ހުޅުމާލެ ފޭސް 1 ގެ ރުއްގަނޑު 2 ސަރަހައްދުގައި ބޯލިން އެރީނާ ތަރައްގީކުރުމުގެ މަޝްރޫއު އަމިއްލަ ކުންފުންޏަކާ ހަވާލުކޮށްފި އެވެ.
ރާއްޖޭގައި ހަދާ ފުރަތަމަ ބޯލިން ސެންޓަރަށް ރުއްގަނޑުން ގާތްގަނޑަކަށް 10،000 އަކަފޫޓު ކަނޑައި، މިހާރު ވަނީ ޓިނުޖަހައި ބަންދުކޮށްފަ އެވެ.
މައުލޫމާތު ލިބިފައިވާ ގޮތުގައި ދެ ފަންގިފިލާ އަށް ހަދާ މި ބޯލިން ސެންޓަރަށް ޖުމްލަ 20 މިލިއަން ރުފިޔާ ހަރަދުވެ އެވެ. އެތަން ހަދަނީ ބައިނަލްއަގުވާމީ މުބާރާތްތައް ވެސް ބޭއްވޭ ފެންވަރަށް ކަމަށް މައުލޫމާތު އެނގޭ މަސްދަރަކުން ބުންޏެވެ.
ބީލަމަކަށް ނުލައި، ވަކި ފަރާތަކާ ސީދާ ހަވާލުކޮށްގެން ކުރިއަށް ގެންދާ މި މަޝްރޫއާ ގުޅޭގޮތުން ސަރުކާރުގެ ކަމާބެހޭ އެއްވެސް އިދާރާއަކުން އަދި ވަކި އެއްޗެއް ހާމަކޮށްފައެއް ނުވެ އެވެ.
މި މަޝްރޫއު ކުރިއަށް ގެންދަނީ ސަރުކާރުގެ ބައެއް ޕްރެޖެކްޓުތަކަށް ބީއެމްއެލްމެދުވެރިކޮށް ފަންޑުކުރާ އުސޫލުންނެވެ.
ނަމަވެސް ބީއެމްއެލްގެ ހެޑް އޮފް ބްރޭންޑް އެންޑް މާކެޓިން މުހައްމަދު ސައީދު ވިދާޅުވީ ބޯލިން ސެންޓަރަށް ބީއެމްއެލްއިން ފަންޑުކުރާކަން އެނގިފައި ނެތް ކަމަށެވެ.
ބޯލިން ސެންޓަރު އަޅާ ރުއްގަނޑަކީ ތަފާތު އިޖުތިމާއީ ހަރަކާތްތަކާއި ވިޔަފާރި ބޮޑެތި އިވެންޓުތައް ބާއްވަމުން އައި ތަނެކެވެ.
މި ދައުރުގައި ސިންގަޕޫރު ފެންވަރުގެ ގޯ ކާޓް އެރީނާއެއް އަޅާނެ ކަމަށް މުއިއްޒު ވިދާޅުވެއްޖެ
މި ދައުރުގެ ތެރޭގައި ސިންގަޕޫރު ފެންވަރުގެ ބައިނަލްއަގުވާމީ އިންޑޯ ގޯ ކާޓް އެރީނާއެއް ހުޅުމާލޭގައި ގާއިމުކުރައްވާނެ ކަމަށް ރައީސް މުއިއްޒު ވިދާޅުވި. މީގެ އިތުރުން، އާބާދީ ބޮޑު ރަށްތަކުގައި ޒަމާނީ ސްޕޯޓްސް ކޮމްޕްލެކްސްތަކާއި ފިޓްނަސް މަރުކަޒުތައް އަޅައި، މި ދައުރުގެ ތެރޭގައި ހުރިހާ ކުޅިވަރު މަޝްރޫއުތަކެއް ނިންމަވާނެ ކަމަށްވެސް އެމަނިކުފާނު ވިދާޅުވި.
ބޯލިން ސެންޓަރުގެ އިތުރުން، ސިންގަޕޫރުގައި ހުންނަ ފެންވަރުގެ ބައިނަލްއަގުވާމީ އިންޑޯ ގޯ ކާޓް އެރީނާއެއް ރާއްޖޭގައި އަޅާނެ ކަމަށް މުއިއްޒު އިއުލާނު ކުރައްވާފައިވެ އެވެ. އޭގެ އިތުރުން އިންޓަނޭޝަނަލް ފެންވަރު ރޭސިން އަދި ޑްރިފްޓިން ޓްރެކެއް ހެދުމާއި ރާޅުގަނޑުގައި އިންޓަނޭޝަނަލް ފެންވަރުގެ ސާފިން ސްޓޭޑިއަމް އަދި ސަލްޓަން ޕާކުގައި އިންޑޯ ގޭމިން ސެންޓަރެއް މިދައުރުގެ ތެރޭގައި ހަދާނެ ކަމަށް މުއިއްޒު ވަނީ އިއުލާނު ކުރައްވާފަ އެވެ.
ނެޓްބޯލް ކޮމްޕްލެކްސް އިންޓަނޭޝަނަލް ފުޓްސަލް ކޮމްޕްލެކްސް ވެސް ހެދުމަށް މިއިއްޒު ނިންމަވާފައިވެ އެވެ.
