ޑޮލަރުން ކަޅު ބާޒާރުގައި ބޮޑު ފައިދާއެއް ހޯދަމުން ދިޔަ ބައެއް ވިޔަފާރިތަކުން މުވައްޒަފުންނަށް މުސާރަ ދިނީ ކަޅު ބާޒާރުގައި ޑޮލަރު ވިއްކައިގެން ލިބުނު ފައިދާއިން ކަމަށް އިކޮނޮމިކް މިނިސްޓަރު މުހައްމަދު ސައީދު ވިދާޅުވެއްޖެ އެވެ.
ޑޮލަރުގެ ކަޅު ބާޒާރު ހުއްޓުވުމުގެ އޮޕަރޭޝަނާ ގުޅޭ މައުލޫމާތު ދޭން އިއްޔެ ބޭއްވި ނޫސްވެރިންގެ ބައްދަލުވުމުގައި ވަކި ބަޔެއްގެ ނަން ނުގަނެ ސައީދު ވިދާޅުވީ ޑޮލަރަކުން ހަތަރު ރުފިޔާ އާއި ފަސް ރުފިޔާ ވަރުގެ ފައިދާއެއް ޖައްސަމުން ދިޔަ ބަޔަކު އުުޅުނު ކަމަށެވެ. އަދި، މިހާރު ކުރިއަށްދާ އޮޕަރޭޝަނުގެ ތެރެއިން އެއީ ކޮން ބަޔެއް ކަން އެނގެމުން އަންނަ ކަމަށް އޭނާ ވިދާޅުވި އެވެ.
މީގެ ކުރިން ވެސް ވިދާޅުވެފައިވާ ގޮތަށް އިއްޔެ ވެސް ސައީދު ވަނީ މިކަން ކުރާ ވިޔަފާރިތަކުން އަމިއްލަ އަގެއް އުފައްދައިގެން ޑޮލަރު ވިއްކަމުން އަންނަ ވާހަކަ ތަކުރާރުކުރައްވާފަ އެވެ. އެކަން އެ ގޮތަށް ކުރަނީ، އޭނާ ވިދާޅުވި ގޮތުގައި، އެ ވިޔަފާރިތަކަށް އޭގެން ބޮޑު މަންފާއެއް ލިބޭތީ އެވެ. އަދި، އެ ފައިދާ އެކި ގޮތްގޮތަށް އެހެން ކަންކަމަށް ހަރަދުކުރަމުން އަންނަ ކަމަށް އޭނާ ވިދާޅުވި އެވެ.
"އެ އަންނަ ޑިފަރެންސްގައި ރީއިންވެސްޓު ކުރަން ކޮންމެ ވެސް ކަމެއް ކުރަނީ މިސާލަކަށް އެ ފައިދާ. ކުރިން ކޮންމެ ވެސް ކުޑަ ވިޔަފާރިއެއް ކުރަމުން ގޮސްފަ، ނުވަތަ ބައެއް ތަންތަނުގައި އެބަހުރި މުޅި މުސާރަ ޝީޓު އެއްކޮށް، ބްލެކް މާކެޓް ޑިފަރެންސުން ވެސް މެނޭޖުކޮށްފަ. މުޅި މުސާރަ ޝީޓު އެއްކޮށް. މި ކިޔަނީ ބޮޑެތި ކުންފުނިތަކުގެ ވާހަކަ،" ސައީދު ވިދާޅުވި އެވެ.
ކަޅު ބާޒާރުން ފައިދާ ހޯދައިގެން، އެ ފައިދާ އެހެން ކަންކަމަށް ހަރަދު ކުރުން ސައީދު ވަނީ ތަކެތީގެ އަގު އުފުލުމާ ވެސް ގުޅުވާލާފަ އެވެ. އޭނާ ވިދާޅުވީ، ބާޒާރުގައި ތަކެތީގެ އަގު އުފުލެނީ ޑޮލަރުގެ އަގު "އާޓިފިޝަލީ މެނިޕިއުލޭޓު" ކުރާތީ ކަމަށެވެ.
ސައީދު ވިދާޅުވާ ގޮތުން ތަކެތީގެ އަގުބޮޑުވަނީ ޑޮލަރު ރޭޓު "މެނިޕިއުލޭޓްކޮށް"، ތަކެތި އަގުބޮޑުކޮށް ވިއްކަން ހިތްވަރުދޭތީ
ތަކެތީގެ އަގުބޮޑުވަނީ ސިޔާސީ ބޭފުޅުންނާއި ބައެއް ވިޔަފާރިވެރިން ޑޮލަރުގެ ރޭޓް އާޓިފިޝަލީ މެނިޕިއުލޭޓްކޮށް، އަގުބޮޑުކޮށް ތަކެތި ވިއްކަން ހިތްވަރުދޭތީކަމަށް މިނިސްޓަރު ސައީދު ވިދާޅުވި. ޑޮލަރުގެ ރޭޓް ދަށްވި ނަމަވެސް، ވިޔަފާރިވެރިން ބޮޑު އަގުގައި މުދާ ގަނެފައި ހުރުމުން ތަކެތީގެ އަގު ކުއްލިއަކަށް ދަށަށް ނުދާނެކަމަށް މިނިސްޓަރު ވިދާޅުވި.
ސައީދު ވަނީ މި ގޮތަށް "މާކެޓް ރިއާލިޓީ" އިން ދުރަށް ޖެހި، އަގު ކަނޑައަޅައިގެން ތިބުމަކީ ދެމެހެއްޓޭނެ ކަމެއް ނޫން ކަން އެ ކަން ކުރާ ވިޔަފާރިތަކަށް ވެސް އެނގޭ ކަމަށް ވެސް ވިދާޅުވެފަ އެވެ. އަދި، ސަރުކާރަށް ވެސް "އާޓީފިޝަލް" ހައްލުތަކެއް ހޯދަން ޖެހުނީ "އާޓިފިޝަލީ" އަގު ކަނޑައަޅާތީ ކަމަށް އޭނާ ވިދާޅުވި އެވެ.
"އަޅުގަނޑުމެންނަށް، ހުރިހާ ފަރާތްތަކަކަށް ވެސް، ޕޮލިސީ މޭކްކުރަން ތިބޭ ފަރާތްތަކަށް ވެސް އަދި މާކެޓުގައި ހަރަކާތްތެރިވާ ފަރާތްތަކަށް ވެސް، އިންވެސްޓްކޮށް، ރީއިންވެސްޓް ކުރާ ފަރާތްތަކަށް ވެސް، ވިޔަފާރިކުރާ ފަރާތްތަކަށް ވެސް ގަބޫލުކުރަން ޖެހޭ އެއް ހަގީގަތަކީ، މެނިޕިއުލޭޓުކޮށްގެން މާކެޓެއްގައި ރޭޓު މައްޗަށް ގެންދިޔުމަކީ ލާސްޓް ވާނެ ކަމެއް ނޫން. ދެކޮޅު ޖެއްސޭނެ ކަމެއް ނޫން. އަދި ސަސްޓެއިން ކުރެވޭނެ ކަމެއް ވެސް ނޫން،" ސައީދު ވިދާޅުވި އެވެ.
ޑޮލަރު މައްސަލައިގައި ބާޒާރުގެ ހަގީގަތްތަކާ ނުބައްދަލު އަގު ކަނޑައަޅާ ކަމަށާއި އޭގައި "ސްޕެކިއުލޭޓިވް" އަގެއް އެކުލެވޭ ކަމަށް މޯލްޑިވްސް މަނިޓަރީ އޮތޯރިޓީ (އެމްއެމްއޭ) ގެ ގަވަރުނަރު އަހުމަދު މުނައްވަރު ވެސް ވަނީ ކުރިން ހާމަކުރައްވާފަ އެވެ. މުނައްވަރު ވެސް ވިދާޅުވީ، ޑޮލަރު ވަންނަ ވަރަށް ބަލާއިރު، އެހާ ބޮޑަށް ޑޮލަރުގެ އަގު އުފުލެން ޖެހޭ ސަބަބެއް ނުވިސްނޭ ކަމަށެވެ.
ސަރުކާރާއި މަރުކަޒީ ބޭންކުން މިހެން ބުނި ނަމަވެސް ބައެއް އިގުތިސޯދީ މާހިރުންނާއި އިދިކޮޅު ސިޔާސީ ޕާޓީތަކުން ބުނަނީ، ޑޮލަރު ތާށިވެ، އަގު އުފުލުނީ ސަރުކާރުގެ ހަރަދުތައް ކުޑަނުކުރުމާއި، ބައިވަރު ޑޮލަރު ބޭރުވާ ފަދަ، އިސްރާފު ބޮޑު މަޝްރޫއުތަކާއި، ހަރަދުތައް ކުރުމުންނެވެ. އަދި، މިހާ މައްސަލަ ގޯސްވީ ބޭރު ފައިސާއިން ދައްކަން ޖެހޭ ބޮޑެތި ދަރަނިތަކެއް ބޯމަތިވެފައި ވަނިކޮށް، ބޭރުން ފައިނޭންސިން ނުހޯދާ، އެތެރޭގެ ބާޒާރުން ޑޮލަރުތައް ނެގުމުން ކަމަށް ވެސް އަންނަނީ ބުނަމުންނެވެ.
