ކަޅު ބާޒާރުގައި އަމިއްލަ އަގެއް އުފައްދައިގެން "އާޓިފިޝަލް" ރޭޓުގައި ޑޮލަރު ވިއްކުން ހުއްޓުވަން ސަރުކާރުން އެޅި ފިޔަވަޅުތަކުގެ ސަބަބުން ކަޅު ބާޒާރުގައި ޑޮލަރު ވިއްކާ އަގު، މި ސަރުކާރުން ވެރިކަމާ ހަވާލުވީއިރު ހުރި ވަރަށް ވުރެ ވެސް ބޮޑަށް ތިރިކުރެއްވިއްޖެ ކަމަށް އިކޮނޮމިކް މިނިސްޓަރު މުހައްމަދު ސައީދު ވިދާޅުވެއްޖެ އެވެ.
ރައީސް އޮފީހުގައި ބޭއްވި ނޫސްވެރިންގެ ބައްދަލުވުމެއްގައި އޭނާއަށް މައުލޫމާތު ލިބިފައިވާ ގޮތް ކަމަށް ބުނެ އޭރު ހުރި އަގަށް ތިރިކުރެވުނު ކަމަށް ސައީދު ވިދާޅުވި ނަމަވެސް، އެއީ ކިހާ ވަރެއް ކަމެއް ވިދާޅެއް ނުވެ އެވެ. އޭނާ ވިދާޅުވީ، މިހާރު އަގު ހުރީ އޭރު އަގު ހުރި ބޭންޑުގައި ކަމަށެވެ.
"މިހާރު އަޅުގަނޑުމެންނަށް އެބަ އެނގޭ ދަށްވަމުންދާ ކަން ރުފިޔާ އެކްސްޗޭންޖް ރޭޓު. މިހާރު އިރާދަކުރެއްވިއްޔާ އަޅުގަނޑަށް ލިބޭ މައުލޫމާތުތަކަށް ބަލާއިރު، ސަރުކާރު ހަވާލުވީއިރުގައި، އަޅުގަނޑުމެންނާ ސަރުކާރު ހަވާލުވީއިރުގައި ހުރި ރޭޓަށް ވުރެ ދަށަށް ގޮސްފަ ވާކަމަށް އަޅުގަނޑުމެންނަށް މައުލޫމާތު ލިބެނީ،" ސައީދު ވިދާޅުވި އެވެ.
މި ކާމިޔާބީއަކީ، ސައީދު ވިދާޅުވި ގޮތުގައި، ސަރުކާރުން އަޅަން ފެށި ފިޔަވަޅުތަކުގެ ނަތީޖާ އެވެ. ކުރިއަށް އޮތް ތަނުގައި ވެސް މި ގޮތަށް ސަރުކާރުން މަސައްކަތް ކުރަމުންދާނެ ކަމުގެ ޔަގީންކަން އަރުވަމުން އޭނާ ވިދާޅުވި އެވެ.
ސަރުކާރުން ވަނީ ޑޮލަރު ރޭޓު ހަމައަކަށް އެޅުވުމުގެ ގޮތުން ރަސްމީ ރޭޓުގައި ނޫނީ މަނާ ނުކުރަން އަންގައި، އެމްއެމްއޭ އާއި ފުލުހުންނާ ގުޅިގެން އޮޕަރޭޝަނެއް ފަށާފަ އެވެ. މި އޮޕަރޭޝަނުގެ ތެރެއިން ޑޮލަރު ލިބޭ ވިޔަފާރިތަކާއި ޑޮލަރު މާރުކުރާ ވިޔަފާރިތަކާއި އެއްވެސް ހުއްދައެއް ނެތި ކަޅު ބާޒާރުގައި ޑޮލަރު މާރުކުރަން އުޅޭ މީހުން ނުވަތަ "ޑީލަރުން" ނަށް އަމާޒުކޮށްގެން މައްސަލަތަކެއްގެ ތަަހުގީގު ފަށާފަ އެވެ.
މި ގޮތަށް ހިންގި އެއް އޮޕަރޭޝަނުގައި ޑޮލަރު އާމްދަނީ ލިބޭ ނައިޑް ޓްރޭޑިންގެ އޮފީސްތައް ވަނީ ބަލާފަ އެވެ. އެހެން އޮޕަރޭޝަނެއްގައި ފުޅާ ދާއިރާއެއްގައި ޑޮލަރު ވިޔަފާރިކުރާ ހަ ބިދޭސީއަކު ދެނެގަނެ، އެ މީހުން ވަނީ ހައްޔަރުކޮށްފަ އެވެ. އޭގެ އިތުރުން، މަނީ އެކްސްޗޭންޖެއްގެ ލައިސަންސް ވެސް ވަނީ ބާތިލުކޮށްފަ އެވެ.
ސަރުކާރުން ބުނަނީ ޑޮލަރުގެ ކަޅު ބާޒާރު ކޮންޓްރޯލް ކުރަނީ ޑޮލަރުން އާމްދަނީ ލިބޭ މަދު ވިޔަފާރިތަކަކުން ކަމަށެވެ. މި ވިޔަފާރިތަކުން ޑޮލަރު ދައުރުކުރުވަނީ މަނީ އެކްސްޗޭންޖުތަކާއި ޑީލަރުން މެދުވެރިކޮށެވެ.
ޑޮލަރުގެ ކަޅު ބާޒާރު ހުއްޓުވުމުގެ އޮޕަރޭޝަން ފެށިކަން އިއުލާންކުރި ދުވަހު ހޯމް މިނިސްޓަރު އަލީ އިހުސާން ހާމަކުރެއްވި ގޮތުގައި، ހުއްދަ ނަގައިގެންނާއި ހުއްދަ ނުނަގާ ހިންގާ ހަތް މަނީ އެކްސްޗޭންޖެއް މޮނީޓާ ކުރިއިރު، ނުވަ މަސް ދުވަހުގެ ތެރޭގައި 76 މިލިއަން ޑޮލަރު މާރުކޮށްފައިވާ ކަން ތަހުގީގަށް ވަނީ އެނގިފަ އެވެ.
ޑޮލަރު މައްސަލަ ހައްލުކުރުމުގެ ގޮތުން ސަރުކާރުގެ ތަންފީޒީ ކަންކަން ހަރުކަށި ކުރުމާއެކުއެކީ، ރިސޯޓުތަކާއި 25 މިލިއަން ޑޮލަރަށް ވުރެ ބޮޑު އާމްދަނީއެއް ލިބޭ ވިޔަފާރިތަކުން މާރުކުރަން ޖެހޭ މިންވަރު ވަނީ އާމްދަނީގެ 40 ޕަސެންޓަށް އުފުލާފަ އެވެ. ސަރުކާރުން ބުނަނީ މިއާ އެކީ، ބޭންކިން ނިޒާމަށް ވަންނަ ޑޮލަރު އިތުރުކުރުމުގެ ގޮތުން ރިސޯޓުތަކާއި ޑޮލަރު ތާށިކަމާއި ބޮޑު އަގުގައި ޑޮލަރު ގަންނަން ޖެހޭ މައްސަލަ ވެސް ހައްލުކުރެވޭނެ ކަމަށެވެ.
އެޑިޓަރުގެ ނޯޓު: ކަޅު ބާޒާރުގައި ޑޮލަރު ވިއްކަން ހުރި އަގު އަދަދު ނޫހަށް އެނގުނަސް އެ މައުލޫމާތު ދައުރުކުރުން ގާނޫނުން މަނާކޮށްފައިވާތީ އެ އަގު ނުޖަހަމެވެ.
