ކޮންމެ ހަފްތާއެއްގެ ހޯމަ ދުވަހު ނޫސްވެރިންނާ ބައްދަލުކުރައްވަން މުހައްމަދު މުއިއްޒު ވެވަޑައިގެންނެވި ވައުދާ ހިލާފަށް އެމަނިކުފާނު ނޫސްވެރިންނާ ބައްދަލުނުކުރައްވާތާ ވިދިވިދިގެން އަށް ހަފްތާވެއްޖެ އެވެ.
މުއިއްޒު އިއްޔެ ނޫސްވެރިންނާ ބައްދަލުނުކުރެއްވީ ކީއްވެގެންތޯ އަދަދު އިން ސުވާލުކުރުމުން ރައީސް އޮފީހުގެ ތަރުޖަމާނު މުހައްމަދު ހުސައިން ޝަރީފް (މުންދު) މިހާތަނަށް ޖަވާބު ދެއްވާފައެއް ނުވެ އެވެ.
މުންދު މީގެކުރިން ވިދާޅުވީ މުއިއްޒަށް ވަގުތުވީ މިންވަރަކުން ނޫސްވެރިންނާ ބައްދަލުކުރައްވާނެ ކަމަށެވެ. ނަމަވެސް އަށް ހަފްތާވެގެންދިޔައިރުވެސް އެމަނިކުފާނަށް ނޫސްވެރިންނާ ބައްދަލުނުކުރެއްވުމުން އެކަމާ ނޫސްވެރިން ދަނީ ކަންބޮޑުވުން ފާޅުކުރަމުންނެވެ.
މުއިއްޒު އެންމެ ފަހުން ނޫސްވެރިންނާ ބައްދަލުކުރެއްވީ ޖޫން 29، ގަ އެވެ. އޭގެ ފަހުން އަށް ހަފުތާ ފާއިތުވެގެންދިޔައިރު، ހަތް ހަފުތާގެ ހޯމަ ދުވަސް ބަންދު ދުވަހަކާ ދިމާނުވާކަން ފާހަގަކުރެވެ އެވެ.
މި އަހަރުގެ މާޗު މަހުން ފެށިގެން ކޮންމެ ހަފުތާއަކު ވެސް ނޫސްވެރިންނާ ބައްދަލުކުރައްވާނެ ކަމަށް މުއިއްޒު ވިދާޅުވީ މި އަހަރުގެ ރިޔާސީ ބަޔާން އިއްވަވަމުން ފެބްރުއަރީ 5، ގަ އެވެ.
މުއިއްޒު އެހެން ވިދާޅުވި ނަމަވެސް، މި ފަހަކަށް އައިސް ގިނަ ހަފުތާތަކުގައި މާލޭގައި ހުންނެވާއިރުވެސް، ނޫސްވެރިންނާ ބައްދަލެއް ނުކުރައްވަ އެވެ. އެމަނިކުފާނު އެންމެ ފަހުން ވެސް ނޫސްވެރިންނާ ބައްދަލުކުރެއްވީ ތިން ހަތުފާގެ މެދުކެނޑުމަކަށްފަހު އެވެ.
މާޗު 2، ގައި ނޫސްވެރިންގެ ބައްދަލުވުންތައް ބާއްވަން ފެށި ފަހުން 27 ހަފުތާ ފާއިތުވެގެން ގޮސްފައިވާއިރު އޭގެ ތެރެއިން މުއިއްޒުއަށް ނޫސްވެރިންނާ ބައްދަލުކުރެވިފައިވަނީ އަށް ހަފުތާގަ އެވެ.
ނޫސްވެރިންނާ ކޮންމެ ހަފުތާއަކު ބައްދަލު ކުރައްވާނެ ކަމުގެ ވައުދާއެކު މާޗު މަހު ނޫސްވެރިންގެ ބައްދަލުވުންތައް ބާއްވަން ފެށުމުގެ ކުރިން، ނޫސްވެރިންގެ ބައްދަލުވުމެއް ބޭއްވީ މެއި 3، 2025، ގަ އެވެ. އެއީ އެމަނިކުފާނުގެ ވެރިކަމުގައި ބޭއްވި ދެވަނަ ނޫސްވެރިންގެ ބައްދަލުވުމެވެ. މި ދައުރުގެ ފުރަތަމަ ނޫސްވެރިންގެ ބައްދަލުވުން މުއިއްޒު ބޭއްވެވީ ޑިސެމްބަރު 5، 2023، ގަ އެވެ.
