ރައީސް މުހައްމަދު މުއިއްޒުގެ ވެރިކަމުގެ ފެށުމަކީ އޮޅުވާލުމާއި މަކަރުވެރިކަން ކަމަށް ވިދާޅުވެ، ކުރީގެ ނައިބު ރައީސް ޑރ. މުހައްމަދު ޖަމީލް އަހުމަދު ވަރަށް ބޮޑަށް ފާޑުވިދާޅުވެއްޖެ އެވެ.
ޕީއެންއެފްއިން ރޭ ބޭއްވި ޖަލްސާގައި ޖަމީލް ވިދާޅުވީ މުއިއްޒު ވެރިކަމަށް ވަޑައިގަތީ ރައްޔިތުންނަށް ބޮޑެތި އޮޅުވާލުންތަކެއް އޮޅުވާލައިގެން ކަމަށާއި، އެމަނިކުފާނުގެ މުޅި ސިޔާސީ ފެށުން ބިނާވެފައިވަނީ މަކަރުވެރިކަމުގެ މައްޗަށް ކަމަށެވެ. މުއިއްޒުގެ ހުރި މަކަރުވެރިކަމާއި އަނިޔާވެރިކަން ސާފުކޮށްދެއްވާނެ ކަމަށް ވިދާޅުވެ، ޖަމީލް ވަނީ މުއިއްޒަށް ބަހުސަކަށް ދައުވަތު ދެއްވައިފަ އެވެ.
"ކިޔައިދޭނަން މުއިއްޒުގެ ހުރި އަނިޔާވެރިކަމާއި މުއިއްޒުގެ ހުރި ލާއިންސާނީ ކަމާއި މުއިއްޒުގެ ހުރި ލުއްޗާ ކަމާއި މުއިއްޒުގެ ހުރި ތާކުންތާކު ނުޖެހޭ ކަމާއި މަކަރުވެރިކަމާއި މައްކާރުކަން އަޅުގަނޑުމެން ކިޔައިދީފާނަން ވަރަށް ސާފުކޮށް. އާދޭ މުއިއްޒަށް ކެރެންޏާމު،" އޭނާ ވިދާޅުވި އެވެ.
ވެރިކަން ހޯއްދެވުމަށް މުއިއްޒު ދެއްކެވީ ޔާމީންގެ ވާހަކަ އާއި ޔާމީނަށް އަނިޔާ ލިބޭ ވާހަކަ އާއި ޔާމިންނަށް ޖަހާފައިވާ ހުކުމަކީ ހަރާމް ހުކުމެއް ކަމުގެ ވާހަކަ ކަމަށް ޖަމީލް ވިދާޅުވި އެވެ.
"މުއިއްޒު ދެއްކީ ތިމަންމަނިކުފާނު މިއަންނަނީ ރައީސް ޔާމީން މިނިވަން ކޮށްދޭށޭ. މުއިއްޒު އެކަން ކޮށްފިތޯ،" ޖަމީލް ވިދާޅުވި އެވެ.
"މުއިއްޒު ކިޔެވި ފޮތުގައި ދޮގާއި ތެދުގެ ވާހަކަ ނެތީތޯ. މުއިއްޒު ކިޔެވި ފޮތުގައި ހައްގާއި ބާތިލް އޮތީ އޮޅިފައިތޯ، ބާތިލަކީ ހައްގުކަމަށް، ދޮގަކީ ތެދުކަމަށް، އެއީތޯ މުއިއްޒަށް ވިސްނުނު އެއްޗަކީ. އެހެންވެއްޖިއްޔާ މުއިއްޒު އަކީ ބުއްދި ހަމަޖެހޭ މީހެއް ނޫން."
މުނާފިގުންގެ ސިފަތަކާ ބެހޭ ހަދީސްފުޅަށް އިޝާރާތް ކުރައްވަމުން ޖަމީލް ވިދާޅުވީ، ރައީސް މުއިއްޒުގެ ކިބައިން އެ ހުރިހާ ސިފައެއް ފެންނަމުންދާ ކަމަށެވެ. ވާހަކަ ދައްކަވައިފިނަމަ ދޮގު ހެދުމާއި، ވައުދެއް ވެވަޑައިގެންފިނަމަ އެއާ ހިލާފުވުމާއި، އަމާނާތެއް ހަވާލުކޮށްފިނަމަ އެއަށް ހިޔާނާތްތެރިވުމުގެ ސިފަ މުއިއްޒުގެ ކިބައިގައި އެބަހުރި ކަމަށް އޭނާ ވިދާޅުވި އެވެ.
ރިޔާސީ އިންތިހާބުގައި ރައްޔިތުން މުއިއްޒަށް ވޯޓު ދިނީ ޔާމީނަށްޓަކައި އަމާނާތެއްގެ ގޮތުގައި ކަމަށާއި، ނަމަވެސް މުއިއްޒު އެ އަމާނާތަށް ހިޔާނާތްތެރިވެފައިވާ ކަމަށް ވެސް ޖަމީލް ވިދާޅުވިއެވެ. އެހެންވެ، ކުރިއަށް އޮތް ތަނުގައި މުއިއްޒަށް ތާއީދުކުރާނެ އެއްވެސް ގޮތެއް ނޯންނާނެ ކަމަށްވެސް އޭނާ ވިދާޅުވި އެވެ.
މީގެ އިތުރުން، މުއިއްޒުގެ މައްޗަށް ކޮރަޕްޝަނާއި އަދުލުވެރިކަމެއް ނެތް ކަމުގެ ބޮޑެތި ތުހުމަތުތަކެއް ޖަމީލް ކުރެއްވި އެވެ. އެގޮތުން މުއިއްޒުގެ އާއިލާގެ ބޭފުޅަކު މަގާމުގައި ހުންނަވައިގެން ޓޫރިޒަމް ތަރައްގީކުރަން ތ. އަތޮޅުން ތިން ރަށެއް ހޯއްދެވި މައްސަލަ އާއި ސުޕްރީމް ކޯޓުގެ ފަނޑިޔާރުން ވަކިކުރުމުގައި އަމަލުކުރި ގޮތަށް ޖަމީލް ފާޑުވިދާޅުވި އެވެ.
ސަރުކާރުގެ އަނިޔާވެރިކަމާ ގުޅޭގޮތުން ވާހަކަ ދައްކަވަމުން މިސާލެއްގެ ގޮތުގައި ޖަމީލް ނެންގެވީ އަދަދު ނޫހުގެ ނޫސްވެރިޔާ މުހައްމަދު ޝަހުޒާން ޖަލަށްލި މައްސަލަ އެވެ. ޝަހުޒާންގެ ނޫސްވެރިކަމުގެ ވާޖިބު އަދާކުރުމުގެ ގޮތުން ސުވާލުކުރުމުން، ޝަހުޒާންގެ މަންމަ އާއި ކުޑަކުދިންގެ ކުރިމަތީގައި ހައްޔަރުކޮށް ޖަލަށްލުމަކީ އިންސާފެއް ނޫން ކަމަށާއި، މިއީ ލާއިންސާނީ އަމަލެއް ކަމަށް ޖަމީލް ވިދާޅުވި އެވެ.
