ދިވެހިރާއްޖެއިން ޑޮލަރު ނުލިބުމާއި ޑޮލަރުގެ އަގު ބޮޑުވާ މައްސަލައިގައި ހޯމް މިނިސްޓަރު އަލީ އިހުސާން އާންމު ރައްޔިތުންނަށް އަދި ވިޔަފާރިވެރިންނަށް އަނެއްކާ ވެސް އިންޒާރުތަކެއް ދެއްވައިފި އެވެ.
ސަރުކާރުން ހުއްދައެއް ނަގައިގެން މެނުވީ އެންމެ ޑޮލަރެއް ވިއްކި ނަމަވެސް ނުގަތް ގަތް ނަމަވެސް ގާނޫނީ ގޮތުން ހަރުކަށި ފިޔަވަޅު އަޅަމުންދާނެ ކަމަށް އިހުސާން ވަނީ މީގެ ކުރިން ވެސް ވިދާޅުވެފަ އެވެ. ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމެއްގައި އޭނާ ވަނީ އެ އިންޒާރުތައް އަނެއްކާވެސް ތަކުރާރު ކުރައްވައިފަ އެވެ.
"މިހާރު އަޅުގަނޑުމެންނަށް ފާހަގަވަމުންދާ މައްސަލަތަކުގެ ތެރޭގައި ވިޔަފާރިވެރިންނަށް ސީދާ ޑޮލަރު އާން ކުރާ ފަރާތްތަކުން ވިއްކަމުންދާކަން. މި ދެންނެވީ ބޭންކެއް މެދުވެރިނުކޮށް ނުވަތަ އެކްސްޗޭންޖެއް ވެސް މެދުވެރިނުވެ. އެ ދެ ފަރާތުގެ ވެސް ނެތް މަނީ އެކްސްޗޭންޖް ކުރުމުގެ ހުއްދައެއް. އެހެންވީމަ މިއީ ރާއްޖޭގެ ގާނޫނު މިވަގުތު ބުނާ ގޮތުން ޖިނާއީ ކުށެއް މިއީ،" އިހުސާން ވިދާޅުވި އެވެ.
ހުއްދަ ނެތި ޑޮލަރުގެ ވިޔަފާރި ކުރުމަށްފަހު ލިބޭ ފައިސާ ބޭނުން ކުރުމަކީ މަނީ ލޯންޑަރިން ކަމަށް އިހުސާން ކުރިން ވިދާޅުވެފައިވާ ބަސް ވެސް އޭނާ ތަކުރާރު ކުރެއްވި އެވެ.
"ކުރިން ވެސް އަޅުގަނޑު ބުނިން، ޖިނާއީ ކުށެއް ކުރެވިފައި ދެން އެ ފައިސާ އަމިއްލަ ކަމަކަށް ނުވަތަ ވިޔަފާރީގެ ގޮތުގައި ބޭނުން ކުރުމަކީ މަނީ ލޯންޑަރިންނޭ،" މިނިސްޓަރު ވިދާޅުވި އެވެ.
ހުއްދަ ނުނަގައި ޑޮލަރުގެ ވިޔަފާރި ކުރާ ފަރާތްތަކަށް ފިޔަވަޅު އަޅަމުންގެންދަވާނެ ކަމަށް ވެސް މިއަދުގެ ނޫސްވެރިންގެ ބައްދަލުވުމުގައި އިހުސާން ވިދާޅުވި އެވެ.
"ގަވާއިދާ ހިލާފަށް ރާއްޖޭގައި ކުށްތަކަށް އަރައިގަނެފައި، އެއްވެސް ވިޔަފާރިއެއް، ދޭސީއަކަށް ބިދޭސީއަކަސް އުޅޭ ކަމަށްވަންޏާ އެ ފަރާތްތަކާ ދޭތެރޭގައި އަޅުގަނޑުމެން ފިޔަވަޅު އަޅާނަން،" އޭނާ ވިދާޅުވި އެވެ.
އޭގެ އިތުރުން، އެމީހެއްގެ ނަމުގައި ގެންނަ ބިދޭސީ މީހާ ކުށް ކުރާ ނަމަ ދިވެހި މީހާއަށް ފިޔަވަޅު އަޅުއްވާނެ ކަމަށް ވެސް އިހުސާން މިއަދު ވިދާޅުވި އެވެ.
"މިހާރު ހެދިފައި ހުރި ގާނޫނުތަކުގެ ގަވާއިދުތަކުގެ ތެރެއިން އެ ބިދޭސީ މީހާ ދޭތެރޭގައި އެ ދިވެހި މީހާ އިހުމާލުވި ކަމަށް މި ބެލެވެނީ. އެ އިހުމާލަކީ، އިހުމާލުވާ ކޮންމެ ބިދޭސީއަކަށް ދިވެހި މީހާ ޖޫރިމަނާ ކުރެވޭ،" އިހުސާން ވިދާޅުވި އެވެ.
