އެމެރިކާގެ "ސްޓޭޓް ސްޕޮންސާސް އޮފް ޓެރަރިޒަމް" ނުވަތަ ޓެރަރިޒަމަށް ވާގިވެރިވާ ގައުމުތަކުގެ ލިސްޓުގައި ސީރިއާ ހިމެނިތާ 47 އަހަރު ފަހުން، އެ ގައުމު އެ ލިސްޓުން އުނިކޮށްފި އެވެ.
އެމެރިކާ އިން ބުނި ގޮތުގައި މި ނިންމުމާއެކު، ސީރިއާގެ އަމިއްލަ ސެކްޓަރަށް އިންވެސްޓްމަންޓްތައް ހޯދުމަށާއި ދުނިޔޭގެ އިގްތިސާދީ ނިޒާމުގެ ތެރެއަށް އެ ގައުމު އަލުން ވަނުމަށް ހުރި އެންމެ ބޮޑެތި ހުރަސްތައް މިހާރު ވަނީ ނެތިގޮސްފަ އެވެ.
އެމެރިކާގެ ސެކްރެޓަރީ އޮފް ސްޓޭޓް މާކޯ ރޫބިއޯ ވިދާޅުވީ، މި ފިޔަވަޅަކީ ބައިނަލްއަގުވާމީ ޓެރަރިޒަމްގެ އަމަލުތަކާ ސީރިއާގެ މިހާރުގެ ސަރުކާރުން މުޅިން ދުރުހެލިވުމަށް އަޅަމުންދާ ހެޔޮ ފިޔަވަޅުތައް ބަލައިގަތުމުގެ ގޮތުން ނިންމި ނިންމުމެއް ކަމަށެވެ.
ޑޮނަލްޑް ޓްރަމްޕްގެ ސަރުކާރުން މިހާރު ވަނީ ސީރިއާގެ އާ ރައީސް އަހުމަދު އަލް-ޝަރާއާ އެކު ގުޅުން ބަދަހިކުރަން ފަށާފަ އެވެ. ކުރިން ހަނގުރާމަވެރި ޖަމާއަތެއްގެ އިސްވެރިއެއްގެ ގޮތުގައި ހުންނެވި ޝަރާއަކީ، އަލްގައިދާއާ ގުޅުން އޮތް ގްރޫޕެއްގެ ލީޑަރަކަށް ވުމުން، އޭނާ ހައްޔަރުކުރުމަށް އެހީތެރިވާ ފަރާތަކަށް އެމެރިކާ އިން މީގެ ކުރިން ބޮޑު އިނާމެއް ވެސް ހުށަހަޅާފައިވާ ބޭފުޅެކެވެ.
ޝަރާ ނިސްބަތްވާ އިސްލާމީ ޖަމާއަތް ކަމަށްވާ ހަޔާތު ތަހުރީރު އަލް-ޝާމް (އެޗްޓީއެސް) ވެސް މިހާރު ވަނީ އެމެރިކާގެ ބައިނަލްއަގުވާމީ ޓެރަރިސްޓް ޖަމާއަތްތަކުގެ ލިސްޓުން އުނިކޮށްފަ އެވެ.
ކުރިން އަލް-ނުސްރާ ފްރަންޓްގެ ނަމުން މަޝްހޫރުވި އެޗްޓީއެސް އަކީ ސީރިއާގައި ހަރަކާތްތެރިވި އަލްގައިދާގެ ގޮފި ނަމަވެސް، 2016 ވަނަ އަހަރު ޝަރާ ވަނީ އެ ނެޓްވޯކާ އޮތް ހުރިހާ ގުޅުމެއް ކަނޑާލާފަ އެވެ.
ސީރިއާގެ ކުރީގެ ރައީސް ބައްޝާރު އަލް-އަސަދުގެ ވެރިކަން ވައްޓާލުމަށް 2024 ވަނަ އަހަރުގެ ފަހުކޮޅު ހަނގުރާމަވެރިން ފެށި ވަރުގަދަ ހަމަލާތަކުގައި އިސްކޮށް އޮތީ އެޗްޓީއެސް އެވެ. އަދި ޝަރާ އިސްވެ ހުންނަވައިގެން އުފައްދާފައިވާ ސީރިއާގެ އިންތިގާލީ ސަރުކާރުގެ ފުރިހަމަ ކޮންޓްރޯލް އޮތީ ވެސް އެ ޖަމާއަތުގެ އަތްމަތީގަ އެވެ.
އެމެރިކާގެ އުންމީދަކީ ރަޝިއާ ނުވަތަ ޗައިނާގެ ނުފޫޒުގެ ބަދަލުގައި، ސީރިއާއަކީ އެމެރިކާގެ މަސްލަހަތު އޮތް ގައުމަކަށް ހެދުމެވެ. ނަމަވެސް، ސީރިއާގެ ސަލާމަތީ ކަންކަން އަދިވެސް އޮތީ ވަރަށް ނާޒުކު ފައްތަރެއްގަ އެވެ. އަދި ރައްޔިތުން ތަމްސީލުކުރާ ސަރުކާރެއް އަދިވެސް ގާއިމުވެފައި ނުވާތީ ބޮޑެތި ނުރައްކާތަކެއް އެބަހުއްޓެވެ. މީގެ އިތުރުން، ސީރިއާގެ އަވަށްޓެރި އިޒްރޭލާއި ތުރުކީއާ ދެމެދު އުފެދިފައިވާ ނުތަނަވަސްކަމުގެ މައި މަރުކަޒަކަށް ވެސް އެ ގައުމު ވަނީ ވެފަ އެވެ.
1979 ވަނަ އަހަރުން ފެށިގެން އެމެރިކާގެ ޓެރަރިޒަމަށް ވާގިވެރިވާ ގައުމުތަކުގެ ލިސްޓުގައި ސީރިއާ އޮތް ނަމަވެސް، އެ ގައުމު އުނިކުރުމުން މިހާރު އެ ލިސްޓުގައި ބާކީ ތިބީ ކިއުބާ، އުތުރު ކޮރެއާ އަދި އީރާނެވެ.
މި ލިސްޓުގައި ހިމެނޭ ގައުމުތަކަށް މާލީ ގޮތުން ދަތިކުރުމުގެ ފިޔަވަޅުތައް އެޅުމާއި، އެމެރިކާގެ ބޭރުގެ އެހީތަކާއި ދިފާއީ ސާމާނު އެކްސްޕޯޓްކުރުން މަނާކުރުން ހިމެނެ އެވެ. އަދި އެފަދަ ގައުމުތަކާއެކު ވިޔަފާރިކުރާ އެހެން ގައުމުތަކާއި ފަރުދުންނަށް ވެސް އަދަބު ދިނުމުގެ ބާރު މި ލިސްޓުގެ ސަބަބުން އެމެރިކާއަށް ލިބިގެންވެ އެވެ.
