ރަސްމާލެ ތަރައްގީކުރުމުގެ ނަމުގައި ދިވެހި ރައްޔިތުންނަށް ބޯހިޔާވަހިކަމުގެ ދަޅަ ދެއްކުމަށް ފަހު، އެ މަޝްރޫއުގެ ބޮޑު ބައެއް ބޭރުގެ ކުންފުންޏަކަށް ވިއްކާލަނީ "ލާރި ގޯނީ"ގެ ބޭނުމުގައި ކަމަށް ކުރީގެ ރައީސް އަބްދުﷲ ޔާމީން ތުހުމަތުކުރައްވައިފި އެވެ.
ޕީއެންއެފްއިން ރޭ ބޭއްވި ޖަލްސާގައި ޔާމީން ވިދާޅުވީ، ސަރުކާރުގެ އެންމެ ބޮޑު މަޝްރޫއުގެ ގޮތުގައި ފެނިގެންދިޔައީ ރަސްމާލެ ހިއްކުމުގެ ވާހަކަ ކަމަށާއި، ނަމަވެސް މިއަދު އެކަންވެސް ވާކަށް ނެތް ކަމަށެވެ.
"ރަސްމާލޭގެ އެއްބައި ދުބާއީގެ ކުންފުންޏަކަށް ވިއްކާލަން އުޅޭ ވާހަކަ މި އަޑުއިވެނީ. އެކަމަކު އެއީ ދިވެހިރައްޔިތުންގެ ބޯހިޔާވަހިކަމުގެ ދަޅަ ދައްކައިގެން ކުރި ކަމެއް އެނގޭތޯ،" ޔާމީން ވިދާޅުވި އެވެ.
"ހަމަ ލާރި ގޯނި، ލާރިކޮޅު ބޭނުންވެގެން. އެ ނޫން އެއްވެސް ކަމެއް ނޫން."
ލާރި ގޯނި ނުވަތަ ލާރިކޮޅު، މާނަ އެ ކުރެއްވީ، ރަސްމާލެ ވިއްކާލައިގެން ދައުލަތަށް ލިބޭ ފައިސާއަށް ކަމެއް ނުވަތަ، އެ މުއާމަލާތުން ސަރުކާރުގެ ވެރިންނަށް ލިބިދާނެ ނާޖާއިޒު މާލީ މަންފާއަށް ކަމެއް ސާފުކޮށް ވިދާޅެއް ނުވެ އެވެ.
ޔާމީން މިފަދަ ތުހުމަތުތަކެއް ކުރެއްވީ، ދިވެހި ރައްޔިތުންގެ ބޯހިޔާވަހިކަމަށް ހާއްސަކޮށްގެން ހިއްކަމުންދާ ރަސްމާލޭގެ އެއްބައި، ޔޫއޭއީގެ އެންމެ ބޮޑު ރިއަލް އެސްޓޭޓް ކުންފުނި "އެމާރަށް" ވިއްކާލާ، ޓައުންޝިޕް އުސޫލުން ހާއްސަ ޓެކްސް ޒޯނެއްގެ ގޮތުގައި ތަރައްގީކުރުމާ ގުޅޭގޮތުން އިކޮނޮމިކް ކައުންސިލްގައި މަޝްވަރާކޮށްފައިވާކަން އަދަދު ނޫހުން އިއްޔެ ގެނެސްދީފައި ވަނިކޮށެވެ.
މި މަޝްވަރާތަކުގައި ރަސްމާލޭގެ ޓޫރިޒަމް ޒޯނުގެ ގޮތުގައި ކަނޑައަޅާފައިވާ ސަރަހައްދެއް އެމާރަށް ދޫކުރުމުގެ ބަދަލުގައި، ސޯޝަލް ހައުސިން ޔުނިޓުތައް އެޅުންފަދަ ކަންކަން ހިމަނައިގެން އެއްބަސްވުމަކަށް އައުމަށް މަސައްކަތްކުރަމުންދާއިރު، މިކަމާ ގުޅޭގޮތުން މަޝްވަރާކުރުމަށް ސަރުކާރުގެ ޓީމެއް ދުބާއީއަށް ދިއުމަށްވެސް ވަނީ ހަމަޖެހިފަ އެވެ.
ރަސްމާލޭގެ ބައެއް ވިއްކާލަން އުޅޭކަމުގެ އަޑުތައް ފެތުރުނު ނަމަވެސް އެކަމާ ގުޅޭ ގޮތުން ސަރުކާރުން މިހާތަނަށް ބަހެއް ބުނެފައެއް ނުވެ އެވެ.
ފުށިދިއްގަރު ފަޅު ހިއްކަން ފެށީ ޑިސެމްބަރު 18، 2023 ގައެވެ. ސަރުކާރުން ކުރިން އަށް މަސް ދުވަހުގެ ތެރޭގައި 1153 ހެކްޓަރުގެ ބިން ހިއްކާ ނިންމާނެ ކަމަށް ބުނި ނަމަވެސް، ބިން ހިއްކަން ފެށިތާ ތިން އަހަރު ވާން ކައިރިވެފައިވާއިރު، މިދިޔަ މަހުގެ ނިޔަލަށް ހިއްކިފައިވަނީ ބިމުގެ 70 ޕަސެންޓެވެ.
ނަމަވެސް މި ސަރުކާރުގެ އެންމެ ބޮޑު ޕްރޮޖެކްޓުގެ ގޮތުގައި، ތިމާވެއްޓާ ރައްޓެހި ޒަމާނީ "އެކޯ-ސިޓީ" އަކަށް ހެދުމަށް ރާވާފައިވާ ރަސްމާލެއަށް ބޭނުންވާ ބިން ހިއްކުން މި އަހަރުގެ ނިޔަލަށް މުޅިން ނިންމާލުމަށް ސަރުކާރުން މިހާރު އަންނަނީ އަމާޒުހިފަމުންނެވެ.
