ވެރިކަން ކުރާ ޕާޓީ ޕީޕަލްސް ނެޝަނަލް ކޮންގްރެސްގެ ކޮންގްރެސް ފަށަން ރޭ ބޭއްވި ޖަލްސާ ނިންމުމުގެ ގޮތުން ގައުމީ ސަލާމް ކީއިރު، މޭ މަތީގައި އަތް އެޅުމުން ކުރީގެ ރައީސް މައުމޫން އަބްދުލްގައްޔޫމް އެކަމަށް ފާޑުވިދާޅުވެއްޖެ އެވެ.
ދިވެހިރާއްޖޭގައި 30 އަހަރު ވެރިކަން ކުރެއްވި މައުމޫން ރޭ ސޯޝަލް މީޑިގައި ކުރެއްވި ޕޯސްޓެއްގައި ވިދާޅުވީ ގައުމީ ސަލާމް ކިޔާއިރު މޭ މަތީގައި އަތް އެޅުމަކީ ގާނޫނެއް ނުވަތަ ގަވާއިދެއްގައި އޮންނަ ކަމެއް ނޫން ކަމަށެވެ.
"މާފު ކުރައްވާ. ގައުމީ ސަލާމް ކިޔާއިރު މޭމަތީގައި އަތް އެޅުމަކީ ދިވެހި ރާއްޖޭގެ ގާނޫނެއްގައި ވެސް ނުވަތަ ގަވާދެއްގައި ވެސް އޮންނަ ކަމެއް ނޫން،" މައުމޫން ވިދާޅުވި އެވެ.
ރޭގެ ޖަލްސާ ނިންމުމުގެ ގޮތުން ގައުމީ ސަލާމް ކީއިރު، ރައީސް މުހައްމަދު މުއިއްޒު އާއި އެމަނިކުފާނުގެ އަނބިކަނބަލުން ސާޖިދާ މުހައްމަދުގެ އިތުރުން ޕާޓީގެ ލީޑާޝިޕްގެ އެންމެން ތިއްބެވީ މޭ މަތީގައި އަތް އަޅުއްވައިގެންނެވެ.
ގައުމީ ސަލާމް ކީއިރު މޭ މަތީގައި އަތްނޭޅުއްވީ އެ ޖަލްސާގައި މެހްމާނެއްގެ ގޮތުގައި ބައިވެރިވެވަޑައިގެންނެވި އިދިކޮޅު މޯލްޑިވިއަން ޑިމޮކްރެޓިކް ޕާޓީގެ ޗެއާޕާސަން މުހައްމަދު ނަޝީދު އެކަންޏެވެ.
ގައުމީ ސަލާމް ކިޔާއިރު މޭ މަތީގައި އަތް އެޅުމާ ގުޅޭ ގޮތުން ފަތުވާ މަޖިލީހުން ވަނީ މީގެ ކުރިން ފަތުވާއެއް ވެސް ނެރެފަ އެވެ. ޑިސެމްބަރު، 2023، ގައި އެ މަޖިލީހުން ނެރުނު ފަތުވާގައި ބުނެފައި ވަނީ ގައުމީ ސަލާމް ކިޔާއިރު މޭ މަތީގައި އަތް އެޅުމަކީ ސަގާފީ ކަމެއް ކަމަށާއި އެކަން ހަރާމް ކަން ކަނޑައެޅޭނެ ދަލީލެއް ނެތް ކަމަށެވެ.
