ސަރުކާރުން ގެންގުޅޭ ޑޮލަރު މާރުކުރުމުގެ ސިޔާސަތާމެދު ހިތްހަމަނުޖެހޭތީ ރައީސް މުހައްމަދު މުއިއްޒުގެ ޓޫރިޒަމް އެޑްވައިޒަރުގެ މަގާމުން މުހައްމަދު ހަލީލް މިއަދު އިސްތިއުފާ ދެއްވައިފި އެވެ.
"އަދަދު" އަށް އިތުބާރު ހުރި މަސްދަރަކުން މައުލޫމާތު ލިބިފައިވާ ގޮތުގައި، ހަލީލް މަގާމުން މިއަދު އިސްތިއުފާ ދެއްވީ ރިސޯޓުތަކުގެ އާމްދަނީގެ 40 ޕަސެންޓް ޑޮލަރު މާރުކުރުން މަޖުބޫރުކުރާ ގޮތަށް ގާނޫނު ފާސްކުރުމާ ގުޅިގެންނެވެ.
މިކަމާ ބެހޭ ގޮތުން މައުލޫމާތު އެނގޭ ފަރާތަކުން ބުނީ، ޑޮލަރު މާރުކުރުމުގެ ސިޔާސަތު އެގޮތަށް ބައްޓަން ނުކުރުމަށް ހަލީލުގެ އިތުރުން ފަތުރުވެރިކަމުގެ ދާއިރާގެ އެހެން އިސް ބޭފުޅުންވެސް ސަރުކާރަށް ލަފާދެއްވި ކަމަށެވެ.
"އަޅުގަނޑަށް އެނގޭ ގޮތުގައި ހަލީލު އަދި ޓޫރިޒަމް ދާއިރާގެ އެހެން މީހުން ވެސް ލަފާ ދިން މިކަން ނުކުރަން. 20 ޕަސެންޓު މާރުކުރަން ޖެހޭ ގޮތަށް ހެދުމުން ވެސް ލަފާ ދިން އަސްލު މައްސަލަތައް ހައްލު ނުކޮށް ޑޮލަރުގެ މައްސަލަ ހައްލު ނުވާނެ ކަމަށް،" އެ މަސްދަރުން ބުންޏެވެ.
"އެހެންވެ ހަލީލް ބޭނުންފުޅު ނުވީ ބަސްނުވިކޭ އޮޑިއެއްގައި ހުންނަން."
މިކަމާ ގުޅޭ ގޮތުން ހަލީލުގެ ބަހެއް ހޯދުމަށް ކުރި މަސައްކަތް އަދި ކާމިޔާބެއް ނުވި އެވެ.
ފުޅާ ދާއިރާއެއްގައި ރިސޯޓް ހިންގާ "ޕަލްސް" ކުންފުނީގެ މެނޭޖިން ޑިރެކްޓަރު އަދި "މަންތާ އެއާ" ގެ ހިއްސާދާރު ހަލީލު އަކީ މި ސަރުކާރުގެ އިކޮނޮމިކް ކައުންސިލްގެ ވެސް މެންބަރެކެވެ.
