އަދަދު ނޫހުން "އައިޝާ" ޑޮކިއުމެންޓްރީ ގެނެސްދިނުމުގެ އެއް މަސްދުވަސްކުރިން ރައީސް އޮފީހުގެ ކުރީގެ މުވައްޒަފަކަށް ސަރުކާރުގެ މިނިސްޓަރަކު ފޯނުން ގުޅައި އިންޒާރުދިން ކަމަށް އެ މުވައްޒަފު ތުހުމަތުކޮށްފި އެވެ.
ރައީސް އޮފީހުގައި ކުރިން މަސައްކަތްކުރި މުވައްޒަފަކު ސޯޝަލްމީޑިއާގައި ކުރި ޕޯސްޓެއްގައި ބުނީ އޭނާއަށް އިންޒާރު ދިނީ މި ސަރުކާރުގެ ކެބިނެޓުގައި މިހާރު ވެސް ހިމެނިވަޑައިގަންނަވާ މިނިސްޓަރެއް ކަމަށެވެ.
"އައިޝާ ޑޮކިއުމެންޓްރީ ގެނެސްދިނުމުގެ އެއް މަސްދުވަސްކުރިން މިހާރު ވެސް ކެބިނެޓުގައި ހިމެނިވަޑައިގަންނަވާ މިނިސްޓަރަކު އަޅުގަނޑަށް ގުޅައި އެއްވެސް މައުލޫމާތެއް ލީކު ނުކުރުމަށް ބުނެ އިންޒާރު ދިން، އޭނާ ބުނީ އަޅުގަނޑު ދައްކާ ވާހަކަ ގަބޫލުކުރަމޭ އެކަމަކު އަޅުގަނޑު އެކަން ކޮށްފިއްޔާ [މައުލޫމާތު ލީކުކޮށްފިއްޔާ] ވަރަށް ގޯސްކޮށޭ ކަންކަން ވާނީ،" ރައީސް އޮފީހުގެ ކުރީގެ މުވައްޒަފު ކުރި ޕޯސްޓުގައި ބުންޏެވެ.
ވަކި މިނިސްޓަރެއްގެ ނަން ބަޔާންކުރުމެއް ނެތި އެ މުވައްޒަފު ކުރި ޕޯސްޓުގައި ބުނީ، އެ ކޯލު 10 ވަރަކަށް މިނެޓަށް ދިގުދެމިގެންދިޔަ ކަމަށާއި އެއީ ކާކުގެ ވާހަކަކަން، އެ މިނިސްޓަރަށް އެނގޭނެ ކަމަށެވެ.
ރައީސުލްޖުމްހޫރިއްޔާ މުހައްމަދު މުއިއްޒުގެ އަނބިކަނބަލުން ސާޖިދާ މުހައްމަދުގެ ނުފޫޒުން ރައީސް އޮފީހުގައި ކުރިން މަސައްކަތްކުރި އެ ޒުވާން މުވައްޒަފަށާއި އޭނާގެ އާއިލާއަށް އެކި ގޮތްގޮތުން ދަތި ކުރަމުންދާކަމުގެ ތުހުމަތު ވެސް މީގެ ކުރިން އޭނާ ވަނީ ކޮށްފަ އެވެ.
އެގޮތުން، އޭނާގެ އާއިލާގެ ކޮންމެ މީހަކު ވަޒީފާއަކަށް ކުރިމަތިލި ނަމަވެސް، އޮންނަނީ ބްލެކް ލިސްޓުކޮށްފައި ކަމަށާއި އެކަން ކޮށްފައި އޮންނަނީ ސީދާ ސާޖިދާގެ ނުފޫޒުން ކަމަށް މައުލޫމާތު ލިބޭ ކަމަށް އޭނާ ބުނެފައިވެ އެވެ.
އައިޝާ ޑޮކިއުމެންޓްރީއާ ގުޅުވައި މި ސަރުކާރުގެ މިނިސްޓަރަކު އޭނާއަށް އިންޒާރުދިން ކަމަށް ރައީސް އޮފީހުގެ ކުރީގެ އެ މުވައްޒަފު ބުނެފައިވާއިރު، ޖިނާއީ ކުށެއްގެ ތަހުގީގަށް ކަމަށްބުނެ އޭނާގެ ޕާސްޕޯޓު ވެސް ފުލުހުން ވަނީ ކޯޓު އަމުރެއްގެ ދަށުން ހިފަހައްޓައިފަ އެވެ.
އަދަދުއަށް އެނގިފައިވާ ގޮތުގައި އޭނާގެ ޕާސްޕޯޓު އަދި ޓްރެވެލް ޑޮކިއުމެންޓުތައް ފުލުހުން ހިފަހައްޓާފައި ވަނީ އޯގަސްޓު 27، އިން ފެށިގެން ނޮވެމްބަރު 26، ގެ ނިޔަލަށެވެ.
