މީލާދީ އަހަރެއްގެ ތެރޭގައި 25 މިލިއަން ޑޮލަރަށް ވުރެ ބޮޑު އާމްދަނީއެއް ލިބޭ ޓޫރިޒަމް ވިޔަފާރިތައް ނޫން އެހެން ވިޔަފާރިތަކަށް ލިބޭ އާމްދަނީގެ 40 ޕަސެންޓު މާރުކުރަން ޖެހޭ ގޮތަށް ހަދަން ރައްޔިތުންގެ މަޖިލީހުން މިއަދު ފާސްކޮށްފި އެވެ.
ބޭރު ފައިސާއާ ބެހޭ ގާނޫނުގައި ބުނާ ކެޓެގަރީ-ސީ އަށް ގެނައި އެންމެ ބޮޑު ބަދަލަކީ، މާރުކުރަން ޝަރުތު ހަމަވާ އާމްދަނީގެ މިންވަރު އަހަރަކު 15 މިލިއަން ޑޮލަރުން 25 މިލިއަން ޑޮލަރަށް މަތިކޮށްފަ އެވެ. މިއީ މަޖިލީހަށް ބިލު ވެއްދި އިރު ވެސް ހުށަހަޅާފައި އޮތް ގޮތެވެ.
މިހެން ނަމަވެސް، ކެޓެގަރީ ސީ ގައި ހިމެނޭ ވިޔަފާރިތަކުން 40 ޕަސެންޓު މާރުކުރަން ޖެހޭ ގޮތަށް ހެދުމަކީ ކުރިން ހުށަހަޅާފައި އޮތް ކަމެއް ނޫނެވެ. ހަމައެހެންމެ، މި ބިލު ދިރާސާކުރި މާލިއްޔަތު ކޮމިޓީން ތަޅުމަށް ފޮނުވި ކޮމިޓީ ރިޕޯޓާއި އަލުން ދިރާސާކޮށްފައި ފޮނުވި ރިޕޯޓުގައި ވެސް މި ކަން ހިމަނާފައި ނެތެވެ.
ގާނޫނުގައި މި ބައި ހިމަނަން ހުށަހެޅީ، ބިލު އިތުރަށް ދިރާސާކުރުމަށް ފަހު އަލުން ތަޅުމަށް ފޮނުވި ރިޕޯޓަށް ބަހުސްކުރިއިރުގައި އެވެ. މި ބަދަލުތައް ހުށަހެޅުއްވީ ފުނަދޫ ދާއިރާގެ މެންބަރު މުހައްމަދު މަމްދޫހެވެ. މި ބަދަލުތައް ބިލުގައި ހިމަނަން ވޯޓު ދިނީ 47 މެންބަރުންނެވެ. ދެކޮޅަށް ވޯޓު ދިނީ 12 މެންބަރުންނެވެ.
ކެޓެގަރީ ސީ ގައި ހިމެނޭ ވިޔަފާރިތަކުގެ ތެރެއިން 40 ޕަސެންޓު މާރުކުރަން ނުޖެހެނީ ސައްތައިންސައްތަ ދިވެހިން ހިއްސާވާ ކުންފުނިތަކެވެ. މިއަދު ފާސްކުރި ބިލުގައި ހުށަހަޅާފައި ވަނީ އެ ކުންފުނިތަކުން މާރުކުރަން ޖެހޭނީ އާމްދަނީގެ ހަތް ޕަސެންޓު ކަމަށެވެ.
ސަރުކާރުން ބުނަނީ ބޭރު ފައިސާގެ ގާނޫނަށް ގެންނަ ބަދަލުތަކާއި ތަންފީޒީ ކަންކަން ހަރުކަށިކުރަން އަޅާ ފިޔަވަޅުތަކާއެކީ، ޑޮލަރުގެ ކަޅު ބާޒާރު ނައްތާލައި، މި ތާށިކަން ހަމައަކަށް އެޅުވޭނެ ކަމަށެވެ. ނަމަވެސް މި ކަމާ ދެކޮޅެ ހަދާ އިގުތިސޯދީ މާހިރުންނާއި އިދިކޮޅުން ބުނަނީ މި ފިޔަވަޅުތަކުގެ ސަބަބުން ޑޮލަރު މައްސަލަ އިތުރަށް ގޯސް ވެދާނެ ކަމަށެވެ.
