ދިވެހި ރުފިޔާގެ އަގު ވެއްޓި ހިފެހެއްޓުމެއް ނެތި ޑޮލަރު އަގުބޮޑުވާތީ ސަރުކާރުން ފަތުރުވެރިކަން އަދި މަނީ އެކްސްޗޭންޖު ފިހާރަތަކަށް އަޅަމުންދާ ފިޔަވަޅުތައް ރައީސް މުހައްމަދު މުއިއްޒު މިއަދު ދިފާއު ކުރައްވައިފި އެވެ.
ރިސޯޓުތަކަށް ލިބޭ އާމްދަނީގެ 40 ޕަސެންޓު މަޖުބޫރު ކުރަން މިއަދު ސަރުކާރުން ވަނީ ނިންމައިފަ އެވެ. އަދި ޑޮލަރުން އާމްދަނީ ލިބޭ މީހުން އެ ފައިސާ ހުއްދަ ނުހޯދާ މާރު ކުރުން މަނާކޮށް، އެފަދަ ކަންކަމަށް އަދަބު ދޭނެ ކަމަށް ވެސް ސަރުކާރުން އިއުލާނު ކުރި އެވެ.
ރައީސް އޮފީހުން ގެނެސްދޭ "ނޭޝަން ޗެޓް" ގައި އެ ފިޔަވަޅުތަކާ ގުޅޭ ގޮތުން ވާހަކަ ދައްކަވަމުން މުއިއްޒު ވިދާޅުވި، އެމަނިކުފާނު ތަންފީޒު ކުރައްވަމުން ގެންދަވާ ސިޔާސަތުގެ ސަބަބުން ޖުމްލަ ގޮތެއްގައި ކަންކަން ރަނގަޅުވާނެ ކަމަށެވެ.
"ބޭރު ފައިސާގެ ކަންކަމުގައި މި އަޅާ ފިޔަވަޅުތައް ވެސް، ހަމަ ޔަގީން އޭގެ ނަތީޖާ ރަނގަޅުވާނެ. ދެން ސިޔާސީ ބޭނުމެއްގައި ބައެއް ފަރާތްތަކުން އެކަހަލަ ވާހަކަ ދައްކާ ހަދާފާނެ. އެކަމަކު އިރާދަކުރެއްވިއްޔާ އެކަމުގެ ނަތީޖާ ޖުމްލަ ގޮތެއްގައި ރަނގަޅުވާނެ ކަމަށް އަޅުގަނޑު ގަބޫލު ކުރަން،" މުއިއްޒު ވިދާޅުވި އެވެ.
ބޭރު ފައިސާގެ މައްސަލައިގައި މިހާތަނަށް ފިޔަވަޅުތައް އަޅާފައިވާނީ މަޝްވަރާ ކުރުމަށްފަހު ކަމަށާއި ކުރިއަށް އޮތް ތަނުގައި ވެސް މަޝްވަރާ ކުރުމުގެ ފުރުސަތު އޮންނާނެ ކަމަށް ރައީސް ވިދާޅުވި އެވެ.
"ހައްލު ކުރުމުގައި އަޅުގަނޑުމެން މަޝްވަރާގެ އުސޫލުން ދާނީ އެންމެންގެ ވެސް ބައިވެރިވުމާ އެކީގައި. މިއީ އެންމެންގެ ވެސް ގައުމެއް. އެހެންވީމާ އިރާދަކުރެއްވިއްޔާ މީގެ ނަތީޖާ ރަނގަޅުވާނެ،" އެމަނިކުފާނު ވިދާޅުވި އެވެ.
ރައީސް އެހެން ވިދާޅުވި ނަމަވެސް، ރިސޯޓުތަކަށް ލިބޭ އާމްދަނީގެ 40 ޕަސެންޓު މާރު ކުރަންޖެހޭ ގޮތަށް މިއަދު ބަދަލު ކުރީ އިންޑަސްޓްރީގެ ސްޓޭކްހޯލްޑަރުންނާއި ރައީސްގެ ޓޫރިޒަމް އެޑްވައިޒަރު މުހައްމަދު ހަލީލުގެ ލަފަޔާ ހިލާފަށެވެ. އެ މައްސަލައިގައި އޭނާ ވަނީ މިއަދު އިސްތިއުފާ ދެއްވައިފަ އެވެ.
"މިފަދަ ސިޔާސަތުގެ ސަބަބުން ޓޫރިޒަމް ދާއިރާއަށް ގެއްލުން ވަމުންދާއިރު، އެޑްވައިޒަރެއްގެ ގޮތުގައި ސަރުކާރުގައި ދެމިހުރުމުގެ ބޭނުމެއް އޮތް ކަމަށް ގަބޫލު ނުކުރެވުނީ،" މި ނޫހަށް ދެއްވި އިންޓަވިއުއެއްގައި ހަލީލް ވިދާޅުވި އެވެ.
ހޯމަ ދުވަހު ނެރުނު ބަޔާނެއްގައި މޯލްޑިވްސް އެސޯސިއޭޝަން އޮފް ޓޫރިޒަމް އިންޑަސްޓްރީ (މަޓީ) އިން ބުނެފައި ވަނީ، މުސާރަ އާއި ކުއްޔާއި ޓީޖީއެސްޓީ އާއި ތެޔޮ ބިލުތަކާއި ގްރީން ޓެކްސް އާއި ލޯނާއި އެ ނޫން ވެސް ގިނަ ކަންކަން ބޭރު ފައިސާއިން ކުރާއިރު، ޖުމްލަ އާމްދަނީގެ 40 ޕަސެންޓު ބޭންކަށް މާރު ކުރުމަކީ ދެކޮޅުޖެހޭނެ އުސޫލެއް ނޫން ކަމަށެވެ.
