ދެހާސް ތޭވީހުގެ އިންތިހާބު ކާމިޔާބު ކުރި ގޮތަށްވުރެ ފަސޭހައިން 2028 ވަނަ އަހަރުގެ ރިޔާސީ އިންތިހާބު ރައީސް މުހައްމަދު މުއިއްޒަށް ކާމިޔާބުކޮށްދޭންޖެހޭ ކަމަށް ރައްޔިތުންގެ މަޖިލީހުގެ ރައީސް އަދި ޕީއެންސީގެ ޗެއާޕާސަން އަބްދުއްރަހީމް އަބްދުﷲ ރޭ ވިދާޅުވެއްޖެ އެވެ.
ޕީއެންސީގެ މަތީ މަޖިލީހުގެ ބައްދަލުވުން (ކޮންގްރެސް) ފެށުމަށް ރޭ ބޭއްވި ރަސްމިއްޔާތުގައި އަބްދުއްރަހީމް ވިދާޅޫވީ "އަމާޒު ހިފަންވީ 2023 ގެ އިންތިހާބު ކާމިޔާބު ކުރި ގޮތަށް ވުރެ ފަސޭހައިން ﷲ ގެ ތަނަވަސް ރަހުމަތުފުޅާއެކު 2028 ވަނަ އަހަރުގެ ރިޔާސީ އިންތިހާބު ޑރ. މުހައްމަދު މުއިއްޒަށް ކާމިޔާބުކޮށްދޭން" ކަމަށެވެ.
ތަރައްގީގެ ގިނަ މަޝްރޫއުތަކެއް ހުއްޓިފައިވާ އިރުވެސް، ރާއްޖޭގެ ތަރައްގީ އާއި ކުރިއެރުން ގުޅިފައިވަނީ ޕީއެންސީއާ ކަމަށް ފާހަގަކުރައްވަމުން، އަބްދުއްރަހީމް ވިދާޅުވީ ދިވެހިރާއްޖެއަށް އަމާންކަމާއި ހިމޭންކަން ގެނެސްދެވޭނީ ރައީސް މުއިއްޒުގެ ރިޔާސަތުގެ ދަށުން ޕީއެންސީ ދެވަނަ ފަހަރަށް ވެރިކަމަށް އައިސްގެން ކަމަށެވެ.
ގައުމުގެ މިނިވަންކަން ހިމާޔަތްކޮށް، ދިވެހީންގެ ރާއްޖެއެއް ބިނާކުރުމަށް ރައީސް ކުރައްވަމުން ގެންދަވާ މަސައްކަތަށް ރައްޔިތުން، ހާއްސަކޮށް ކޮންގްރެސް ޕާޓީގެ މެންބަރުން އިތުރު ފުރުސަތު ދޭންޖެހޭ ކަމަށް ވެސް އެމަނިކުފާނު ވިދާޅުވި އެވެ.
"ދިވެހިރާއްޖެއަށް ހަމަޖެހުން އޮންނަން އެބަޖެހޭ. ދިވެހިރާއްޖެ ތަރައްގީގެ މަގުގައި ކުރިއަރައިގެން ދާން އެބަޖެހޭ... މިކަން ކުރެވޭނީ 10 އަހަރު މަދުވެގެން 10 އަހަރު އެއް ވެރިޔަކު ދިވެހިރާއްޖޭގެ ވެރިކަމުގައި ހުންނަވައިގެން،" އަބްދުއްރަހީމް ވިދާޅުވި އެވެ.
ސިޔާސީ މަސައްކަތްތަކާ ގުޅޭގޮތުން ވާހަކަދައްކަވަމުން އެ މަނިކުފާނު ވިދާޅުވީ ސިޔާސީ މަސައްކަތަކީ ގޭގައި އިނދެގެން ކުރެވޭނެ ކަމެއް ނޫން ކަމަށާއި، މަގުމައްޗަށް ނުކުމެ، ރަށްރަށަށް ގޮސް، ރައްޔިތުންނާ ގާތުން މަސައްކަތްކުރަންޖެހޭ ކަމަށެވެ.
ޕީއެންސީގެ ލީޑަޝިޕުން ލަސްނުކޮށް އަތޮޅުތަކަށް ދަތުރުތައް އިންތިޒާމުކޮށް، ޕާޓީގެ ހަރަކާތްތައް ފުޅާކުރުމަށް މުއިއްޒު ލަފާދެއްވާފައިވާ ކަމަށް ވެސް އެ އަބްދުއްރަހީމް ވިދާޅުވި އެވެ.
