މިހާރު ކުރަމުންދާ ހުޅަނގު މޫސުމުގެ ވިއްސާރައިގައި އުތުރާއި މެދުރާއްޖެތެރޭގެ މޫސުން ވަރަށް ގޯސްކަމަށާއި، މި ވިއްސާރައިގައި މި ރެ އާއި މާދަމާ ވެސް ވެސް ވައިގަދަވުމުގެ ފުރުސަތު އެބައޮތް ކަމަށް މެޓް އޮފީހުން ބުނެފި އެވެ.
ރާއްޖޭގެ ބޮޑު ބަޔަކަށް ވިއްސާރަ ކުރަމުންދާއިރު، މެޓް އޮފީހުން ވަނީ ހއ. އަތޮޅުން ފެށިގެން ފ. އަތޮޅާ ހަމައަށް ހަތަރު ގަޑިއިރުގެ ޔެލޯ އެލާޓެއް ވެސް ނެރެފަ އެވެ.
އެ އެލާޓުގައި މިއަދު 11:30 އިން ފެށިގެން 15:30 އާ ހަމައަށް މި ސަރަހައްދުގައި ގަޑިއަކު 25 މޭލާއި 35 މޭލާ ދެމެދުގެ ބާރުމިނުގައި ވައި ޖެހި، ވިލާގަނޑުގައި ގަޑިއަކު 50 މޭލަށް ވައި ގަދަވެ، ކަނޑުތައް ވަރަށް ގަދަ ވާނެ ކަމަށެވެ.
މެޓް އޮފީހުން ބުނީ އިއްޔެ އާއި މިއަދު ރާއްޖޭގޭ ބޮޑު ބަޔަކަށް ވިއްސާަރަކޮށް، ބައެއް ރަށްތަކަށް ވައިގަދަވުމާއެކު ބޯކޮށް ވާރޭވެހިފަވެ އެވެ.
އެ ގޮތުން ވޭތުވި 24 ގަޑިއިރުގެ ތެރޭގައި އެންމެ ބޯކޮށް ވާރޭވެހިފައިވަނީ 84 މިލިމީޓަރުގެ ވާރޭ ވެހުނު ހުޅުމާލެ އާއި ބ. ދަރަވަންދޫއަށެވެ. އެންމެ ވައި ގަދަވެފައި ވަނީ ގަޑިއަކު 17 މޭލުގެ ބާރުމިނަށް ކުޅުދުއްފުށި ސިޓީ އާއި އެއާޕޯޓުތައް އޮންނަ މާފަރާއި ހުޅުލެއަށެވެ. އަދި، ވިލާގަނޑުގައި އެންމެ ވައި ގަދަވީ ގަޑިއަކު 46 މޭލު ބާރުމިނަށް، ލ. ކައްދުއަށެވެ.
މޫސުން މިހާ ގޯސްކޮށް އުޅޭއިރު، ކަނޑުދަތުރުފަތުރުކުރާ ފަރާތްތަކުން ހާއްސަކޮށް ސަމާލުވާން މެޓް އޮފީހުން ވަނީ އިލްތިމާސްކޮށްފަ އެވެ.
