ކުށްކޮށްގެން ހޯދާ މުދަލާ ގުޅޭ ބިލެއް އެކުލަވާލައި ސަރުކާރުގެ ފަރާތުން ރައްޔިތުންގެ މަޖިލީހަށް މިއަދު ފޮނުއްވާފައިވާ ކަމަށް ރައީސުލްޖުމްހޫރިއްޔާ މުޙައްމަދު މުއިއްޒު ވިދާޅުވެއްޖެ އެވެ.
މުއިއްޒު އެކްސްގައި ކުރެއްވި ޕޯސްޓެއްގައި ވިދާޅުވީ، މި ބިލު ހުށަހެޅުމުގެ މައިގަނޑު ބޭނުމަކީ ޖިނާއީ ބޮޑެތި ކުށްތައް ކުރާ ފަރާތްތަކުން ނުހައްގުން ހޯދާ މުދާ އެ ފަރާތްތަކުގެ ކިބައިން ނަގައި، އެ މުދަލުން އިތުރު މަންފާ ހޯދޭނެ މަގުތައް ބަންދުކުރުމަށްޓަކައި ގާނޫނީ އޮނިގަނޑެއް ތައާރުފުކުރުން ކަމަށެވެ.
"މީގެ ސަބަބުން ޖިނާއީ ބޮޑެތި ކުށްތައް ކުރާ ފަރާތްތަކުން އެފަދަ ކުށް ކޮށްގެން ހޯދާ މުދަލުން މާލީ މަންފާ ހޯދުން ހުއްޓުވޭނެ. އަދި އެކިފަރާތްތަކުން ޖިނާއީ ބޮޑެތި ކުށްކޮށްގެން ހޯދާފައިވާ ދައުލަތުގެ މުދާ ދައުލަތަށް ނެގުމުގައި މިހާރު ދިމާވެފައިވާ ގާނޫނީ މައްސަލައަށްވެސް މިބިލުން ޙައްލެއް ލިބިގެންދާނެ،" މުއިއްޒު ވިދާޅުވި އެވެ.
ކުށްކޮށްގެން ހޯދާ މުދަލާއި ފައިސާ ދައުލަތަށް ނަގާ ނިޒާމު ހަރުދަނާކުރުމަށް އެސެޓް ރިކަވަރީއަށް ހާއްސަ ގާނޫނެއް އުފެއްދުމަށް އެންޓި-ކޮރަޕްޝަން ކޮމިޝަން (އޭސީސީ) އިން ވެސް މީގެ ކުރިން ވަނީ ލަފާދީފަ އެވެ. އޭސީސީގެ ދިރާސާއަކުން ދައްކާ ގޮތުގައި، ކުށްކޮށްގެން ހޯދާ މުދާ ނެގޭނެ ގާނޫނީ ނިޒާމެއް އޮތް ނަމަވެސް، ކޮރަޕްޝަނުގެ ކުށްތަކުން ހޯދާ މުދަލާއި، ކުށް ކުރަން ބޭނުންކުރި މުދާ ދައުލަތަށް ނެގުމުގައި ގޮންޖެހުންތަކެއް ހުރިކަން ފާހަގަކުރެވިފައިވެއެވެ.
ރާއްޖޭގައި ކުށްކޮށްގެން ފައިސާ ހޯދައި، ލޯންޑާކުރާ 30 ކުންފުންޏެއް
އެފަދަ ކުންފުނިތަކާއެކު ސަރުކާރު ހިއްސާވާ ކުންފުނިތަކުން މުއާމަލާތް ކުރޭ. އެއީ ގޭންގުތަަކަށް ދައުލަތުގެ ތެރެއިން ފައިސާ ލިބި އެ ގޭންގުތަކަށް އިތުރު ބާރުވެރިކަން ލިބުމަށް މަގުފަހިވެގެންދާ ކަމެއް.
މާލޭގައި ހަރަކާތްތެރިވާ ގޭންގުތަކުން ކުށްކޮށްގެން ހޯދާ ފައިސާ ލޯންޑާކުރުމަށް "ޕޭޕާ ކުންފުނިތައް" ހަދައިގެން މުއާމަލާތްކުރާ ކަން ފާހަގަކުރެވިގެން، ހޯމްލޭންޑް ސެކިއުރިޓީގެ އެންގުމަށް 30 ކުންފުންޏެއްގެ ލިސްޓެއް އެކުލަވާލައި، އެފަދަ ވިޔަފާރިތަކާއެކު މުއާމަލާތް ނުކުރުމަށް ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ) އިން ވަނީ ސަރުކާރު ކުންފުނިތަކަށް އަންގާފައެވެ.
