ވެރިކަން ކުރާ ޕީޕަލްސް ނެޝަނަލް ކޮންގްރެސް (ޕީއެންސީ) އަށް ރައްޔިތުންގެ މަޖިލީހުގެ މެޖޯރިޓީ ލިބުމުން ޑޮލަރުގެ އަގު ތިރިކުރާނެ ކަމުގެ ޔަގީންކަން އިކޮނޮމިކް މިނިސްޓަރު ސައީދު ދެއްވިތާ ދެ އަހަރު ވެގެން ގޮސްފައިވާއިރު އޭރު އެހެން ވިދާޅުވެ ދެއްކެވި ވާހަކަތައް މީޑިއާތަކުން އޮޅުވާލި ކަމަށް ވިދާޅުވެ ސައީދު ދޮގު ހައްދަވައިފި އެވެ.
ރައީސް އޮފީހުގައި ބޭއްވި ނޫސްވެރިންގެ ބައްދަލުވުމެއްގައި ނޫސްވެރިޔަކު ކުރި ސުވާލަކަށް ޖަވާބު ދެއްވަމުން ސައީދު އެއީ މަޖިލިސް އިންތިހާބުގެ ކެމްޕޭނުގެ ތެރޭގައި ދެއްކެވި ވާހަކައެއްގެ ބައެއް ކަމަށެވެ. އެގޮތަށް އޭނާ ދެއްކި ވާހަކަތައް ރިޕޯޓުކުރުމަކީ އޮޅުވާލުމަށް ކޮށްފައިވާ ކަމެއް ކަމަށް ސައީދު ވިދާޅުވި އެވެ.
"އަޅުގަނޑު ސަރުކާރަށް މެޖޯރިޓީ ލިބިއްޖެނަމަ ރަސްމީ ރޭޓަށް ޑޮލަރު ގެނައުމަށް މަސައްކަތްކުރާނެ ވާހަކަ އެއީ ވާހަކައެއްގެ މުޅި ޖުމުލަ ބޮޑު ސްޕީޗެއްގެ ތަންކޮޅެއް ތި ވިދާޅުވަނީ. އޭގައި ދިޔަ އަނެއް ބައިބައި ވެސް އަޑު އައްސަވާ، މިއީ ވެސް މެނިޕިއުލޭޓު ކުރުމޭ، ޖުމުލަ ވާހަކައަކީ ރާއްޖޭގެ އިގުތިސޯދު ހަމައަކަށް އެޅުވުމާއި، ދަރަނީގެ ދަންތުރައިން ސަލާމަތްކުރުމާއި، ބޮޑު ދަރަނި އަދާކުރުމުގައި ރައީސަށް ވާގިވެރިވާނެ މަޖިލިސް މެޖޯރިޓީއެއް ލިބިއްޖެނަމަ ވަރަށް ފަސޭހަވާނޭ މި ކަންކަން ކުރަން،" އޭރު ދެއްކި ވާހަކަތައް އޮޅުވާލަމުން ސައީދު މިއަދު ވިދާޅުވި އެވެ.
އެހެން ނަމަވެސް، ވަރަށް ސާފު ސަރީހަ އިބާރާތުން ސައީދު ރައްޔިތުންގެ މަޖިލިސް އިންތިހާބުގެ ކެމްޕެއިނުގެ ދުވަސްވަރު، ލ. މާވަށުގައި ބޭއްވި ޖަލްސާއެއްގައި ވިދާޅުވީ ޑޮލަރުގެ އަގު 15 ރުފިޔާ 42 ލާރިއަށް ވުރެ ވެސް ބޮޑަށް ތިރި ކުރާނެ ކަމަށެވެ.
"ހަމައެކަނި އަޅުގަނޑުމެންނަށް މަޖިލީހުގެ މެޖޯރިޓީ ލިބިގެން ވިޔަސް ދިވެހި ރުފިޔާ ޑޮލަރުގެ ކުރިމަތީގައި 30-40 ޕަސެންޓް ވަރުގަދަވެގެންދާނެ. ކޮބައިތޯ ނަތީޖާއަކަށް ވާނެ ކަމަކީ. 15.42 އަކަށްވުރެ ވެސް ޑޮލަރު ރޭޓް ދަށަށް ދިޔުމެއް ނޫންތޯ މުސްތަގުބަލުގައި،" ސައީދު އެއިރު ވިދާޅުވެފައިވެ އެވެ.
އެ އިންތިހާބުގައި ރައްޔިތުން ވަނީ ސަރުކާރު ހިންގާ ޕާޓީއަށް ސުޕަމެޖޯރިޓީ ދީފަ އެވެ. މަޖިލީހުގެ 93 ގޮނޑީގެ ތެރެއިން 75 ގޮނޑި ކާމިޔާބު ކުރީ ޕީއެންސީ އެވެ.
ސަރުކާރުން ވަނީ ޑޮލަރު ރޭޓު ހަމައަކަށް އެޅުވުމުގެ ގޮތުން ރަސްމީ ރޭޓުގައި ނޫނީ މަނާ ނުކުރަން އަންގައި، އެމްއެމްއޭ އާއި ފުލުހުންނާ ގުޅިގެން އޮޕަރޭޝަނެއް ފަށާފަ އެވެ. މި އޮޕަރޭޝަނުގެ ތެރެއިން ޑޮލަރު ލިބޭ ވިޔަފާރިތަކާއި ޑޮލަރު މާރުކުރާ ވިޔަފާރިތަކާއި އެއްވެސް ހުއްދައެއް ނެތި ކަޅު ބާޒާރުގައި ޑޮލަރު މާރުކުރަން އުޅޭ މީހުން ނުވަތަ "ޑީލަރުން" ނަށް އަމާޒުކޮށްގެން މައްސަލަތަކެއްގެ ތަަހުގީގު ފަށާފަ އެވެ.
ޑޮލަރުގެ ކަޅު ބާޒާރުގައި ރެކޯޑު އަގަކަށް ޑޮލަރުގެ އަގު އުފުލިފައި ހުންނަތާ އެތައް މަސްތަކެއް ވޭތުވެފައިވާއިރު، ސައީދު މިއަދު ވަނީ ރޭޓު ތިރިއަށް ގޮސްފައިވާ ކަމަށް ވިދާޅުވެފަ އެވެ.
