ރައީސް މުހައްމަދު މުއިއްޒުގެ ވެރިކަން ފެށުނުއިރު 17.50 ރުފިޔާގައި ހުރި ޑޮލަރުގެ އަގު މިއަދު 23 ރުފިޔާއަށްވުރެ މައްޗަށް ދިޔައީ ސަރުކާރުން ތަންފީޒުކުރަން ފެށި ސިޔާސަތުތައް މަދުވެގެން ނޫން ކަމަށާއި، އިގުތިސާދު ފުން އަނދަވަޅަކަށް ވެއްޓުނީ ސަރުކާރުގެ ބޮޑު އިސްރާފާއި ހަރަދު ކުޑަނުކުރުމުގެ ސަބަބުން ކަމަށް ކުރީގެ އިކޮނޮމިކް މިނިސްޓަރު އަދި އެމްޑީޕީގެ ކުރީގެ ޗެއާޕާސަން ފައްޔާޒު އިސްމާއީލް ވިދާޅުވެއްޖެ އެވެ.
އެކްސްގައި ކުރެއްވި ޕޯސްޓެއްގައި ފައްޔާޒު ވިދާޅުވީ، މި ސަރުކާރުން ޓީޖީއެސްޓީ، ގްރީން ޓެކްސް އަދި އެއަޕޯޓު ފީތައް ބޮޑުކޮށް، ކޮންމެ ފަތުރުވެރިޔެއްގެ ބޮލަކަށް 500 ޑޮލަރު މާރުކުރަން މަޖުބޫރުކުރުމުގެ އިތުރުން އީ-ކޮމާސް ސައިޓުތަކުން 30 ޕަސެންޓު ނަގަމުންދާތީ، ރާއްޖޭގެ ތާރީހުގައި ސަރުކާރަކަށް ޑޮލަރުން އާމްދަނީ ނުލިބޭ މިންވަރަށް އާމްދަނީ ލިބެމުންދާ ކަމަށެވެ.
އެއީ ހަރަދު ކުޑަކުރުމާއެކު އަޅަންޖެހޭ ފިޔަވަޅުތަކެއްކަން ފާހަގަކުރައްވައި ފައްޔާޒު ވިދާޅުވީ، ކޮވިޑުގެ ހާލަތުގައި މުޅި ދުނިޔެ ހުއްޓުނުއިރު ވެސް ރާއްޖޭގެ އިގުތިސާދު ނުވެއްޓޭ ފަދަ ފުން އަނދަވަޅަކަށް މި ސަރުކާރުން އިގުތިސާދު ވައްޓާލާފައިވާ ކަމަށެވެ.
"މިއަދު އެ ދިމާކުރަނީ ދިވެހި އިގުތިސާދުގެ މައި އިންޖީނު ހިންގައިދޭ ރިސޯޓު މުވައްޒަފުންނާ. އެ އުޅެނީ ސަރުކާރުގެ ބޮޑު އިސްރާފަށް އެތައް ހާސް ދިވެހިންނެއްގެ ހަލާލު މަސައްކަތުން ލިބޭ އާމްދަނީން ފަންޑުކުރަން،" ފައްޔާޒު ވިދާޅުވި އެވެ.
ޑޮލަރުގެ އަގު ހިފެހެއްޓުމެއް ނެތި އުފުލެނީ ރަސްމާލެ ހިއްކުމާއި، އަސްކަރީ ޑްރޯނާއި ހަތިޔާރު ގަތުމާއި، ބިލިއަނުން ކުރާ މުސާރައިގެ ހަރަދުތަކުގެ އިތުރުން ކޮރަޕްޝަނާއި ވައްކަމުގެ ސަބަބުން ކަމަށްވާއިރު، އެކަމުގެ ޒިންމާ ވިޔަފާރިތަކާއި ޑޮލަރުން އާމްދަނީ ލިބޭ މީހުންގެ ބޮލުގައި ނޭޅުވޭނެ ކަމަށް އޭނާ ވިދާޅުވި އެވެ.
ޕްރައިވެޓް ސެކްޓާ އެއްކޮށް ފުނޑާލިއިރު ބޭރުން ފައިސާއެއް ނުވަތަ އިންވެސްޓްމަންޓެއް ވެސް ނުގެނެވުނު ކަމަށާއި، ބީއެމްއެލް އާއި އެމްއެމްއޭ ރައީސް އޮފީހުގެ ގޮފިތަކެއްގެ ގޮތުގައި ބޭނުންކޮށް، މާރުކުރާ ޑޮލަރު ސިޔާސީ ކަންކަމަށް ބޭނުންކުރުމުގެ އިތުރުން މިދިޔަ މަހު ގާނޫނީ އިމުގެ ބޭރުން 2.4 ބިލިއަން ރުފިޔާ ޗާޕުކޮށްގެން އިގުތިސޯދަށް ވައްދާފައިވާ ކަމަށް ފައްޔާޒު ތުހުމަތު ކުރެއްވި އެވެ.
ސަރުކާރުގެ ބޮޑު އިސްރާފަށް ފަންޑުކުރުމަށްޓަކައި ރިސޯޓު މުވައްޒަފުންގެ ހަލާލު އާމްދަނީއާއި ޓޫރިޒަމް ވިޔަފާރިތަކަށް ލިބޭ ބޭރުފައިސާ މަޖުބޫރުން މާރުކުރުވުމަކީ ވިޔަފާރިތައް ފުނޑި، އިންވެސްޓްކުރުމަށް ފަސްޖެހުން ގެނުވާނެ ކަމެއް ކަމަށް ވިދާޅުވި އެވެ.
އިގުތިސޯދުގެ ވިންދަކީ ޓޫރިޒަމް ވިޔަފާރިތަކާއި މަސައްކަތްތެރިން ކަމަށްވާއިރު، އެ ވިޔަފާރިތައް އިނދަޖައްސާލުމަކީ ގައުމަށް ދެވޭނެ އެންމެ ބޮޑު ގެއްލުން ކަމަށް ވިދާޅުވެ ފައްޔާޒު ވަނީ ކަންބޮޑުވުން ފާޅުކުރައްވާފަ އެވެ.
