދިޔަ ޖޫން މަހުގެ 28، ވަނަ ދުވަހު އެވެ.
ޔެލޯ އެލާޓް އާންމުކޮށް ނެރެނީ އެއް ގަޑިއިރު ތެރޭގައި 70 މިލިމީޓަރު ނުވަތަ ހަ ގަޑިއިރު ތެރޭގައި 100 މިލިމީޓަރަށް ވާރޭވެހޭނެ ކަމަށް ލަފާކޮށް ނުވަތަ ވައިޖެހޭ މިންވަރު ވަރަށް ބޮޑަށް އިތުރުވުމުންނެވެ.
މޫސުން ގޯސްވާނެ ކަމަށް ލަފާކޮށް މިއަދު ހެނދުނު މެޓް އޮފީހުން ހއ. އަތޮޅުން ފެށިގެން ފ. އަތޮޅަށް ވައިޓް އެލާޓްވެސް ނެރުނެވެ.
