މިއަހަރު ނިމުމުގެ ކުރިން ޕީޕަލްސް ނޭޝަނަލް ކޮންގްރެސް (ޕީއެންސީ) އަކީ އެއްލައްކަ މެންބަރުން ހިމެނޭ ސިޔާސީ ޕާޓީއަކަށް ހެދުމަކީ ރައީސް މުހައްމަދު މުއިއްޒުގެ އަމާޒު ކަމަށް، ޕާޓީގެ ޕާލިމެންޓަރީގެ ގްރޫޕްގެ ލީޑަރު އިބްރާހިމް ފަލާހު ރޭ ވިދާޅުވެއްޖެ އެވެ.
ޕީއެންސީގެ ކޮންގްރެސް ފެށުމުގެ ރަސްމިއްޔާތުގައި ފަލާހު ވިދާޅުވި ގޮތުގައި 2023 ވަނަ އަހަރު މުއިއްޒު ވެރިކަމާ ހަވާލުވެވަޑައިގެންނެވިއިރު ޕީއެންސީގައި ތިބީ ގާތްގަނޑަކަށް ތިން ހާހެއްހާ މެންބަރުންނެވެ. ނަމަވެސް، މިހާރު އެ ޕާޓީގެ މެންބަރުންގެ އަދަދު ވަނީ 79،364 އަށް އަރައިފައެވެ.
މިހާރު ކުރިއަށްދާ ކޮންގްރެސް ނިމިގެންދާއިރު، ޕާޓީގެ ދަފުތަރުގައި ހިމެނޭ މެންބަރުންގެ އަދަދު 80،000 އަށް ވުރެ މަތިވެގެންދާނެ ކަމަށް ލަފާކުރެއްވޭ ކަމަށް އޭނާ ވިދާޅުވި އެވެ. ފާއިތުވި ދޮޅުމަސް ދުވަހުގެ ތެރޭގައި އެކަނިވެސް 12،000 އަށް ވުރެ ގިނަ މީހުން ވަނީ އަލަށް ޕީއެންސީއާ ގުޅިފައިވާ ކަމަށް ވެސް ފަލާހު ވިދާޅުވި އެވެ.
ކުންފުނިތަކުގެ މުވައްޒަފުން ޕީއެންސީއަށް ވަނުން މަޖުބޫރުކުރަމުންދިޔަކަން ފަޅާއަރާފައިވާއިރު ވެސް ފަލާހު ވިދާޅުވީ ޕާޓީއާ ގުޅޭ ކޮންމެ މެންބަރަކީ ވެސް އަމިއްލަ އިހުތިޔާރުގައި ގުޅޭ މެންބަރެއް ކަމަށާއި، ޕާޓީގެ އުސޫލުތައް ކަމުދާތީ އެއްވެސް މެންބަރަކު ޕާޓީ ދޫކޮށް ނުދާކަމަށް ވެސް ފަލާހު އެވެ.
ޕީއެންސީގެ މެމްބަރުންގެ އަދަދު 100،000 އަށް އެރުވުމަށް 2024 ގައި ވެސް އަމާޒު ހިފި އެވެ. ނަމަވެސް އެކަން މިހާތަނަަށް ކާމިޔާބެއްނުވެ އެވެ.
ރައްޔިތުންގެ މަޖިލީހުގައި ތިއްބެވި ޕީއެންސީގެ 73 މެންބަރުންނަކީ ސަރުކާރު ދެމެހެއްޓުމަށް އަމާނާތްތެރިކަމާއެކު މަސައްކަތް ކުރައްވާނެ ބޭފުޅުންކަމުގެ ޔަގީންކަން ވެސް މި ކޮންގްރެސްގައި ފަލާހު ދެއްވި އެވެ.
މަޖިލީހުގެ މަސައްކަތްތައް ކުރިއަށްދަނީ ގާނޫނާއި ގަވާއިދުގެ ތެރެއިން، އެއްވެސް ނާޖާއިޒު ސިޔާސީ ނުފޫޒެއް ނެތި، އިންސާފުވެރިކަމާއެކު ކަމަށް ވެސް އޭނާ ވިދާޅުވި އެވެ.
ޕީއެންސީގެ މެންބަރުން "ތަޅުއެޅުވުމަށްޓަކައި" ޕާޓީ ބަދަލުކޮށްފި ނަމަ، ނުވަތަ ޕާޓީން ވަކިކޮށްފި ނަމަ ރައްޔިތުންގެ މަޖިލީހުގެ ގޮނޑި ގެއްލޭ ގޮތަށް ގާނޫނުއަސާސީ އަށް ވަނީ ބަދަލު ގެނެސްފަ އެވެ.
