އިރާނާއި އެ ގައުމުގެ ވިޔަފާރީގެ ބައިވެރިންނާ ދެކޮޅަށް އަޅާފައިވާ އިގްތިސާދީ ދަތިކުރުމުގެ ފިޔަވަޅުތައް ފުޅާކުރަން އެމެރިކާއިން ނިންމުމާ ގުޅިގެން، ޗައިނާގެ މަސްލަހަތު ހިމާޔަތްކުރާނެ ކަމުގެ ޔަގީންކަން އެ ގައުމުން ދީފި އެވެ.
ޗައިނާގެ ފޮރިން މިނިސްޓްރީގެ ތަރުޖަމާނު ލިން ޖިއާން ވިދާޅުވީ، އެމެރިކާއިން އަޅަމުންދާ "ޣައިރު ގާނޫނީ ދަތިކުރުމުގެ ފިޔަވަޅުތަކާ" ޗައިނާއިން ދެކޮޅު ހަދާ ކަމަށެވެ. އަދި ޗައިނާގެ ހައްގުތައް ރައްކާތެރިކުރުމަށްޓަކައި އަޅަންޖެހޭ "ހުރިހާ ފިޔަވަޅެއް" އަޅާނެ ކަމަށް ވެސް އޭނާ ވިދާޅުވި އެވެ.
މި ވާހަކަތައް ޗައިނާއިން ދައްކާފައި މިވަނީ، އިރާނާއެކު މާލީ މުއާމަލާތްތައް ހިންގާ ކޮންމެ ގައުމެއް އެކަހެރި ކުރާނެ ކަމުގެ އިންޒާރު ދެއްވައި، އެމެރިކާގެ ޓްރެޝަރީ ސެކްރެޓަރީ ސްކޮޓް ބެސެންޓް މިދިޔަ ހޯމަ ދުވަހު އާ ފިޔަވަޅުތަކެއް އިއުލާން ކުރެއްވުމާ ގުޅިގެންނެވެ.
އިރާނުގެ ބަނދަރުތަކަށް އެމެރިކާއިން ހުރަސްއެޅުމުގެ ސަބަބުން ވިޔަފާރީގެ މުއާމަލާތްތައް ދަށްވެފައިވީ ނަމަވެސް، ޗައިނާއަކީ އަދިވެސް އިރާނުގެ ތެޔޮ އެންމެ ގިނައިން ގަންނަ ގައުމެވެ.
ލިން ޖިއާން ވިދާޅުވި ގޮތުގައި ޗައިނާ އާއި އިރާނާ ދެމެދު އޮންނަ އެއްބާރުލުމަކީ އަބަދުވެސް ބައިނަލްއަގުވާމީ ގާނޫނުތަކުގެ އިމުގެ ތެރެއިން ހިންގާ މުއާމަލާތްތަކެކެވެ. އެހެންކަމުން އެ ގުޅުމަށް އެއްވެސް ފަރާތަކުން ހުރަސްއަޅައި ނުފޫޒު ފޯރުވައިގެން ނުވާނެ ކަމަށް އޭނާ ވިދާޅުވި އެވެ.
ބެސެންޓް ވަނީ މި ފިޔަވަޅުތަކަކީ އިރާނާ ދެކޮޅަށް މިހާތަނަށް ހިންގާ "އެންމެ ވަރުގަދަ މާލީ ހަމަލާ" ގޮތުގައި ސިފަކުރައްވާފަ އެވެ. އަދި އިރާނާއެކު އޮންނަ ގުޅުންތައް ކަނޑާލުމަށް އިންކާރުކުރާ ބޭންކުތަކާއި ވިޔަފާރިތަކުން ވެސް، އިރާނަށް ކުރިމަތިވާ އެކަހެރިކަމާ ކުރިމަތިލާން ޖެހޭނެ ކަމުގެ އިންޒާރު އޭނާ ދެއްވި އެވެ.
ވަކި ގައުމުތަކެއްގެ ނަން ފާހަގަކުރެއްވުމުގެ ބަދަލުގައި ބެސެންޓް ވިދާޅުވީ، އިރާނުގެ ސަރުކާރާއެކު ބާއްވާ މުއާމަލާތްތައް ހުއްޓާލުމަށް އެދިވަޑައިގެން އެމެރިކާގެ ރައީސް ޑޮނަލްޑް ޓްރަމްޕް ދުނިޔޭގެ ލީޑަރުންނަށް ފޯނުން ގުޅުއްވާނެ ކަމަށެވެ.
އެހެން ނަމަވެސް، ޗައިނާގެ ބޭންކުތަކާ ގުޅޭގޮތުން ކުރެވުނު ސުވާލަކަށް ޖަވާބު ދެއްވަމުން ބެސެންޓް ވިދާޅުވީ، އެމެރިކާގެ ދަތިކުރުމުގެ ފިޔަވަޅުތަކުން ސަލާމަތްވެވޭނެ އެއްވެސް ފަރާތެއް ނުހުންނާނެ ކަން ސާފުކޮށްދޭން ބޭނުންވާ ކަމަށެވެ.
މި އިއުލާންތައް އައިސްފައި މިވަނީ، އަންނަ މަހު ރައީސް ޓްރަމްޕާއި ޗައިނާގެ ރައީސް ޝީ ޖިންޕިން ބައްދަލުކުރެއްވުމަށް ހަމަޖެހިފައި ވަނިކޮށެވެ.
ދުނިޔޭގެ "ރެއާ އާތު" ނުވަތަ މަދުން ނޫނީ ނުފެންނަ މައުދަނުތަކާއި، ހައި-ޓެކް އުފެއްދުންތަކަށް ބޭނުންވާ މުހިންމު މައުދަނުތަކުގެ ބޮޑު ބައެއް ޗައިނާއިން ސަޕްލައި ކުރާތީ، އެ ގައުމުން ރައްދުގައި އަޅާނެ ފިޔަވަޅަކަށް ވޮޝިންޓަނުން ސަމާލުވާނެ ކަމަށް ބެލެވެ އެވެ.
މީގެ ކުރިން އެމެރިކާއާއެކު ކުރެވުނު ވިޔަފާރީގެ މަޝްވަރާތަކުގެ ތެރެއިން ވެސް، ޗައިނާއިން ވަނީ މިފަދަ މައުދަނުތައް ބޭރުކުރުން ކޮންޓްރޯލްކޮށް، ފިޔަވަޅުތައް ވަރުގަދަކޮށްފަ އެވެ.
