ޓޫރިޒަމް އެޑްވައިޒަރުގެ މަގާމުން އިސްތިއުފާ ދެއްވީ ރިސޯޓުތަކުގެ އާމްދަނީގެ 40 ޕަސެންޓު ޑޮލަރު މާރުކުރުމަކީ އިންޑަސްޓްރީއަށް ގެއްލުން ލިބޭނެ ކަމެއް ކަމަށް ވާތީ، މިފަދަ ހާލަތެއްގައި އެޑްވައިޒަރެއްގެ ގޮތުގައި ހުންނެވުމަކީ ރަނގަޅު ނިންމުމެއް ކަމަށް ގަބޫލު ނުކުރެއްވިގެން ކަމަށް މުހައްމަދު ހަލީލް ވިދާޅުވެއްޖެ އެވެ.
ރައީސް މުހައްމަދު މުއިއްޒުގެ ޓޫރިޒަމް އެޑްވައިޒަރުގެ މަގާމުގައި ނޮވެމްބަރު 17، 2023 އިން ފެށިގެން ހުންނެވި ހަލީލަކީ ފުޅާ ދާއިރާއެއްގައި ރިސޯޓް ހިންގާ "ޕަލްސް" ކުންފުނީގެ މެނޭޖިން ޑިރެކްޓަރު އަދި "މަންތާ އެއާ" ގެ ހިއްސާދާރެކެވެ.
ހަލީލް "އަދަދު" ނޫހަށް ވިދާޅުވީ ރިސޯޓު އާމްދަނީގެ 20 ޕަސެންޓު މާރުކުރަން ނިންމި އިރުވެސް، އެކަމުން އެދެވޭ ހައްލެއް ނުލިބޭނެ ކަމަށް ލަފާދެއްވި ކަމަށެވެ.
"މިފަދަ ސިޔާސަތުގެ ސަބަބުން ޓޫރިޒަމް ދާއިރާއަށް ގެއްލުން ވަމުންދާއިރު، އެޑްވައިޒަރެއްގެ ގޮތުގައި ސަރުކާރުގައި ދެމިހުރުމުގެ ބޭނުމެއް އޮތް ކަމަށް ގަބޫލު ނުކުރެވުނީ،" ހަލީލް ވިދާޅުވި އެވެ.
ރިސޯޓުތަކުން މާރުކުރާ ޑޮލަރުގެ މިންވަރު އިތުރުކުރި ކަމުގައި ވިޔަސް، ގައުމަށް ކުރިމަތިވެފައިވާ ޑޮލަރުގެ ތާށިކަމަށް އެދެވޭ ލުޔެއް ލިބޭނެ ކަމަށް ލަފާނުކުރެވޭ ކަމަށް ހަލީލް ވިދާޅުވި އެވެ.
އޭނާ ގަބޫލުކުރައްވާ ގޮތުގައި މާލީ ހާލަތާއި ޑޮލަރުގެ މައްސަލައަށް ހައްލެއް ލިބޭނީ ސަރުކާރުގެ އެތެރެއިން ކުރެވެން ހުރި ކަންކަން ކޮށް، ހަރަދު ވެސް ކުޑަކޮށްގެންނެވެ.
